Pơm kiơ̆ Tơchơ̆t 57, sơnăm ou dêh char Đăk Lăk gô vă asong hloh 1.000 tih hlj ăn khua hŏk kơmăi kơmŏk păng tơplih 'nao tơchăr hơgei, atŭm hăm noh gô vă pơtoi pơm jang lơ̆m dôm sơnăm truh. Mă lei, truh dang ei dêh char pơtơm asong đei pơhlom 30 ti hlj păng kơsô̆ jên ou kŭm tam mă đei iŏk yua tôm.

Ƀok Cao Đình Huy, Kơdră Hơnih jang Jên hu ăn tơbăt: Đăk Lăk ưh đei kơƀah gah bơngai jang khua hŏk, jang kơmăi kơmŏk 'nao tơchăr gơh hơgei. Hăm dôm tơchơ̆t tơgŭm đei iŏk yua, hơnih jang mŭk drăm iĕ păng pah lăp gơh đei iŏk tơgŭm truh 100 triu hlj rim sơnăm. Minh ƀar tơdrong jang chih hơlen khua hŏk đei jên mong chă tơgŭm đơ̆ng 50% truh 100% jên hơpah bơngai jang, tơmam drăm jang păng kơmăi kơmŏk. Mă lei, athei pơjing đei dôm tơdrong jang, tơmam drăm đei tôm hơdah vă gơh tơlĕch jang.

Gah hơnih jang mŭk drăm, ƀok Phạm Ngọc Duy Liêm akhan, lơ̆m tơring hrei ou tĕch lơ phân mêm dah mă kơmăi kơmŏk 'nao. Mă lei, hơnih jang mŭk drăm athei sơkơ̆t hơdah, kơdih po kăl yă kiơ păng trong jang ayơ gơh jang hăm kơmăi kơmŏk 'nao, đơ̆ng noh tơlĕch tơdrong jang hơdah hăm hơnih jang mŭk drăm kơmăi kơmŏk:  “Rim hơnih jang mŭk drăm gah kơmăi kơmŏk 'nao 'noh nhôn tam mă đei tôm mah, hơnih jang mŭk drăm akhan athei pơma đam 2 pah, ưh hơdrô̆ hơnih jang mŭk drăm kơmăi kơmŏk 'nao đĕch ôh mă hơnih jang mŭk drăm athei tơlĕch trong jang vă pơklaih tơnap tap, vă hơnih jang mŭk drăm gơh hiôk hloh lơ̆m tơdrong jang kơmăi kơmŏk”.

Rim bơngai tang măt pơtruh nơ̆r, hăm tơdrong ƀônh hiôk gah choh jang xa, pơm tơlĕch tơmam drăm păng tơmang pơhiơ̆, Đăk Lăk gơh chă tơlĕch dôm tơdrong jang 'nao nhen choh jang xa gơh hơgei, hơlen băt tơm a la chă, vei lăng tơdrong pơm jang, pơm tơlĕch păng tơmang pơhiơ̆ gơh hơgei; pơjing cham char hơlen băt gah kơmăi kơmŏk 'nao, tơdrong mă hơnih jang mŭk drăm pơklaih tơdrong tơnap tap vă rim hơnih jang hơlen gah kơmăi kơmŏk 'nao tơchăr hơgei lơ̆m pơhlom 3 dah mă 6 khei; mưh tơblang hơdah tơdrong jang đei jơnei noh pơtoi đei pơih să pơm jang.

Ƀok Đỗ Hữu Huy, Kơdră Hơnih jang vei lăng kon pơlei dêh char Đăk Lăk sơkơ̆t hơdah, mă lơ hơnih jang mŭk drăm lơ̆m tơring 'noh hơnih jang mŭk drăm iĕ pah ai păng iĕ ioch. Lơ̆m tơdrong iŏk yua kơmăi kơmŏk 'nao, 3 tơdrong tơhlăk tih noh jên asong jang, bơngai jang păng đon tơchĕng ưh kơ 'meh tơplih. Kơyuơ noh, vă pơklaih, dêh char hơvơn hơnih jang mŭk drăm asong chă răt kơmăi kơmŏk 'nao tơchăr hơgei đei tơchơ̆t hơdah, atŭm hăm noh hơtŏk tơdrong akŏm đơ̆ng hơnih jang mŭk drăm hăm jơnŭm pơgơ̆r tơring, hnam trưng đăi hŏk, hnam trưng hơlen chih akŏm tơdrong 'nao păng bơngai juăt jang gah kơmăi kơmŏk 'nao tơchăr hơgei: “Rim hơnih jang mŭk drăm athei tơplih đon tơchĕng, gah trong jang vei lăng jăl pơjing tơdrong oei xa 'nao 'lơ̆ng hơ-iă lơ̆m hơnih jang. Mă 2 'noh akŏm lơ̆m tơdrong kơtang kơ tơring, tơrĕk truh tơdrong jang tơguăt ‘3 hơnih’, hơnih jang mŭk drăm chih măt răt yua ăn hơnih jang păng hơnih jang mŭk drăm chih măt răt yua ăn hnam trưng hŏk lơ̆m dêh char, rim hơnih jang hơlen chih akŏm păng rim bơngai juăt jang gah kơmăi kơmŏk 'nao lơ̆m păng 'nguaih kơ dêh char, hơnih jang mŭk drăm kăl yă kiơ, chih măt răt yă kiơ ăn kơ hơnih jang, dah mă ăn dôm hnam trưng hŏk 'noh gô tơqblang hơdah gah tơdrong tơnap tap mă noh”.