‘Mi đơ̆ng gơmăng năr 8/9 pơm ăn mĭnh ƀar tơring lơ̆m dêh char Đắk Lắk đei ƀôh đak lơ̆p, pơm kơnê̆ trong nơnăm. Hơnih vei lăng kon pơlei dêh char Đắk Lắk athei rim tơring tơlĕch trong jang tang găn hơlou ‘mi tih lơ̆m dôm năr kơnh. Hơnih vei lăng Choh jang sa păng Cham char dêh char Đắk Lắk tơbăt truh 4 jơ kơsơ̆ năr 9/9, ‘mi tih tim mă pơm pơrăm găh bơngai, hnam oei păng choh jang sa. Mă lei, mĭnh ƀar jăl trong gre đak lơ̆p. Tơ̆ tơring Ia Lốp, gơng kơsô̆ 9 tŏk bŏk đak lơ̆p dang 50cm, đak hơnơ̆ng tŏk blai pơm ăn trong nơnăm ưh kơ gơh chă yơ yak. Kơdră tơring hlôi hơvơn khul bơ̆ jang dăng tơlei, tơbăt hơnih hơmơt, ưh kơ ăn kon pơlei yak găn trong ou. Mĭnh ƀar tơring nhen tơring Ea Drông, tơring Ea Kar, tơring Cuôr Dăng, dêh char Đắk Lắk jei đei ƀôh đak lơ̆p mĭnh ƀar hơnih. Hloh 300 ‘nu hŏk tro tơ̆ 2 hnam trương kơ tơring Cuôr Dăng măh ăn pơdơ̆h kơ hŏk kơ yuơ đak lơ̆p trong nơnăm. Tơ̆ hơnăp ‘mi kial oei kơtang, dêh char Đắk Lắk hơnơ̆ng athei rim tơring vei kơjăp gak vei lăng, hơnơ̆ng hơlen băt hơdăh ‘mi kial, iung jang dăr lăng dôm bro ngăl đei đak lơ̆p, teh tơdrŭt hơlih păng dôm trong nơnăm ưh kơjăp ‘lơ̆ng. Rim tơring iung jang yông kon pơlei đơ̆ng hơnih hơmơt đei teh tơdrŭt hơlih kơtang truh oei tơ̆ hơnih sơđơ̆ng.