Lơ̆m lăm xă hloh 30 met vuông tơ̆ thôn Phước Hòa 1, xăh Ea Kuang, apŭng Krông Pach, dêh char Đăk Lăk, pơhlom jê̆ mơjĭt pơmai oh tơ oei bơ̆ um pơrŏ đơ̆ng hla bar thôp. Đơ̆ng tơpang hơbĕch hơbal đơ̆ng đe pơmai oh, dôm hlak hla bar iĕ lơ pơnĭk đei pơjing đơ̆ng tơmam thôp iĕ đei chô̆ mô-tơ mini, pơtoi kơ noh đei thôp jing um păng pơklep ăh kơpal, tơmam drăm phara băl vă pơm tơlĕch tơmam pơjing đei. Tơdrong kơchơ̆p hla bar thôp (nơ̆r Anh krao noh Quiling) ‘măn pơjing tơmam pơrŏ, pơm tơmam tơƀlŏk, đơ̆ng dôm tơmam yua ƀônh ƀŏ nhen mŏk tơkhuă truh tơ̆ thiê̆p chih, um kơtol tơ̆ chơnĕng hnam dăh mă ‘măn pơrŏ nai. Tơdrong jang ngêh dăh ƀônh ƀŏ mă lei kăl đei tơdrong kơchăng, hơbĕch đơ̆ng tơpang ti bơngai pơjing um. Pơmai Nguyễn Thị Bích Thuận, hnam tơ̆ xăh Ea Phê, apŭng Krông Pach, hlôi bơ̆ jang tơ̆ âu hloh 2 xơnăm ăn tơbăt: Mă blŭng noh tơnap kơ pơhrrăm, lăng atŭm minh năr noh bơ̆ ưh kơ keh minh pôm thiê̆p, mă lei pơhrrăm dar deh noh juăt jăi. Mă âu noh ba athei đei tơdrong pơjing kơdih dơ̆ng. Hăm bơngai jang noh pơmai Mùi duh pơtho tơnăp mă lei tơdrong âu kăp gĭt noh ba athei hơbĕch hơbal hloh.

Anih jang mŭk drăm bơ̆ um hla bar thôp hlôi tơgŭm axong tơdrong jang ăn lơ pơmai oh tơ̆ tơring.

Bơngai kơtă pơtho noh pơmai Lê Thị Mùi, tơ ‘ngla anih jang tĕch pơdro um hla bar thôp. Lơ̆m jê̆ 5 xơnăm kơ âu, pơmai Mùi hlôi kơtă pơtho tơdrong jang ăn jê̆ 30 ‘nu drăkăn đei tơdrong erih tơnap tap tơ̆ xăh Ea Kuang păng dôm xăh tơjê̆. Lơ̆m noh đei 3 pơmai noh hơven hơvo păng minh pơmai athei hơmet jĭ plei lĕn hloh 10 xơnăm kơ âu bơih. Đe pơmai gơh năm truh jang kơtă tơ̆ anih jang dăh mă iŏk tơmam vih pơjing tơ̆ hnam, hăm jên jang đei yua đơ̆ng 2 truh 5 trĭu hlj minh khei. Pơmai Mó May, tơ̆ thôn Tân Lập, xăh Ea Kuang, apŭng Krông Pach tơroi, tơdrong jang ưh đei hrat ôh, gơh chă jang ăh jơ rơvơn, axong kơ ‘năr trŏ hăm tơdrong erih tŏk bŏk oei rong kon iĕ kơ pơmai: Inh oei tơ̆ hnam noh duh ưh đei jang lĕch jên noh inh truh tơ̆ âu jang chă jên hơtŏk iŏk yua ăn unh hnam. Atăm inh đei kon iĕ noh tơdrong jang âu adoi da ƀiơ̆ mơ̆n.

Pơmai Lê Thị Mùi ăh anih pơdăh tơmam pơjing đơ̆ng hla bar thôp

Pơmai Lê Thị Mùi ăn tơbăt, đơ̆ng xơnăm 2018, pơmai băt truh păng tơklep hăm tơdrong bơ̆ um đơ̆ng hla bar thôp. Đei Jơnŭm jang drăkăn xăh Ea Kuang ăn tŏk iŏk 20 trĭu hlj, atŭm hăm jên tŏk iŏk 50 trĭu hlj đơ̆ng anih mong jên tơgŭm tơpôl, pơmai pơtơm iung jang tơdrong pơkăp jang tĕch pơdro. Xơnăm 2020, hăm tơdrong yak hadoi đơ̆ng dôm jăl jang Jơnŭm drăkăn dêh char Đăk Lăk, pơmai Mùi khĭn vang akŏm tơdrong pơlong iung pơm jang kơ dêh char păng đei iŏk hơpăh jơnei mă 2, đei tơdrong tơgŭm găh jên vă pơtoi pơm jang nhen pơkăp hăm tơdrong bơ̆ um pơrŏ đơ̆ng hla bar thôp. Truh xơnăm 2021, tơdrong iung pơm jang hăm tơdrong bơ̆ um pơrŏ đơ̆ng hla bar thôp kơ pơmai pơtoi đei akŏm truh chŭng kêt tơdrong pơlong Drăkăn iung pơm jang hăm tơdrong jang bơ̆ um hla bar thôp kơ jâ̆p teh đak ‘măng mă 4 păng đei iŏk hơpăh hơlêm jơhngơ̆m. Dôm tơdrong đei jơnei âu jing jơhngơ̆m pran tơgŭm pơmai đei jên, akŏm tơdrong hlôh vao păng gơh chă tơbang tơmam drăm po pơm tơlĕch vă pơih xăh tơring tĕch tơlĕch, chă anih tơgŭm jang. Pơmai Lê Thị Mùi ăn tơbăt: Dang ei đei 30 bơngai jang, hơtŏk tơ̆ Đăk Lăk minh anih jang tơ̆ Kon Tum, minh anih tơ̆ Gia Lai. Pơkăp truh âu kơnh noh inh pơtoi iŏk đơn chih măt răt tơmam drăm hăm um pơkăp kơdih kơ tơring păng um ai joh ayŏ kơ hơdrung bơngai kon kông Việt Nam vă tơbang tơroi ăn bôl boăl lơ̆m păng ‘nguaih kơ teh đak băt truh, mă kăl noh tơdrong jang tơmang pơhiơ̆ păng gô pơih xă păng pơtho pơm jang ăn dôm tơring tơjê̆.

Tơmam  drăm pơm tơlĕch đơ̆ng hla bar thôp

Dang ei, rim khei anih jang kơ pơmai Mùi pơm tơlĕch pơhlom 5.000 tơmam drăm lơ kơloăi, đơ̆ng dôm um thiê̆p ƀônh ƀŏ đei kơjă tĕch dôm rơbâu hlj, truh dôm kơloăi um tih hăm kơjă kơ trĭu hlj. Dôm tơmam drăm kơyươ anih jang pơm tơlĕch đei pơtruh tơ̆ minh ƀar siu thĭ, anih tĕch tơmam lơ̆m păng ‘nguaih kơ dêh char. Atŭm hăm noh, pơmai Mùi oei iŏk pơm tơlĕch tơmam drăm pơrŏ ăn dôm kŏng ti tih pran.

Lơ um rŭp đei bơ̆ đơ̆ng hla bar thôp

Yă H'Yer Knul, Kơdră Jơnŭm jang Drăkăn apŭng Krông Pach xơkơ̆t: Tơdrong iung pơm jang bơ̆ um pơrŏ đơ̆ng hla bar thôp kơ pơlei Lê Thị Mùi noh ƀenh kơ đon bơnôh tơnăp, axong tơdrong jang păng đei jên khei ăn lơ pơmai oh, hăm dôm bơngai hơven hơvo tơ̆ tơring. Jơnŭm jang hlôi pơtruh nơ̆r hăm Anih vei lăng kon pơlei apŭng vă dar deh pơjing, tơgŭm anih jang vă pơih xă tơdrong jang âu, mă kăl noh tơgŭm găh tĕch tơlĕch tơmam drăm pơjing đei. Yă H'Yer Knul xơkơ̆t: Mă lơ̆m khei năr tơnap tap mă lei hăm tơdrong nhan duh nhen tơdrong dăp đon dăp bơnôh vă tơgŭm hăm dôm bơngai tơnap tap noh pơmai Lê Thị Mùi hăt hot păng kơchăng hăm rim tơdrong jang khŏm mă đei. Găh tơdrong jang âu đei Anih jang Kơpal kơ apŭng hmach bơnê păng tơrĕk tơgŭm păng truh âu kơnh pơgơ̆r Jơnŭm jang drăkăn dăh đei trong jang, tơgŭm trong pơm jang ăn tơdrong pơkăp jang âu. Nhôn tơrĕk păng hơtŏk, mă kăl noh nhôn pơih xă vă tơdrong jang gơh pơlan xă hloh.

Hăm xơkơ̆t pơih xă tơring tĕch tơlĕch, tơdrong tơm tơrĕk truh tơmam tơmang pơhiơ̆ păng tĕch ăn teh đak đe. Pơmai Lê Thị Mùi tŏk bŏk pơjing lơ um rŭp tơmam drăm pơrŏ đơ̆ng hla bar thôp. Atŭm hăm noh hơtŏk tơbang tơmam drăm, rơih khul jang tĕch pơdro, vanga kŏm tĕch răt trư̆k twê̆n păng tĕch tơlĕch kiơ̆ pơkăp điê̆n tưh. Hơyak năm âu gô tơgŭm ăn anih jang dar deh xơkơ̆t hơnăn tơmam drăm păng akŏm đei tơring tĕch răt xă hloh, đơ̆ng noh tơgŭm ăn đe pơmai oh hơtŏk iŏk yua, xơđơ̆ng tơdrong erih roi năr roi tơnăp hloh.