Tơ̆ tơnŏk duk ka Phú Lạc, phường Hòa Hiệp, hơdrol kơ duk lĕch tơ̆ đak dơsĭ, dôm tơdrong hơgăt găh hla ar, kơmăy hơlen lăng tơdrong yak, hla ar chih tơroi tơdrong jang păng tơring jang đei hơlen lăng, pơtho tơƀôh. Dôm bơngai ưh kơ măh tôm tơdrong hơgăt ưh kơ gơh lĕch đơ̆ng tơnŏk duk dơ̆ng. Ƀok Phan Thanh Lực, vei lăng tơnŏk duk ka Phú Lạc tơbăt, kŭm hăm vei lăng đơ̆ng khul jang kơpal, tơdrong roi tơbăt hơnơ̆ng tơgŭm ăn kon pơlei jang ka băt hơdăh dôm tơdrong hơgăt athei pơm kiơ̆ hloi iŏk đơ̆ng hơmet ăn 'măng năm jang tơ̆ đak dơsĭ.

"Đĭ đăng rim anĭh jang ăn kon pơlei mơ̆t vă veh ver tơdrong 3 ư̆h. Đei hla ar chĭh tơbăt tôm, mă kăl 'nŏh ư̆h kơ mơ̆t lơ̆m tơring đak dơsĭ tĕh đak đe.

Thiếu tá Lương Công Hậu, Phŏ Kơdră vei lăng Kơđông Linh vei lăng tơring sơlam Hòa Hiệp Nam tơbăt, tơdrong vei lăng đei jang kiơ̆ lơ̆m prăt jơ năr duk ka bơ̆ jang. Truh dang ei, tơ̆ tơring ‘nou ưh pă đei duk ka lơ̆m hơnăn "3 ưh"; dôm duk hlôi đei tăh kơmăy dăr lăng trong yak păng athei pơm kiơ̆ tơdrong hơgăt mưh kơmăy kơmŏk đei tơƀơ̆p tơdrong ou to.

"Kon pơlei jang ka pơm kiơ̆ tơpăt dôm tơdrong hơgăt găh tang găn rôp ka glăi IUU. Dang ei, lơ̆m tơring ưh pă đei duk hơ yơ găh “3 ưh”. Dôm duk tă kơ hlôi tăh tôm kơmăy vei lăng trong yak păng pơm kiơ̆ kơjăp dôm tơdrong hơgăt găh tơdrong hơmet ming mưh kơmăy ưh kơ 'lơ̆ng, vă vei sơđơ̆ng ƀlep tơdrong hơgăt đơ̆ng khôi luơ̆t."

Ưh khan lăp vei lăng tơ̆ tơnŏk duk, khŭl kơdră tơring oei hơnhăk tơdrong jang vei lăng khŭl duk vih truh tơ̆ tơring kon pơlei oei. Tơ̆ dôm tơring hơdrol ki đei ƀôh tơdrong pơm glăi rôp yâu ka hơdang IUU, dôm hơnih kơphô̆ jang hơdai hăm khŭl jang kơpal vei lăng duk ka kiơ̆ đơ̆ng dôm grŭp duk sơđơ̆ng; tơ 'ngla duk đei roi tơbăt, kĭ pơkăp, lơ̆m noh mă loi 'noh jĭ grŭp duk rôp yâu ka ngừ đak dơsĭ.

Hăm dôm duk ưh đei tôm tơdrong kăl vă jang, khul kơdră pơgơ̆r dăr lăng tơ̆ hơnih dơ̆ng 24 jơ lơ̆m mĭnh năr. Tơ̆ phương Phú Yên, hơnih đei khul duk rôp yâu ka ngừ đak dơsĭ bơ̆jang găh lơ tơ̆ tơring hơtăih hơtŏ. Ƀok Nguyễn Xuân Cảnh, Kơdră Anih vei lăng kon pơlei phương Phú Yên, tơbăt, tơdrong jang vei lăng khul duk đei bơ̆jang kiơ̆ hăm tơdrong jang hơdai đơ̆ng khul kơdră chĕp kơ̆l, linh vei lăng tơring sơlam, tơnŏk ka păng hơnih kơphô̆.

“Ƀơm truh tơdrong tang găn rôp yâu ka glăi IUU, nhôn hlôi athei dôm khŭl jang ƀơm truh jang hơdai kơjăp hăm Kơđông linh vei lăng tơring sơlam Đà Rằng kŭm nhen Tơnŏk ka vă bơ̆jang kiơ̆ ‘lơ̆ng tơdrong jang ‘nâu; hơdai hăm ‘noh jang hơdai hăm hơnih kơphô̆ vei lăng kơjăp khŭl duk kŭm nhen dôm bơngai huơ̆r duk mưh vang jang chă rôp yâu ka, rim năr athei kiơ̆ hơlen lăng, phĭn rup păng roi tơbăt kiơ̆ ƀlep tơdrong hơgăt”.

Kŭm hăm vei lăng, dêh char Đăk Lăk tŏk bŏk pơm lơ trong roi tơbăt vă dôm tơdrong hơgăt tang găn rôp yâu ka glăi IUU gơh truh hăm kon pơlei jang ka mĭnh trong kơtă păng hơnơ̆ng hloh. Tơ̆ phương Xuân Đài, kang ƀô̆ krao hơvn kon pơlei Kơđông linh vei lăng tơring sơlam Xuân Đài ưh khan lăp roi tơbăt lơ̆m dôm 'măng hop akŏm kon pơlei mă oei năm truh rim pơlei pơla, rim ŭnh hnam. Thượng úy Nguyễn Văn Liến, Phŏ Kơdră Khul krao hơvơn kon pơlei Kơđông linh vei lăng tơring sơlam Xuân Đài, tơbăt, mưh lơ duk ka brŏk tơ̆ kông, khul ƀô̆ đô̆i vei lăng tơring sơlam iŏk yua aloa pơre nơ̆r chă tơroi tơbăt hơdai hăm chă asong ăn hla ar tơ̆ dôm trong, hơnih kon pơlei oei, tơnŏk duk păng dôm hơnih kon pơlei jang ka hơnơ̆ng akŏm.

“Tơdrong jang “Aloa re đơ̆ng Linh vei lăng tơring sơlam teh đak" đơ̆ng rŏng kơ pơgơ̆r jang kiơ̆ hlôi hơnhăk đei lơ tơdrong đei yua. Hăm trong pơre nơ̆r yak vih vơ̆t tơ̆ rim jăl trong, hơnih kon pơlei oei păng tơnŏk duk, dôm tơdrong kơtơ̆ng ang găh tang găn rôp yâu ka glăi gô đei gơih truh kon pơlei, tơgŭm kon pơlei tơtom băt hơdăh."

Tơdrong kăl kơ lăng truh 'noh jĭ tơdrong roi tơbăt tang găn rôp yâu ka glăi IUU tŏk bŏk ƀrư̆ ƀrư̆ tơplih đơ̆ng tơdrong pơtho tơƀôh tơdrong hơgăt jing pơjing tơdrong joăt pơm kiơ̆ đơ̆ng kon pơlei jang ka. Dôm nơ̆r athei găh tơring rôp yâu ka, hla ar duk ka, bơngai huơ̆r duk, hla ar chih răk tơdrong jang, kơmăy vei lăng trong yak dăh mă roi tơbăt mưh mơ̆t lĕch tơ̆ tơnŏk đei tơƀlŏk hơnơ̆ng, pơklep kơtă hăm rim 'măng năm jang tơ̆ đak dơsĭ. Dang ei, kon pơlei jang ka tă kơ băt hơdăh păng pơm kiơ̆ tơpăt dôm tơdrong hơgăt lơ̆m tang găn rôp yâu ka glăi IUU.

“Nhôn tơ̆ âu hlôh băt tôm bơih, pơm kiơ̆ mă 'lơ̆ng đĕch. Chă rôp yâu athei trŏ tơring, năm tơ̆ đak dơsĭ athei đei tôm hla ar, bơngai tơ̆ thŏng nan athei chih măt, phĭn rup. Mưh brŏk 'nŏh athei roi tơbăt hloi”.

Jô̆ truh blŭng khei 9/2026, Đăk Lăk đei 2.593 tong duk đơ̆ng 6m tŏk tơ̆ kơpal, lơ̆m noh 689 tong duk đơ̆ng 15m tŏk tơ̆ kơpal; 100% tong duk ka hlôi đei chih tơmơ̆t lơ̆m kơsô̆ chih răk tơdrong jang ka kơ teh đak. Tơdrong vei lăng tong duk lĕch, mơ̆t tơ̆ tơnŏk duk, tơchă băt anih pơm tơlĕch ka hơdang păng pơvei hơdai VMS đei hơtŏk loi dơ̆ng. Lơ̆m khei 8 păng giĕng blŭng khei 9, dêh char ưh kơ đei ƀôh tơdrong pơm glăi kơtang găh rôp yâu ka glăi IUU.

Tơmơ̆t tơdrong hơgăt lơ̆m rim 'măng năm tơ̆ đak dơsĭ, rim duk păng jing tơdrong băt kơchăng kơdih đơ̆ng kon pơlei jang ka 'noh jĭ trong jang tơm vă Đăk Lăk hơdai hăm lơ̆m teh đak hrôih pleh "The jơk", lăng truh tơdrong jang ka kơjăp 'lơ̆ng, đei jang tơnăp.