Tơ̆ tơring sơlam kơ dêh char Đắk Lăk, Phó Thủ tướng Mai Văn Chính hlôi tơlĕch nơ̆r athei man Hnam trưng teh đak rong jăl 1 păng jăl 2 Ia Rvê. Tơdrong jang vă man lơ̆m hơgăt teh xă hlŏh 5 hec ta, hăm kơsô̆ jên hlŏh 185 ti.

Xăh Ia Rvê jĭ tơring tơtil hăm teh đak Campuchia, tơdrong arih xa kơ kon pơlei oei tôch pơmat tat. Trong năm hŏk đơ̆ng đe hŏk tro tơ̆ tơring sơlam oei hơtăih, lăm hŏk oei pơm pơgia ngôi đĕch. Kơlih thoi noh, đe oh jĭ bơngai hơiă hlŏh mưh hnam trưng hŏk oei xa tơ̆ lăm hŏk đei tơlĕch man. Oh Lang Thị Yến Vy, hŏk tro lăm 7, Hnam trưng jăl 2 Nguyễn Thị Định, tơroi: “Mưh băt hnam trưng đei man ‘nao, oh ƀôh tôch kơ hơiă, hơpơi ‘mĕh jăh đei hnam trưng ‘nao vă hŏk pơhrăm ‘lơ̆ng ƀiơ̆.”

Oei ƀok Vi Xuân Thủy, tơ̆ xăh Ia Rvê, ăn tơbăt, kon pơlei tôch hơiă păng hơđơ̆ng jơhngâm hăm tơdrong hŏk pơhrăm đơ̆ng kon hơ ‘lơ̆p mưh đei hnam trưng teh đak rong kơjăp ‘lơ̆ng: “Đĭ đăng mĕ ƀă hŏk tro păng mih ma duch nă lơ̆m xăh tôch hơiă. Nhôn bơnê kơ teh đak pơngơ̆t, man ăn hnam trưng ‘nao vă kon mon gơ̆h đei tơdrong ‘lơ̆ng, hŏk pơhrăm roi gơ̆h ƀiơ̆. Đei hnam trưng kơjăp ‘lơ̆ng, bơngai pơm mĕ ƀă nhen nhôn kŭm hơđơ̆ng jơhngâm ƀiơ̆ mưh gơih kon năm hŏk tơ̆ hnam trưng.”

Kŭm hăm hnam trưng tơ̆ xăh Ia Rvê, lơ̆m ‘măng mă âu dêh char Đắk Lắk oei tơlĕch man 2 hnam trưng teh đak rong nai ‘nŏh: Hnam trưng teh đak rong xăh Ia Lốp đei jên man truh 105 ti, Hnam trưng teh đak rong xăh Buôn Đôn đei jên man hlŏh 158 ti.

Tơ̆ Gia Lai, Phó Thủ tướng Hồ Quốc Dũng truh pơm lêh tơlĕch man Hnam trưng teh đak rong jăl 1 păng jăl 2 tơ̆ 7 xăh sơlam đei: Ia Mơr, Ia Púch, Ia Pnôn, Ia Nan, Ia Dom, Ia Chia păng Ia O, hăm kơsô̆ jên tơmât jang hlŏh 1.500 ti. Dôm hnam trưng âu gô pơm anih hŏk sơđơ̆ng ‘lơ̆ng ăn hlŏh 7000 ‘nu hŏk tro tơ̆ tơring sơlam Gia Lai, mă lơ ‘nŏh hŏk tro bơngai kon kông.

Pơma tơ̆ lêh tơlĕch jang, Phó Thủ tướng Hồ Quốc Dũng pơma hơdăh: tơdrong jang ‘nâu tôch gĭt kăl hăm tơring sơlam, tơgŭm atŏk tơiung khul bơngai jang, hơmet kơjăp tơdrong pơvei mât 1 ƀơ̆r đon păng vei kơjăp ‘lơ̆ng tơdrong sơđơ̆ng teh đak: “’Ngoăih kơ tơdrong tơgŭm ‘nŏh khul kơdră tơring, thây kô, mĕ ƀă athei pơlung kon mon năm hŏk mă tôm. Đe kon mon sơđơ̆ng jơhngâm hŏk tơ̆ Hnam trưng ‘nao ưh đei bu hŭt hŏk. ‘Nŏh kŭm jing đon pơhnŏng đơ̆ng Anih Chinh trĭ lơ̆m Nơ̆r chih tơbăt kơsô̆ 81, vang tơgop pơjing khul bơngai jang tơ̆ tơring sơlam teh đak. Đe kon mon ning mônh kơnh hŏk đang vih dơ̆ng tơ̆ pơlei, vei kơjăp tơring sơlam, vei lăng ‘lơ̆ng tơdrong sơđơ̆ng teh đak”.

Mơ̆ng nơ̆r pơtho đơ̆ng Phó Thủ tướng, Phó Bí thư Đảng dêh char, Kơdră vei lăng kon pơlei dêh char Gia Lai Phạm Anh Tuấn pơkăp vă bơ̆ jang tơdrong jang ‘nâu hăm đon jang chinh trĭ tôch pơneh, bơ̆ jang mă pran ‘lơ̆ng, đei yoa. Dêh char oei vă iŏk tôm thây kô pơtho, man hơmet lăm hŏk, răt tôm tơmam yoa kăl, khŏm jang đang tơdỏng jang ‘nâu trŏ khei ‘năr hơgăt: “Kơdră chĕp kơ̆l dôm anih jang đei ƀơm truh năng ‘nâu jĭ tơdrong jang gĭt kăl, athei tơlĕch jang kiơ̆ trong: Hrĕnh, kơjăp, đei yoa; hơmet tôm khul thây kô, tơmam, kơmăy kơmŏk kăl nhen bơ̆n trong, đak rơgoh, unh điên, kơmăy roi tơbăt … jăh chih pơkeh trong pơgơ̆r, tơdrong tơgŭm hăm thây kô, hŏk tro, vă dôm hnam trưng gơ̆h đei tơmât yoa đơ̆ng blŭng sơnăm hŏk 2026-2027”.