VOV4.Bahnar - Trong pơdăr tĕch tơmam drăm pơdrĕo dơ̆ng jên, mĭnh trong hơlĕnh pơdăr hlôi đei ƀô̆h lơ tơ̆r im tơring pơm ăn lơ bơngai hiong răm kon jên păng hlôi đei hơnĭh chĭh kơtơ̆ng ang chă pơkă kơchăng kơtang. Mă lei trong pơdăr au ‘nao đei ƀô̆h dơ̆ng tơ̆ pơlei tơm Buôn Ma Thuột, dêh char Dak Lăk.

Mŏ H'Nghiêm Niê tơroi găh tơdrong răm đe pơdăr hiong 5 trĭu hlak jên

Chĕp tơ̆ ti mĭnh tŏ gŏ khiĕr hoei kơđom hăm kơ jă 650.000 hlak jên, mă lei ‘nao chă pai sa mĭnh ‘măng ‘nŏh tơklŏh pơ đĭ hơkar ư̆h kơ đom, yă H’Lý Niê, oei tơ̆ buôn Êrang, phương Khánh Xuân, pơlei tơm Buôn Ma Thuột, dêh char Dak Lăk hơ luê̆: “ba pŭh đe pơdăr bơih”. Blŭng giĕng au, đei mĭnh ƀar ‘nu tơmoi mơ̆t lơ̆m pơlei chă ăn hla bơar chĭh tơbăt tơmam drăm pai sa atŭm hăm nơ̆r chă pơkăp tôch hiep kơ đon ‘nŏh akhan gô pơdreo dơ̆ng kon jên. Vang năm, yă răt hloi 3 tŏ gŏ ‘nŏh gŏ pai hoei kơđom, gŏ pai sĭn klĭ păng gŏ pai ‘nhĕm lẩu, mă lei tim mă tom “pơlong năng” tơmam drăm au đĭ hiong 5 trĭu hlak jên:“Mă blŭng đe hăp akhan gŏ au tơ̆ siêu thĭ ư̆h kơ đei, găh kơ jă tơ̆ au ‘nŏh 4 trĭu 100.000 hlak jên. Đơ̆ng nŏh ƀok ‘nŏh akhan, 4 trĭu 100.000 hlak jên bơngai bu ‘mĕh răt ưh, tơdăh răt ‘nŏh jên hoei kơ hiong, pă ƀiơ̆ kơnh pơdreo hloi. Đơ̆ng nŏh trŭh tơ̆ gŏ khiĕr 650.000 hlak jên. Ư̆h kơ đei chă tơchĕng trŭh tơdrong đe chă hơlĕnh dăh mă lơ liơ. Mư̆h răt đang ba jei ư̆h kơ lăng hơlen gŏ au lơ liơ, tim mă tom pơdrĕo ‘nŏh đe hăp kơdau klĕnh hloi, ƀơ̆t dŏh mă băt đe hăp hơlĕnh pơdăr.”

Mơjĭt ‘nu kon pơlei Buôn Êrang tơtok kơ yuơpŭh ƀơm đe pơdăr

Jei bơngai răm tơ̆ ‘măng pơgơ̆r tech mơdro tơmam drăm lơ̆m mĭnh hnam et sa tơ̆ phương Khánh Xuân ƀơ̆t pơgê năr 4/10, mŏ H’Nghiêm Niê, oei lơ̆m buôn Êrang tơroi, tơdrong pơgơ̆r au lăp ăn hơdrô̆ đe drŏ kăn, bơngai drŏ nglo ư̆h kơ gơ̆h mơ̆t. ‘Măng mă blŭng mŏ răt bơ̆n đak măm, đak ôp pơnhan, xơƀơ̆ng pĭh hơbĕn ao dang mĭnh ƀar hrĕng rơbau păng jei đei pơdreo ăn jên dơ̆ng. Trŭh vă soăn dơ̆ng, dôm bơngai au tơroi tơbăt gô tĕch mơdro tơmam drăm măt ƀiơ̆ păng jei pơdreo jên ăn bơngai răt dơ̆ng. Mŏ H’Nghiêm hăt hot brŏk tơ̆ pơlei tok iŏk jên đe 5 trĭu hlak jên vă răt tơmam drăm, đơ̆ng nŏh dôm bơngai au hăt hot hao gre ôtô kơdau klĕnh hloi:“Kon pơlei nhôn gô hơngol mă lei ƀô̆h ƀăi đe hăp pơdreo jên đơ̆ng yơ, đơ̆ng nŏh dôm bơngai tĕch jei kơdŭn tơ̆ rŏng, kơdau klĕnh pơđĭ. Đe hăp chă hơvơ̆h dôm ‘nu bơngai kơ chu dăh mă kiơ bek tơplêng tơplan gak ƀơ̆t ‘măng jang Hnam et sa Thu Hương, đơ̆ng nŏh iŏk pơ đĭ tơmam drăm kơdau klĕnh hloi, pơdreo jên đơ̆ng yơ đei đăi.”

Gŏ khiĕr ư̆h kơđom mĭnh ‘măng pai sa đĭ hư răm

Ƀok Y Hiệp Niê, Thôn trơng Buôn Êrang, phương Khánh Xuân tơbăt, dôm tơmam drăm mă kon pơlei răt ‘nŏh jĭ tơmam drăm ư̆h kơ ‘lơ̆ng, ư̆h kơbăt hơnĭh pơm tơlĕch:“Kŏng ty, hơnĭh tĕch mơdro au hơlĕnh pơdăr kon pơlei. ‘Nau jei jing tơdrong pơm tơbrar ăn kon pơlei tơ̆ au. Jei hơpơi ‘mĕh vă rim hơnĭh bơ̆ jang, kŏng ang xek tơlang tơdrong au mă kĕ.”

         Ƀok Nguyễn Đình Chung, Kơdră chĕp pơgơ̆r Dơnŏ anĭh vei lăng kon pơlei phương Khánh Xuân, Pơlei tơm Buôn Ma Thuột tơbăt, kơtơ̆ng kon pơlei tơroi ‘nŏh khul kang ƀô̆ năm tơ̆ hơnĭh đe hăp pơgơ̆r tĕch mơdro hloi mă lei đe hăp đĭ kơdau klĕnh bơih. Kiơ̆ hơlen ‘măng blŭng, tơdrong pơgơ̆r au đei dang 500 ‘nu bơngai găh phương Khánh Xuân păng rim tơring Hoà Xuân, Hoà Khánh, Hoà Phú vang năm. Bơngai chă răt tŏ sĕt hloh ‘nŏh 650.000 hlak jên, găh bơngai răt lơ hloh ‘noh vă jê̆ 9 trĭu hlak jên.

        Khŭl tĕch mơdro đei 2 ‘nu drŏ kăn, 8 ‘nu drŏ nglo, hao gre kơsô̆ 60B-04422 păng gre ôtô 16 tŏ tang dŏ kơsô̆ 60B-52809. Hơdrol kơ ‘noh, dôm bơngai au tơroi akhan đe hăp ‘nŏh bơngai tang măt ăn Kong ty ISHIBA, năm trŭh tơ̆ hơnĭh kơdrơ̆m bơngai nhen kơchơ, tơ̆ ‘măng jang hnam trương ... chă ăn hla bơar tơbăt tơmam drăm, hla bơar hơvơn vang năm ‘măng pơgơ̆r iŏk yua pơlong năng tơmam drăm. Ƀok Chung sơkơ̆t hơdăh, tơdrong pơgơ̆r au ư̆h kơ đei chă apĭnh khul Kơdră chĕp pơgơ̆r tơring:“Tơdrong au pơm glăi tơpă mơ̆n, kơ yuơ tech mơdro tơmam drăm ‘nŏh kiơ̆ trong pơgơ̆r kơ jăp, ư̆h khan lăp chă tơroi tơbăt tơmam drăm đơ̆ng nŏh tech hloi tơmam drăm ôh. Trŭh hloi đơ̆ng rŏng bơ̆ jang ‘nŏh Hnam et sa jei măh kơdrăt, mư̆h khŭl tĕch mơdro năm tơ̆ hơnĭh au mơng hơnĭh vă tĕch tơmam drăm ‘nŏh sư jei ư̆h kơ băt đe hăp tĕch mơdro tơmam drăm yă kiơ păng hơlĕnh pơdăr kon pơlei lơ lau. Dang ei, păh phương tŏk bŏk pơrô̆ athei rim hơnĭh bơ̆ jang, lơm au hơnĭh jang tơm ‘nŏh Kŏng ang năm dăr lăng hơlen, pơm hơdăh tơdrong au, ư̆h kơ lê̆ kon pơlei răm kơ đe hơlĕnh pơdăr lơ lau ôh.”

         Kơhrĕng ‘nu kon pơlei oei tơ̆ pơlei tơm Buôn ma Thuột, dêh char Dak Lăk put đe chă pơhlŭ pơdôr vang năm mĭnh ‘măng pơgơ̆r iŏk yua pơlong năng tơmam drăm mă tơpă ‘nŏh minh trong hơlĕnh pơdăr tĕch tơmam drăm. Trong pơdăr au ư̆h khan lăp ‘nao dai mă lei jei ƀô̆h hơdăh trong bơ̆ jang tim mă tơnăp lơ̆m vei lăng năng tông mơdro sa păng sơđơ̆ng kơ tơring, mư̆h tơdrong pơgơr au đei pơgơ̆r kơtang, akŏm lơ bơngai, mă lei ư̆h kơ ƀô̆h, ưh kơ tang găn tơtom.

Công Bắc/VOV Tây Nguyên/Amazưt tơblơ̆ nơ̆r