VOV4.Bahnar - Kơ sơ̆ 28/8, 1 ‘nu kơ dră chĕp kơ̆l xăh Ea Tul, apŭng Cư M’gar (Dak Lak) tơ roi, tơ̆ xăh ‘nao đei tơ drong glơ̆k tơ̆ đak tôch mơ nat, pơm ăn 2 ‘nu ‘nhŏng ŏh kơ mar lôch. Bre mon lôch glơ̆k âu oei tơ̆ plei Yao, xăh Ea Tul, apŭng Cư M’gar, dêh char Dak Lak.

Dơ nâu đak plei Yao, anih đei tơ drong lôch glơ̆k tôch mơ nat

Ƀât 12h ‘năr dơ̆ng 28/8, mĕ ƀă 2 ‘nu mon Y’Đ păng Y’ L ưh ƀôh kon brŏk sŏng, kơ na năm chă. Mưh năm truh ƀât dơ nâu đak plei Yao, ‘nŏh ƀôh hơ băn ao păng chơ khŏ tơ̆ pơ nơ̆, tơ chĕng đei tơ drong bơih kơ na ôr ar bơ ngai nai vang tơ gŭm. Iŏk đei nơ̆r tơ roi, lơ kon pơ lei păng khul jang kơ pal tơ̆ tơ ring truh tơ gŭm, vang tơ chă.

Đơ̆ng rŏng dang 45 pơ nĭt, đe chă ƀôh hơ kâu 2 ‘nu mon lơ̆m dơ nâu, đang kơ ‘nŏh tơ gŭm ăn unh hnam pơ gơ̆r pơ dong ƀŭ ăn ƀar 2 ‘mon ưh kơ pŭn âu. Đei băt, dơ nâu đak plei Yao mong đak vă tơ ruih ăn ‘long pơ tăm, ‘nhot, ƀum hơ ƀo kơ kon pơ lei lơ̆m tơ ring. Dơ nâu âu đei var jŭm dăr păng hơ tâp kơ ƀang chih chư, đak jrŭ tôch hơ mơt. Mă lei yoa ‘mĕh pơm ngôi tơ̆ đak, bre mon Y’Đ păng Y’L mât ôn, jur hum ngôi kơ na jing đei tơ drong ơ̆h sơ ‘ngon âu.

Dơ̆ng: Tơ blơ̆