VOV4.Bahnar - Hăm tơ drong vang tơ gŭm đơ̆ng rim anih jang, rim bơ ngai, ‘moi kiơ̆ tơ drong jang “Bơ ngai iŏk tơ gŭm” yua đơ̆ng Trung ương Khŭl vei lăng drŏ kăn Việt Nam tơ lĕch jang, lơ hơ ioh mơ ti, ưh kơ đei hơ nih gơ nang tơ̆ Dak hlôi đei tơ drong tơ gŭm, vei lăng pơ đĭ găh tơ mam drăm păng jơ hngơ̆m đon. Kiơ̆ đơ̆ng noh, đe oh đei dơ̆ng hơ nih gơ nang vă yak hloh dôm tơ drong mơ mat tat, hơ tŏk tơ iung tôm tơ drong hloh.

Sơ năm sơ̆, mĕ ƀă 2 ‘nu oh Đoàn Nhã Trúc păng Đoàn Nhã Phương đei lôch yua đơ̆ng jĭ Covid-19, kơ na 2 ‘nu oh năm oei hăm yă păih mĕ tơ̆ plei Kring, xăh Ea Sin, apŭng Krông Buk, dêh char Dak Lak. yă Võ Thị Ngân, yă bre mŏ oh sư tơ băt, ŭnh hnam găh dơ nuh hin, mŭk drăm tôch kơ mơ mat tat, đei jĭ hơ buh dơ̆ng kơ na dôm yă sâu sư tôch kơ mơ mat tat. Tôch kơ pŭn, 2 ‘nu sâu hlôi đei 2 ‘nu drŏ kăn jang mơ dro sa iŏk tơ gŭm, pơ kăp gô vang yak hơ dai tơ gŭm pơ đĭ găh tơ mam drăm păng jơ hngơ̆m đon.

          “Sơ năm 2021 ‘noh 2 ‘nu sâu dơ̆ng kơ dih hơ năn ŭnh hnam dơ nuh hin, yua kơ mĕ ƀă ŭnh hnam dơ nuh hin đang kơ ‘noh mĕ ƀă lôch ‘noh 2 ‘nu sâu dơ̆ng hơ năn ŭnh hnam dơ nuh hin. Mă lei truh sơ năm 2022 ‘noh yă athei pĭnh vă 2 ‘nu sư tơ plih hộ khâu oei hăm yă vă kơ yă rong hloi. Pơ ma atŭm ‘noh tơ̆ tơ ring 3 ‘noh kŭm tôch kơ mơ mat tat. Yă đei jĭ bŭk kơ ting, lăp gơh nơ năm lăp ai đĕch, oei tơ dăh năm hơ tăih ‘noh brŏk jĭ ưh kơ gơh nơ năm.

Kŭm oei lơ̆m tơ drong mĕ lôch hơ chăng, ƀă năm jang sa hơ tăih, 2 ‘nu ‘nhŏng oh Lưu Hoàng Anh (8 sơ năm) păng Lưu Nguyễn Hà Vy (2 sơ năm) oei tơ̆ thôn 3, xăh Ea kpam, apŭng Cư Mgar lăp đei yă tơm ‘noh vei lăng. Yă Nguyễn Thị Xuân, 64 sơ năm, yă 2 ‘nu oh tơ roi, ƀơ̆t mĕ sư lôch mon Hà Vy tam mă truh 7 khei. 2 sơ năm âu ki, yă athei jang tôm tơ drong, đơ̆ng rong nhŭng, phĕ tiu, phĕ cheh phe, ôp pơ nhan thuê... vă đei jên vei lăng ăn đe sâu. Dôm khei kơ âu, tơ drong arih sa kơ 3 ‘nu yă sâu đei dă ƀiơ̆ kơ mơ mat tat ƀiơ̆ ƀơ̆t đei Khŭl vei lăng drŏ kăn thôn 3, xăh Ea Kpam iŏk tơ gŭm vei lăng 2 ‘nu oh kiơ̆ tơ drong jang “Bơ ngai iŏk tơ gŭm”.

          Gơ nang đơ̆ng tơ drong tơ gŭm đơ̆ng Khŭl vei lăng drŏ kăn thôn 3 đei dôm tơ mam vă rong sâu rim năr. Ƀơ̆t lăp ‘noh Khŭl vei lăng drŏ kăn năm pơ lung yă sâu vă yă rong sâu ‘lŏ jing bơ ngai đei yua. Bơ nê kơ rim kơ dră, rim anih jang, đe mŏ oh tơ gŭm yă sâu nhôn.

2 ‘nu mŏ oh Nhã Trúc păng Nhã Phương đei 2 ‘nu bơ ngai iŏkt ơ gŭm

        Kiơ̆ Khŭl vei lăng drŏ kăn dêh char Dak Lak, jĭ Covid-19 hlôi pơm ăn 18 ‘nu hơ ioh tơ̆ dêh char mơ ti mĕ, ƀă. Kŭm hăm ‘noh, đei vă jê̆ 2.300 ‘nu hơ ioh mơ ti yua kơ tơ drong nai hai; lơ̆m noh đei 679 ‘nu hơ ioh mơ ti pơ đĭ mĕ ƀă. Bơ̆ jang kiơ̆ tơ drong jang “ Bơ ngai iŏk tơ gŭm” yua đơ̆ng Trung ương Khŭl vei lăng drŏ kăn tơ lĕch jang, Khŭl vei lăng drŏ kăn dêh char Dak Lak tơ lĕch tơ drong tơm đĭ đăng rim Kơ dră khŭl bơ̆ jang kiơ̆ tơ drong jang mă lăp hăm yan âu tơ̆ rim anih jang, tơ ring. Pơ tơm tơ lĕch jang đơ̆ng hơ tuch sơ năm 2021 truh dang ei, tơ drong jang hlôi iŏk đei tơ drong drơ̆ng lăp, jang kiơ̆ ‘lơ̆ng đơ̆ng rim kơ dră khŭl.

        Tơ̆ xăh Ea Kpam, apŭng Cư Mgar, ‘moi kiơ̆ tơ drong jang, Khŭl hlôi tơ goăt, krao hơ vơn rim khŭl jang, bơ ngai iŏk tơ gŭm, vei lăng rong ‘me 6 ‘mon iĕ mơ ti, đei tơ drong arih sa mơ mat tat tơ̆ tơ ring ding truh 18 sơ năm. Mŏ Trần Thị Thuyết, Kơ dră Khŭl vei lăng drŏ kăn xăh Ea Kpam tơ roi, mă đơ̆ng tơ drong tơ gŭm găh tơ mam drăm tam mă lơ ră mă lei gĭt kăl hloh ‘noh jĭ tơ drong pơ lung găh jơ hngơ̆m đon đe mon. Kŭm hăm krao hơ vơn rim bơ ngai đei jơ hngơ̆m đon ‘lơ̆ng, Khŭl oei hơ tŏk tơ iung tơ drong jang “ Drŏ kăn iŏk akŏm tơ mam đe hŭt” lơ̆m khŭl jang vă tĕch pơm jên mong asong tơ mam ăn kơ đe mon đei iŏk tơ gŭm.

        “Khŭl jang hlôi hơ nơ̆ng năm ngôi, apĭnh jet gia, pơ lung jơ hngơ̆m pran kŭm nhen pơ gơ̆r năm ngôi, asong tơ mam ăn kơ đe mon. Đei pơ gơ̆r năm ngôi hăm jên măt păng kŭm đei hăm dôm tơ mam, nhen bơ̆n ƀoh, măm păng phe.”

Đe mŏ oh drŏ kăn thôn 3, xăh Ea Kpam tơ mang, asong tơ mam ăn 2 ‘nu ‘nhŏng oh Lưu Hoàng Anh păng Lưu Nguyễn Hà Vy

          Truh dang ei, hlôi đei hloh 500 ‘nu hơ ioh mơ ti đei tơ drong arih sa mơ mat tat tơ̆ Dak Lak đei rim khŭl jang, rim bơ ngai iŏk tơ gŭm, pơ kăp tơ gŭm hăm lơ trong nhen pơ jao hŏk ƀŏng, tơ gŭm oei sa ding truh 18 sơ năm păng tơ mam man hnam ‘mêm kơ eng. Akŏp kơ jă jên pơ kăp tơ gŭm hloh 5 ti hlak jên. Yă Tô Thị Tâm, Kơ dră Khŭl vei lăng drŏ kăn dêh char Dak Lak hơ len lăng, ‘nâu jĭ tơ drong jang ‘lơ̆ng, tơ gop vei sơ đơ̆ng tơ drong arih sa tơ pôl. Khŭl vei lăng drŏ kăn rim tơ ring hlôi vang tơ gŭm hơ vơn jên, kơ tă vang tơ gŭm đe oh păng gô hơ nơ̆ng pơ vei, yak hơ dai hăm đe oh lơ̆m khei ‘năr pơ tăl đơ̆ng.

        “Tơ drong jang âu nhôn hlôi pơ jao hơ năp jang ăn kơ rim Khŭl tơ ring đĭ đăng khŭl jang rim tơ ring tă kơ iŏk tơ gŭm 1 ‘nu mon tơ̆ kơ pal mơ̆ng kiơ̆ rim anih jang. Tơ drong gĭt kăl hloh nhôn ‘meh lăng truh ‘noh jĭ ‘ngoăih kơ tơ drong jên păng tơ gŭm tơ mam ‘noh pơ lung, vang ‘mêm, jơ hngơ̆m đon păng tơ gŭm băt hơ dăh đei dôm đon tơ chĕng, tơ drong ‘mêm, mơ mat tat đơ̆ng đe mon, khei ‘năr tơ chĕng đơ̆ng đe mon ‘lŏ ưh kơ đei mĕ ƀă vei lăng. Ƀlep lơ̆m dôm năr Têt, ‘năr 1/6 dăh mă pơ nil trung thu dăh mă dôm năr gĭt kăl hơ yơ ‘noh vă đe mon dă ƀiơ̆ kơ sơ ngon, pơ sĕl.”

        Hăm tơ drong vang tơ gŭm đơ̆ng dôm bơ ngai iŏk tơ gŭm, lơ hơ ioh mơ ti tơ̆ Dak Lak gô dă ƀiơ̆ kơ mơ mat tat, đei dơ̆ng tơ drong hiôk vă yak hloh dôm tơ drong ơh sơ ‘ngon. Ưh khan lăp jing dôm tơ drong tơ gŭm găh tơ mam drăm, kiơ̆ đơ̆ng tơ drong jang, đe oh gô đei dơ̆ng dôm tơ drong pơ lung găh jơ hngơ̆m đon, tơ drong vang yak hơ dai păng pơ tho găh tơ drong băt vei lăng jơ hngơ̆m jăn vă đe oh hơ tŏk tơ iung tôm tơ drong ƀiơ̆, yak truh tơ̆ hơ năp kơnh ‘lơ̆ng hơ iă hloh.                 

H’Xíu: Chih

Thuem: Tơ blơ̆