VOV4.Bahnar - Lơ̆m ‘măng iung tơ jră tang găn jĭ hơbuh Covid-19 tơ̆ Dak Lăk, atŭm hăm tơdrong hơdrin đơ̆ng khŭl ƀok thây pơgang oei đei ƀô̆h tơdrong tơgop gĭt kăl đơ̆ng rim bơngai vang năm iung jang kơ bơngai kon khop. Prăt 4 khei au ki, đe sư hlôi ƀô̆h kang bang kơ̆k tơ̆ Hnam pơgang Pơ gia păng hơnĭh ming hơmet ăn bơngai jĭ Covid -19 jĭ ăl tơ̆ Hnam pơgang tơm tơring Tây Nguyên vă tơgŭm djru ăn rim ƀok thây pơgang hơlêm jơhngơ̆m, vei lăng năng tông rim bơngai F0 yak hlŏh jĭ hơbŭh.

Rim sơ nữ vương Hòa Bình năm jang tơgŭm djru bơngai jĭ Covid -19

Chă pơvih pơvăn ăn rim bơngai jĭ Covid-19 tơ hơnĭh ming hơmet jĭ ăl tơ̆ Hnam pơgang tơm tơring Tây Nguyên ‘nŏh jing tơdrong jang rim năr kơ khŭl năm iung jang đơ̆ng Khŭl Sơ nữ vương Hòa Bình, pơlei tơm Buôn Ma Thuột, dêh char Dak Lăk lơ̆m prăt 4 khei au ki. Sơ Nguyễn Thị Thanh Huyền tơbăt, atŭm hăm tơdrong vei lăng năng tông sŏng sa, tơgŭm ăn bơngai jĭ chă vei lăng akau kơ dĭh ..., rim sơ năm jang tơ̆ au jei chă hơlêm jơhngơ̆m đon vă bơngai jĭ dă ƀiơ̆ sơ ‘ngon au to: “Lăng ƀô̆h tơdrong au jĭ tôch kăl, jei hiôk lơ̆m jơhngơ̆m, mă đơ̆ng hrŭk hơbĕn ao bơ̆ng jĭ ư̆h kơ hiôk ră, mă lei ƀô̆h bơ̆n jang đei tơdrong hơ iă yă kiơ ‘nŏh ăn bơngai jĭ lei bơ̆n jei hiôk chơt. Đe sư mơ̆t tơ̆ au đe sư tôch sơ ‘ngon, đe sư tơchĕng trŭh tơdrong đe sư lôch mĭnh ‘nu mĭnh drô̆ tơ̆ au, mă lei đei bơ̆n oei tơ jê̆, chă pơma hơlêm, vei lăng năng tông đe sư tơnăp ‘nŏh pơm ăn kơ đe sư jei pă gan chă tơtăm tơdrong au to bơih kơ yuơ ƀô̆h oei đei bơngai lăng ba đe sư kơ jăp. Rim sơ bơ̆ jang, vei lăng năng tông bơngai jĭ nhen lĕ vei lăng năng tông ăn ŭnh hnam kơ dĭh đĕch.”

Găh hăm Sơ Lê Thị Thịnh, dôm năr bơ̆ jang tơ̆ hơnĭh ming hơmet jĭ ăn bơngai jĭ Covid-19 hlôi tơgŭm ăn rim bơngai năm jang ƀô̆h hơdăh tơdrong jĭ jăn, ơ̆h sơ ‘ngon kơ bơngai jĭ. Tơdrong hơnhăk đei tơdrong chơt hơ iă, hiôk chơt lơ̆m jơhngơ̆m ăn dôm bơngai tŏk bŏk roi năr roi mơ hoal hăm tơdrong jĭ jăn ‘nŏh jing tơdrong gĭt kăl hlŏh hăm dôm bơngai năm jang.“Tôch gĭt kăl, kơ yuơ ba ƀô̆h ba đei tơgŭm tŏ sĕt ăn lơ bơngai mơmat tat păng đe sư kăl ‘mĕh vă đei bơngai lăng ba. Bơ̆n tơchĕng ‘nau jĭ dôm bơngai ‘nhŏng ŏh bơ̆n, đe sư đei tơdrong mơmat tat ‘nŏh bơ̆n hơdrin vang chă tơgŭm djru đĭ jơhngơ̆m đon bơ̆n gơ̆h jang.”

Hơlêm jơhngơ̆m đon ăn bơngai jĭ

Atŭm hăm dôm tơdrong hơdrin ming hơmet đĭ jơhngơ̆m đon đơ̆ng khŭl ƀok thây pơgang, tơdrong tơgŭm djru phăl hơlăng đơ̆ng rim bơngai năm jang tơgŭm djru hlôi tơgŭm ăn bơngai jĭ Covid-19 păng ŭnh hnam bơngai jĭ chhơp lơ̆m jơhngơ̆m ƀiơ̆. Ƀok Nguyễn Xuân Tưởng, oei tơ̆ tơring Ea Nam, apŭng Ea Hleo tơbăt, 10 năr vei lăng ƀă jĭ, ƀô̆h hơdăh dôm tơdrong jang đĭ jơhngơ̆m đon đơ̆ng rim sơ, pơm ăn kơ ƀok măh chhưu lơ̆m jơhngơ̆m. Rim sơ jang tơgŭm ăn rim ŭnh hnam bơngai jĭ, đĭ jơhngơ̆m đon vei lăng năng tông, hơlêm jơhngơ̆m đon ăn đe sư:“Tơ̆ au đei sơ jang vei lăng năng tông akau jăn ăn bơngai jĭ tôch tơnăp, bơngai jĭ ayơ jei đei đe sơ vei lăng năng tông tơnăp lei lăi dih băl ngăl.”

Kiơ̆ đơ̆ng Ƀak si Nguyễn Văn Tính, Bơ̆ jang ming hơmet jĭ ăl tơbăt, tơdrong tơguưm djru đơ̆ng rim bơngai năm jang tơgŭm ‘nŏh tôch gĭt kăl, tơgŭm ăn hnam pơgang bơ̆ jang rơhơi ƀiơ̆. Rim bơngai năm jang tơgŭm hlôi păng tŏk bŏk jang tơnăp, tơgŭm tŏ sĕt dôm tơdrong jang ăn rim ƀok thây pơgang lơ̆m tơdrong jang tang găn jĭ hơbŭh Covid-19, tơgŭm ăn hơnĭh jang pơgang jang ‘lơ̆ng hlŏh dơ̆ng bơ̆ jang ming hơmet. Ƀak si Nguyễn Văn Tính akhan, ‘ngoăih ming hơmet hăm pơgang, ‘nŏh ming hơmet hăm jơhngơ̆m đon ‘mêm mơnat ‘nŏh jĭ tôch gĭt kăl hăm rim bơngai jĭ Covid-19.“Pơm ăn bơ̆ jang dă ƀiơ̆ trăp trĭn tơpă mơ̆n. Mă blŭng rim sơ vei lăng năng tông bơngai jĭ đơ̆ng tơdrong sŏng sa trŭh tơdrong chă pơvĭh pơvăn akau jăn ăn bơngai jĭ, đơ̆ng nŏh hơlêm jơhngơ̆m đon ăn bơngai jĭ. Găh tơdrong pơm sơđơ̆ng jơhngơ̆m đon ăn bơngai jĭ ‘nŏh jĭ tôch kăl, đe lăng tivi ƀô̆h lơ bơngai lôch tôch kơ lơ ‘nŏh đe sư jei tơchĕng trŭh ư̆h kơ băt dang lơ tơdrong lôch trŭh tơ̆ bơ̆n kơna đe sư tôch kơ hli, đei rim sơ chă hơlêm jei pơm ăn đe sư chơ̆n jơhngơ̆m ƀiơ̆.”

            Lơ̆m jơ ‘năr yak hlŏh tơdrong jĭ jăn kơ bơngai tơpŏh jĭ Covid-19 tơ̆ Hnam pơgang tơm Tơring Tây Nguyên, ‘ngoăih rim đe ƀok thây pơgang, oei đei jơhngơ̆m đon lăng ba, ‘mêm kơ eng đơ̆ng rim yă giĕng. Jơhngơ̆m đon ‘mêm kơ eng ‘nŏh hlôi pơm ăn đei tơdrong ‘lơ̆ng hơ iă hăm lơ bơngai jĭ Covid-19.

Hơdrol kơ ‘nŏh, mư̆h tơdrong jĭ hơbŭh Covid-19 oei pơrăm kơtang păng tôch hli hlơt, dôm bơngai lui khop tơ̆ Dak Lăk jei đei pơgơ̆r lơ tơdrong jang ‘mêm mơnat. Mục sư Lemous Philemol, Kơdră chĕp pơgơ̆r Dơnŏ anĭh tang măt lui Tin Lành dêh char Dak Lak tơbăt: ‘ngoăih dôm tơmam drăm tơgum ăn rim kon pơlei tơring jĭ hơbŭh, Dơnŏ anĭh tang măt Lui Tin Lành dêh char Dak Lak jei hlôi pôk tơmam drăm ăn Dơnŏ anĭh bơ̆ jang pơgang Tơpôl Khŭl Lui Tin Lành Việt Nam Miền Nam ăn rim ŭnh hnam kon pơlei lui đei bơngai jĭ F0, F1 vă jê̆ 400 trĭu hlak jên. Dơnŏ anĭh tang măt hơnơ̆ng chă pơtho khan ăn rim Khul lui Tin lành lơ̆m dêh char pơm kiơ̆ kơ jăp nơ̆r pơkă 5K đơ̆ng Dơnŏ anĭh tơm vei lăng jang pơgang păng rim trong jang tang găn jĭ hơbŭh. Adoi pơjing khŭl “Ƀak si Luca” pơtho tơbăt vei lăng năng tông jơhngơ̆m jăn kiơ̆ online ăn dôm bơngai ư̆h kơ pŭn au tơpŏh hê̆ jĭ hơbŭh Covid-19.

Ƀai chĭh đơ̆ng VOV Tây Nguyên

Tơblơ̆ nơ̆r: Amazưt