VOV4.Bahnar - Kơ sơ̆ ‘năr 6/5, Anih vei lăng kon pơ lei dêh char Dak Lak pơ gơ̆r hop akŏm tơ roi tơ băt hăm khŭl chih kơ tơ̆ng ang khei 4/2022, tơ roi găh tơ drong mŭk drăm - tơ pôl lơ̆m khei 4 păng tơl tơ roi tơ drong rim anih jang chih kơ tơ̆ng ang chih tơ roi, đei tơ pôl bơ ngơ̆t truh. Ƀơm truh tơ drong dăr hơ len, băt hơ dăh pơm glăi lơ̆m răt tơ mam hơ len lăng SARS-CoV-2 đơ̆ng Anih vei lăng tơ drong jĭ jăn dêh char Dak Lak, Đại tá Nguyễn Văn Quy, Kơ dră Anih jang tơ gŭm, Kŏng an dêh char Dak Lak tơ băt: Tơ drong ‘nâu ƀơm truh răt tơ mam hơ len lăng SARS-CoV-2 đơ̆ng kŏng ti kơ măy kơ mŏk Việt Á đei ƀôh lơ̆m teh đak lơ̆m khei ‘năr âu ki.

Anih vei lăng tơ drong jĭ jăn dêh char Dak Lak

Truh dang ei, Anih jang kanh sat dăr hơ len, Kŏng an dêh char Dak Lak hlôi băt hơ dăh Anih vei lăng tơ drong jĭ jăn dêh char hlôi răt hloh 63.000 tơ mam hơ len lăng, hăm akŏp kơ jă hloh 10 ti hlak jên. Kiơ̆ đơ̆ng dăr hơ len, băt hơ dăh, chih iŏk, anih jang kơ pal hlôi băt hơ dăh đei tơ drong đei ƀôh pơm glăi khôi luơ̆t. Ƀơm truh tơ drong ‘nao tơ roi, Anih dăr hơ len kơ dêh char Dak Lak kŭm tŏk bŏk dăr hơ len tơ drong răt tơ mam drăm kơ măy kơ mŏk pơ gang, tơ mam hơ len lăng, vaccine păng pơ gang tang găn COVID-19 lơ̆m dêh char.

Thuem: Tơ blơ̆