Tơ̆ hop akŏm, rim bơngai tang măt hlôi pơma đam păng drơ̆ng nơ̆r dôm hla bar chih gah trong pơm jang, asong tơdrong jang hơdah ăn rim bơngai jang păng pơjing 4 Jơnŭm jang, vă vei sơđơ̆ng ăn tơdrong pơgơ̆r jang đei jơnei lơ̆m tơdrong hơmet pôk rơih. Yă Cao Thị Hòa An, Kơdră Anih jang pôk rơih dêh char Đăk Lăk ră hơdah, tơdrong hơmet 'mi kial đak hơbông pơrăm oei lang lap. Mă lei, tơdrong jang athei jang hơmet ăn pôk rơih adoi lơ mơ̆n, tơrĕk truh lơ hơnih jang păng lơ tơring. Kơyuơ noh, hăm khei năr oei pă 3 khei, rim jăl jang, rim anih jang athei akŏm kơchăng jang atŭm kơjăp, tơlĕch jang trŏ pơkăp đơ̆ng khôi luơ̆t.   

Kơsơ̆ năr 26/11, Hơnih bơ̆ jang pôk rơih dêh char Gia Lai hlôi pơgơ̆r ‘măng hop akŏm mă blŭng. Hop akom ou hlôi pơma dơnuh, pơdrơ̆ng nơ̆r trong vă pơjing rim hla bơar tơchơ̆t kơ Hơnih bơ̆ jang pôk rơih dêh char, tơbăt ăn pơjao tơdrong jang ăn 37 ‘nu kơdră; ăn tơgop nơ̆r găh măt bơngai, trong proh hơmet ăn khul bơ̆ jang rim hơnih jang iĕ lơ̆m Hơnih chĕp pơgơ̆r pôk rơih dêh char; trong pơprŏ jang găh tơlĕch jang bơ̆ jang pôk rơih kơdră tang măt Kuô̆k hô̆i jăl XVI păng Kơdră tang măt Jơnŭm vei lăng kon pơlei jăl jang 2026-2031 lơ̆m dêh char Gia Lai.