VOV4.Bahnar - Tơ drong jang Tơ gŭm pơ yan pơ long sơ năm ‘nâu tơ̆ dêh char Dak Lak hlôi sơng đei hloh 1.000 ‘nu bơ ngai jang tơ gŭm ‘noh sinh viên dôm hnam trưng đại học cao đẳng păng hŏk tro dôm hnam trưng hŏk trung cấp păng THPT lơ̆m dêh char chih măt vang jang. ‘Nâu jĭ khŭl jang gô tơ gŭm đe hŏk tro vang pơ long ‘măng pơ long tốt nghiệp THPT vă pơ gơ̆r lơ̆m ‘năr 7 păng 8/7 truh.

Đei hloh 1000 ‘nu bơ ngai vang jang tơ gŭm pơ yan pơ long tơ̆ Dak Lak sơ năm ‘nâu

Tơ̆ rim hơ nih pơ long, gô đei dôm khŭl jang pha ra băl nhen: krao hơ vơn kon jên, tơ mam sa, đak nhă păng hŏk ƀŏng tơ gŭm đe hŏk tro đei tơ drong arih sa mơ mat tat; tơ gŭm hŏk tro păng bơ ngai ŭnh hnam hŏk tro lơ̆m jơ năr pơ long; pơ tho nơ năm vih vơ̆t sơ đơ̆ng ‘lơ̆ng, vei sơ đơ̆ng tơ̆ hơ nih pơ long, tơ gŭm tơ drong jang vei lăng tơ drong tơ̆ dôm hơ nih pơ long. Khŭl Sinh viên dêh char Dak Lak tơ băt, kŭm hăm lăng kăl tơ gŭm đe hŏk tro đei tơ drong arih sa mơ mat tat, mơ ti, tơ ring hơ tăih hơ tŏ, sơ năm ‘nâu, tơ drong jang tơ gŭm pơ yan pơ long gô bơ ngơ̆t truh dôm bơ ngai ŭnh hnam hŏk tro, mă loi ‘noh dôm bơ ngai mơ mat tat kăl kơ đei tơ gŭm.

Thuem: Tơ blơ̆