VOV4.Bahnar - ‘Măng thi tốt nghiệp THPT sơ năm 2022 vă truh bơih, jĭ covid-19 oei tôch hơ mơt, dôm hnam trưng THPT tơ̆ dêh char Dak Lak oei tơ lĕch lơ trong pơ tho vă gơ̆h pơ tho hŏk kĕh tơ drong hŏk pơ hrăm lơ̆m sơ năm hŏk. Mă loi jĭ pơ tho ăn hŏk tro hơ tuch jăl hŏk vă hơ met ăn ‘măng thi tốt nghiệp păng thi mât hŏk đăi hŏk, cao đẳng truh âu kơnh.

Mĭnh sơ năm hŏk tôch gĭt kăl hăm lơ ‘măng athei tơ plih trong pơ tho hŏk pơ hrăm, ƀât lăp năm hŏk kơ tă tơ̆ hnam trưng, ƀât lăp athei hŏk trư̆k tuyê̆n hlôi ƀơm ưh ‘lơ̆ng truh tơ drong hŏk pơ hrăm, jơ hngâm đon kơ đe ŏh hŏk tro, mă loi hăm hŏk tro lăm 12. Vă đe ŏh sơ đơ̆ng jơ hngâm, hnam trưng THPT Nguyễn Bỉnh Khiêm, apŭng Krông Pach, dêh char Dak Lak tơ lĕch lơ trong pơ tho hŏk ‘moi kiơ̆ tơ drong jĭ. Lơ̆m nŏh, hnam trưng hơ tŏk đon tơ năp đơ̆ng đe thây kô mưh năm pơ tho.

Kô Nguyễn Thị Thuý, pơ tho môn Hoá, hnam trưng THPT Nguyễn Bỉnh Khiêm ăn tơ băt: “ Adrin đŏk hơ len lơ̆m mang, chă hŏk iŏk đơ̆ng bôl boăl thây kô tơ̆ dôm hnam trưng nai vă gơ̆h pơ tho ‘lơ̆ng lơ̆m jơ hŏk păng pơ tho dôm tơ drong kăl hlŏh. Đơ̆ng rŏng kơ ‘nŏh, kiơ̆ đơ̆ng jơ hngâm đon đe thây kô chă pơ lung đe ŏh adrin hŏk pơ hrăm, nhen hơ păh điêm, dăh mă lơm jơ hŏk đei hloi jơ ăn đe ŏh pơm ngôi vă da ƀiơ̆ hăl păng chơ găm hŏk, vă dôm ‘măng thi truh đe ŏh đei điêm ‘lơ̆ng ƀiơ̆”.

Jơ hŏk kơ tă tơ̆ hnam trưng THPT Nguyến Bỉnh Khiêm, apŭng Krông Pach, dêh char Dak Lak

Hăm hŏk tro lăm 12 Hnam trưng THPT Lê Hữu Trác, apŭng Cư Mgar, mă đơ̆ng khei ‘năr pơ dơ̆h hŏk vă tang găn jĭ COVID-19 tôch đunh, mă lei đon jang tơ năp, băt trong tơ plih ‘nao đơ̆ng thây kô hlôi tơ gŭm ăn đe ŏh sơ đơ̆ng jơ hngâm ƀiơ̆. Oh Hoàng Thị Minh Châu, hŏk tro lăm 12A1, ăn tơ băt: “Đe thây kô păng hnam trưng pơ jing tơ drong ‘lơ̆ng ăn đe ŏh hŏk tro nhôn, nhen hơ nơ̆ng apinh jet găh tơ drong hŏk pơ hrăm păng tang găn jĭ. Đe thây kô rim môn păng thây kô vei lăng lăm hŏk 'măn lơ jơ năr tơ̆ 'ngoăih jơ hŏk vă tơl tơ blang dôm tơ drong mă nhôn apinh, kơ na ưh đei tơ drong kiơ mơ mat tat mơ̆n”.

Lơ̆m dêh char Dak Lak đei 59 hnam trưng THPT, lơ̆m nŏh đei 48 hnam trưng asong ăn hŏk tro lăm 12 năm hŏk kơ tă tơ̆ hnam trưng. Dôm hnam trưng oei đei dơ̆ng pơ tho hŏk kiơ̆ trong trư̆k tuyê̆n, mă lơ ‘nŏh jĭ hŏk tro tơ̆ plt Buôn Ma Thuột păng apŭng Krông Buk. Ƀok Phạm Đăng Khoa, Kơ dră Anih vei lăng pơ tho pơ hrăm dêh char Dak Lak ăn tơ băt, lăng kiơ̆ tơ drong jĭ tơ̆ tơ ring, dôm hnam trưng tơ lĕch lơ trong pơ tho hŏk pơ hrăm, pơm ‘lơ̆ng ăn tơ drong hŏk pơ hrăm, vei lăng ‘lơ̆ng jơ hngâm pran ăn kăn ƀô̆, thây kô, bơ ngai jang păng hŏk tro hai. Hơ drô̆ hăm hŏk tro lăm 12, dôm hnam trưng tơ chĕng hơ len tơ drong hŏk pơ hrăm đơ̆ng hŏk tro vă đei trong pơ tho thêm ăn đe ŏh, akŏm jơ ôn dôm môn vă thi tốt nghiệp.

Ƀok Phạm Đăng Khoa pơ ma: “Nhôn hlôi pơ tho ăn dôm hnam THPT chih tơ lĕch đê thi pơ long năng hăm dôm tơ mât hăm đê đơ̆ng Anih vei lăng pơ tho pơ hrăm dêh char vă pơ gơ̆r thi pơ long năng, hơ len năng tơ drong pơ tho pơ hrăm tơ̆ dôm hnam trưng. Atŭm hăm ‘nŏh kiơ̆ đơ̆ng điêm thi pơ long năng âu vă pơ gơ̆r ôn ƀai ăn đe ŏh, pơm ‘lơ̆ng ăn đe ŏh hlôh vao kơ jăp, vang thi 'lơ̆ng 'măng thi tốt nghiệp truh âu kơnh".

Hương Lý: Chih

Dơ̆ng: Tơ blơ̆