Đơ̆ng rŏng proh hơmet, Khánh Hòa oei 246 anĭh pơtho hŏk pơhrăm kơ Tĕh đak, tơjur 482 anĭh tơm, hơtŏ tơjur 66%. Lơ hnam trưng đei pơgơ̆r kiơ̆ tơdrong jang hnam trưng tơm, hnam trưng klăih sơng păng hơnih hŏk, pơm ăn kơ lăm, hŏk tro tơ̆ minh hnam trưng tih hloh kơ hơdrol.

Pơtôch jơ bơ̆ jang, Phŏ Kơdră Anĭh tơm vei lăng pơtho pơhrăm Phạm Ngọc Thưởng athei Anĭh vei lăng kon pơlei dêh char păng anih pơtho pơhrăm Khánh Hòa dăr lăng, kăt tơjur dôm 'măng hop akŏm, 'măng pơlong ư̆h kơ kăl, vă thây kô pơtho hơtŏk jơ pơtho tơ̆ lăm. Anih vei pơtho pơhrăm hơnơ̆ng tŭn pran klăih song kơchư̆k, klăih song hơnăp jang, tơplĭh 'nao trong vei lăng. Hăm dôm hnam trưng đei lơ bơngai hŏk, kăl kơ hơtŏk loi dơ̆ng iŏk yua kơmăy chih răk păng kơmăy kơmŏk vă tơgŭm vei lăng, tơjur ƀiơ̆ tơdrong kơhret bơ̆jang ăn hnam trưng.