VOV4.Bahnar - Đơ̆ng blŭng sơ năm truh dang ei, lơ̆m dêh char Dak Lak đei 666 ‘nu drŏ kăn oei hơ năp jĭ COVID-19, lơ̆m nŏh đei 3 ‘nu bơ ngai oei hơ năp lôch. Drŏ kăn oei hơ năp lơ̆m khei ‘năr vă rơ nĕh hmă đĭ đei lơ tơ drong krê bơih, drŏ kăn hơ năp đei jĭ COVID-19 roi krê hơ mơt hlŏh dơ̆ng.

Ƀich tơ̆ anih gô rơ nĕh hăm che gom păng môk kơ mĭl găn đak hai tơ prăh, pơ tŏ plei nuih nge tơ tĕh hăm kơ măy, đunh đunh mŏ Nguyễn Thị Bích Thủy, tơ̆ apŭng Ea H’leo, dêh char Dak Lak tuĕnh klak tôch jĭ. Mŏ Thủy tơ roi, klo kăn măr sư ưh jăh đei kon, oei băl 15 sơ năm ‘mơ̆h ‘nao hơ năp. Ưh ê, lăp adrol kơ rơ nĕh 3 năr, mŏ Thủy băt kơ dih kâu jĭ COVID-19. Hơ năp blŭng a ƀât đĭ 42 sơ năm bơih, đei jĭ COVID -19 dơ̆ng kơ na mŏ Thủy tôch pơ ngơ̆t: “Dôm năr âu ki mŭh nhen vă chĭl ƀiơ̆, ngĕh ngăi hơ nơ̆k hmă đĕch bu ê jĭ COVID, pơ ngơ̆t dêh, yoa ƀak si khan tơ dăh rơ nĕh ưh gơ̆h ‘nŏh ƀât kơ sơ̆ ‘nâu dang 6 truh 8h kơnh răih, hơ pơi ‘mĕh rơ nĕh hmă liĕm kâu ‘lơ̆ng đĕch.”

Mŏ Thủy tơ̆ lơ̆m anih gô rơ nĕh

Kŭm tơ̆ hnam pơ gang mơ̆n, yă Nguyễn Thị Kiều Trinh tơ̆ apŭng Cư M’gar, dêh char Dak Lak tơ roi, đơ̆ng rŏng 3 năr jĭ COVID -19, mŏ mai yă vă rơ nĕh kơ na unh hnam hăt hot chơ năm tơ̆ hnam pơ gang. Tôch pŭn gơ nơm đei unh hnam pơ ngơ̆t păng đe ƀak si khăm hơ lĕch tôch pơ nĕh kơ na sư rơ nĕh kĕh ‘lơ̆ng: “Năm tơ̆ âu kŭm pŭn tơ ƀâp đe ƀak si. Đơ̆ng pơ gê hei gơ nơm đe sư ngăl, inh ưh gơ̆h tơ ƀâp mŏ mai, dang ei inh ‘nao mât lăng; ƀôh sâu bơih tôch hơ iă. Dang ei pôm băt bơ nê kơ đe ƀak si đĕch, ưh băt pơ ma kiơ bơih, mĕ kon măr sư liĕm kon ngăl.”

Kiơ̆ kơ sô̆ chih jô̆ đơ̆ng Anih vei lăng jang pơ gang dêh char Dak Lak, jô̆ đơ̆ng 'năr 01/01/2022 truh 'năr 17/3/2022, lơ̆m dêh char đei 666 'nu drŏ kăn hơ năp jĭ COVID-19, lơ̆m nŏh đei 3 'nu bơ ngai lôch. Hnam pơ gang Đa khoa tơ ring Tây Nguyên hlôi tơ plih tơ drong iŏk yoa Hnam E jing anih hơ met ăn drŏ kăn hơ năp jĭ COVID-19 vă khăm hơ len tôm tơ drong ăn nge hăm bơ ngai mĕ 'lơ̆ng hlŏh, vă gơ̆h tơ tom hơ met tơ dăh đei tơ drong krê. Dang ei tơ̆ anih âu oei hơ met păng vei lăng hlŏh 20 'nu drŏ kăn hơ năp oei gô rơ nĕh păng 'nao rơ nĕh đang.

Adrol kơ ‘nŏh, lơ̆m sơ năm 2021, ƀât mă jĭ Covid-19 oei tơ pŏh tôch hơ mơt, Hnam pơ gang Đa khoa tơ ring Tây Nguyên hiŏng iŏk nge rơ nĕh sơ đơ̆ng ‘lơ̆ng ăn 4 ‘nu bơ ngai mĕ đei jĭ COVID-19. Lơ̆m nŏh đei 1 ‘nu tôch krê hơ mơt, đe ƀak si hlôi răih iŏk nge vă dŏng mĕ sư. ‘Nŏh jĭ bơ ngai hơ năp rơ nĕh sơ năm 1992, oei tơ̆ plei Sinh A, xăh Ea Drông, thĭ xăh Buôn Hồ (dêh char Dak Lak). Đơ̆ng rŏng băt jĭ COVID-19, oei hơ năp lơ̆m giĕng mă 33, bơ ngai mĕ đei chơ hơ met tơ̆ hnam pơ gang Lao păng jĭ tơ sŏh dêh char. Yoa jĭ roi ăl, dui jơ hngâm ưh kĕ kơ na đei chơ năm tơ met tơ̆ anih hơ met jĭ COVID-19 kơ Hnam pơ gang Đa khoa tơ ring Tây Nguyên. Tơ̆ âu, bơ ngai jĭ đei ăn dui jơ hngâm hăm kơ măy, tang găn pham kuăl, corticoide, tơ huch thim kơ chơ̆t bek ‘lơ̆ng. Mă lei bơ ngai jĭ nhen roi ăl, dui jơ hngâm mơ mat kơ na Hnam pơ gang khăm hơ len rơih trong răih iŏk nge vă dŏng bơ ngai mĕ.

Yă Trinh sơng mŏ mai sư ‘nao rơ nĕh vih tơ̆ anih hơ met jĭ COVID-19

Kiơ̆ ƀak si Chuyên khoa II Trần Ngọc Thắng, Phŏ Kơ dră Khoa rơ nĕh Hnam pơ gang Đa khoa tơ ring Tây Nguyên, mưh jĭ COVID-19, bơ ngai oei hơ năp tôch hơ mơt yoa jĭ ƀônh ăl ƀiơ̆ kơ bơ ngai hmă, đe drŏ kăn đa đei kơ sư̆k tơ jră hăm jĭ jur. Yoa athei rong 1 ‘nu nge lơ̆m klak kơ na tơ drong kăl đei ô xy đơ̆ng drŏ kăn hơ năp lơ ƀiơ̆ kơ bơ ngai hmă. Tơ dăh jĭ COVID-19, tơ sŏh drŏ kăn hơ năp đei virus phă, tơ drong ‘nâu ƀơm kơ nê̆ tôch dêh truh jơ hngâm pran kơ bơ ngai mĕ oei hơ năp păng nge lơ̆m klak, ƀât lăp tôch krê pơm lôch răm ăn pơ đĭ mĕ kon hloi:

“Virus COVID hăp phă trong dui jơ hngâm ‘nŏh tơm, oei trong dui jơ hngâm sư ƀơm truh tơ̆ tơ drong arih kơ đe drŏ kăn oei hơ năp, yoa thoi nŏh mưh ƀôh sư krê truh tơ drong arih nhôn athei hơ met hloi. Hơ met tơ̆ âu mă 1 ‘nŏh athei adrin vei lăng tơ drong arih ăn bơ ngai mĕ, đơ̆ng rŏng kơ ‘nŏh tơ chĕng truh tơ̆ nge. Đunh kơ âu 2 năr đei 1 ‘nu drŏ kăn hơ năp đơ̆ng 33-34 giĕng, mă lei sư dui jơ hngâm nhen ưh kơ kĕ ‘nŏh nhôn athei răih iŏk nge vă hơ met dŏng bơ ngai mĕ.”

Mĭnh ‘măng rơ nĕh ‘nŏh jĭ 1 ‘măng tơ ƀâp tơ drong krê lôch răm. Tơ drong krê roi dêh hlŏh dơ̆ng mưh drŏ kăn hơ năp ưh pŭn đei jĭ COVID -19. Yoa thoi nŏh, vă vei lăng ‘lơ̆ng jơ hngâm pran ăn bơ ngai mĕ păng nge kŭm nhen veh ver dôm tơ drong krê lơ̆m khei ‘năr oei hơ năp, dôm bơ ngai oei hơ năp jĭ COVID-19 athei khăm hơ len jơ hngâm pran mă kơ jăp, mưh ƀôh đei tơ drong kiơ hlich ‘nŏh jăh năm tơ̆ hnam pơ gang roi hrôih roi ‘lơ̆ng.

Nam Trang: Chih

Dơ̆ng: Tơ blơ̆