Tơdrong jang “ Kơ trĭu dơnơm ‘long - Kơ yuơ mĭnh Việt Nam jơk ƀlĭk” tŏk bŏk đei 2 dêh char Đắk Lắk hăm Đắk Nông tơlĕch jang kơtang. Tơdrong jang đei tơlĕch jang vă tơgop jang keh đang Trong tơlĕch jang pơtăm 1 ti dơnơm ‘long đơ̆ng Khŭl kơdră tĕh đak.

Tơdrong jang Kơ trĭu dơnơm ‘long - Kơ yuơ mĭnh Việt Nam jơk ƀlĭk

Yak tăp dăr chă dăr lăng rim dơnơm ‘long ‘nao pơtăm tơ̆ groi tĕh tu đak Ia Lốp, apŭng Ea Sup, dêh char Đắk Lắk, ƀok Nguyễn Văn Diện, Bơngai chĕp kơ̆l Khŭl vei lăng năng tông, tang găn ŭnh sa bri pơlei Thanh Niên lập nghiệp tơbăt, groi au ‘nao chă pơtăm mơjĭt rơbau dơnơm ‘long tơgiĕr păng xà cừ.“Tơlĕch pơrô̆ iung jang pơtăm ‘long bri ‘nŏh kơ dĭh nhôn jĭ dôm bơngai vei lăng bri păng jei jing dôm kon pơlei gô jang kiơ̆ atŭm hăm khŭl vei lăng păng rim hơnĭh bơ̆ jang vă hơmet pơ ‘lơ̆ng rim sơnăm gô tang găn kĕ ŭnh sa bri păng vei lăng năng tông ‘long blŭh vơ̆ jing ‘lơ̆ng hlŏh dơ̆ng”.

Tơlĕch jang tơdrong jang kơ Trĭu dơnơm ‘long-Kơ yuơ mĭnh Việt Nam jơk ƀlik, lơ̆m sơnăm au, hlôi đei 76.000 dơnơm ‘long đei pơtăm lơ̆m hlŏh 63ha tơ̆ groi tĕh tu đak apŭng Ea Sŭp, dêh char Đắk Lắk. ‘Long tơgiĕr păng xà cừ ‘nŏh dôm hơdrĕch ‘long đei ăn pơtăm kơ yuơ hăp kĕ krơ̆ng tŏ ‘mi kial chrĭh chrĕng tơ̆ tơring, kĕ bluh vơ̆ jing ‘lơ̆ng. Mŏ Trần Thị Thúy, Kơ iĕng Kơdră chĕp pơgơ̆r Đoàn apŭng Ea Sŭp tơbăt, bơ̆ jang pơtăm ‘long hlôi đei rim hơnĭh bơ̆ jang, kon pơlei lăng trŭh păng vang iung jang pơtăm, mă loi ‘nŏh khŭl đoàn hơdrŭh tơdăm:“Nhôn gô hơnơ̆ng pơrô̆ hơvơn hơdrŭh tơdăm păng kon pơlei vang jang kiơ̆ tơdrong au. Mĭnh ‘nu mĭnh sơnăm pơtăm đei 1 dơnơm ‘long, pơm ăn yơ̆p ‘long hơyơ̆l ăn kơ tĕh roi năr roi să hlŏh dơ̆ng. Lăp đơ̆ng rŏng pơtăm nhôn hơnơ̆ng vei lăng vă ‘long blŭh vơ̆ jing ‘lơ̆ng, hơnhăk đei bri ‘long ƀlĭk ƀlăk ăn apŭng Ea Sup nhôn”.

Lơ khul vang iung jang pơtăm ‘long

Atŭm hăm Đắk Lắk, lơ̆m sơnăm 2022, Trung ương Đoàn jei tơlĕch jang pơtăm ‘nao 25.000 dơnơm ‘long lơ̆m hơgăt tĕh xă hlŏh 14ha tơ̆ tơring Quảng Sơn, apŭng Đắk Glong, dêh char Đắk Nông. Ƀok Vũ Đức Hưng, Kơdră chĕp pơgơ̆r Hơnĭh bơ̆ jang Kih thuơ̆t vei lăng năng tông bri găh Kŏng ty Mir đak lar Quảng Sơn, tơbăt.“Tơring pơtăm bri mă tơdrong jang kơ trĭu dơnơm ‘long-Kơ yuơ mĭnh Việt Nam jơk ƀlĭk pơtăm sơnăm au ‘nŏh jĭ tôch gĭt kăl lơ̆m bơ̆ jang tang găn ‘mi kial hơbŭt hơbông păng bri tu đak tơ̆ Đắk Nông. Công ty Mir đak lar Quảng Sơn iung jang hơdoi hăm kon pơlei tơ̆ au vei lăng bri lơ̆m khei năr kơnh vă pơjing đei hla bing, vei lăng tơdrong erĭh sa ăn kon pơlei oei tăp dăr au”.

Sơnăm 2022, hlôi pơtăm vă jê̆ 80ha bri tu đak

Đơ̆ng sơnăm 2021 trŭh dang ei, tơdrong jang Kơ trĭu dơnơm ‘long-Kơ yuơ mĭnh Việt Nam jơk ƀlĭk hlôi đei pơtăm tơ̆ groi tu đak lơ̆m 4 dêh char Quảng Nam, Quảng Ngãi, Đắk Lắk păng Đắk Nông. Trong tơm ‘noh vă trŭh sơnăm 2025 gô pơtăm ‘nao đei 100 trĭu dơnơm ‘long lơ̆m tĕh đak, vă tơgop lơ̆m jang kiơ̆ tơdrong vă jang Pơtăm 1 ti dơnơm ‘long đơ̆ng Khul kơdră Tĕh đak tơlĕch ăn. Kiơ̆ đơ̆ng ‘nhŏng Ngô Văn Cương, Bí thư Trung ương Đoàn, hăm trong pơgơ̆r lơ trong, trŏ lăp hăm tơring, tơdrong jang tơgop atŏk kơtang jơhngơ̆m đon hlô̆h vao kơ đoàn viên, hơdrŭh tơdăm păng kon pơlei găh hơnăp jang vei lăng bri, vei lăng tu đak, lăng trŭh atŏk tơ iung kơjăp ‘lơ̆ng.“Lơ̆m khei năr au ki ‘nŏh Trung ương đoàn jei hlôi iung jang hơdoi hăm lơ hơnĭh bơ̆ jang vă iung jang kiơ̆ trong tơlĕch jang au. Tơdrong jang hlôi hơvơn đoàn viên, hơdrŭh tơdăm lơ̆m tĕh đak vang iung jang. Mĭnh đoàn viên hơdrŭh tơdăm gô pơtăm ‘nao păng vei lăng tŏ sĕt hloh 1 dơnơm ‘long lơm 1 sơnăm. ‘Moi kiơ̆ tơdrong jang au nhôn ‘mĕh vă Việt Nam bơ̆n lơ̆m khei năr kơnh gô jơk ƀlĭk hlŏh dơ̆ng, ‘lơ̆ng liĕm hlŏh dơ̆ng păng kơjăp hlŏh dơ̆ng”.

Atŭm hăm Tơdrong jang “Kơ trĭu dơnơm ‘long-Kơ yuơ mĭnh Việt Nam jơk ƀlĭk” sơnăm au, Dơnŏ anĭh vei lăng kon pơlei dêh char Đắk Nông jei tơlĕch jang “Têt pơtăm ‘long ƀlŏk hơdơ̆r kơ Ƀok Hô”. Lơ̆m 3 triu dơnơm ‘long đei pơtăm ‘măng mă au, đei dang 1 trĭu dơnơm ‘long hơngo đei pơtăm ‘moi kiơ̆ rim jăl trong Glung 14 păng 28, tơ̆ rim tơring đe kŏh pơrăm bri, bơbĭt iŏk tĕh bri glăi. Ƀok Lê Quang Dần, Kơ iĕng Kơdră chĕp pơgơ̆r Dơnŏ anĭh vei lăng chŏh jang sa păng atŏk tơ iung tơring tơrang dêh char Dắk Nông tơbăt: bri ‘long tơmang lăng, bri vei rong  ‘moi kiơ̆ rim jăl Trong glung khei năr au ki răm kơ đe kŏh pơrăm kơtang, bơbĭt iŏk tĕh tôch kơtang. Tơ̆ hơnăp tơdrong au, dêh char tơchơ̆t pơtăm dơ̆ng ‘long bri tơ̆ rim groi tĕh au. Hơdrô̆ pơm lêh tơlĕch jang “Têt pơtăm ‘long ling lang ƀlŏk hơdơ̆r kơ Ƀok Hô” atŭm hăm đoàn viên, hơdrŭh tơdăm, kang ƀô̆ bơngai bơ̆ jang tĕh đak, dêh char Đắk Nông hlôi chă hơvơn hlŏh 3.250 ‘nu kang ƀô̆, ƀô̆ đô̆i, kŏng ang vang chă pơtăm ‘long tơ̆ rim groi tĕh đe kŏh pơrăm bri ‘moi kiơ̆ Trong glung 14 păng 28, hăm trong iung jang “iŏk tơgoăt mĭnh ƀơ̆r đon vă tang găn tơdrong phă pơrăm”:“Kăl đei jơhngơ̆m đon ‘lơ̆ng, ‘nŏh iŏk tơgoăt tơgoăl vă tơ jră tang găn. Nhôn kơrŭn đĭ jơhngơ̆m ‘mĕh vă iung jang kiơ̆. ‘Măng mă au, Dơnŏ anĭh vei lăng kon pơlei dêh char hlôi chă hơvơn lơ khŭl jang chă pơtăm tơ̆ rim groi tĕh au, vă tơƀô̆h jơhngơ̆m iung jang kơtang lơ̆m vei lăng năng tông, hơmet pơ ‘lơng groi tĕh bri tơ̆ ƀar Trong glung au.”

Dêh char Đắk Nông hrei au oei pă 260.000ha bri, yơ̆p hơyơ̆l ăn kơ tĕh dang 38%, iĕ hlŏh 4% pơtêng hăm jô̆ hơtŏ lơ̆m tĕh đak. Dêh char tŏk bŏk hơdrin atŏk yơ̆p bri ‘long tŏk trŭh 40% lơ̆m sơnăm 2025 păng 42% lơ̆m sơnăm 2030./.