VOV4.Bahnar - Anih chă tơ roi tơ drong jang kơ dêh char Dak Lka ăn tơ băt, jĭ Covid-19 đei tang găn hlôi pơm hơ tŏk tơ drong ‘lơ̆ng mưh chă tơ drong jang tơ̆ dêh char. 9 khei âu ki, anih âu hlôi chă roi tơ băt tơ drong jang ăn vă jê̆ 6.500 ‘nu bơ ngai. Kơ sô̆ bơ ngai chă đei tơ drong jang đơ̆ng rŏng đei roi tơ băt ‘nŏh 2.166 ‘nu, iŏk đei 90% nơ̆r hơ găt lơ̆m sơ năm. Lơ̆m kơ sô̆ hlŏh 2.100 ‘nu bơ ngai chă đei tơ drong jang, đei 1.282 ‘nu bơ ngai jang kơ tă lơ̆m dêh char, 799 ‘nu bơ ngai năm jang tơ̆ dêh char nai păng 85 ‘nu bơ ngai năm jang tơ̆ tĕh đak đe.

Lơ bơ ngai năm chă tơ drong jang lơ̆m Năr pơ gơ̆r chă tơ drong jang

Kiơ̆ ƀok Nguyễn Văn Cường, Phŏ Kơ dră Anih chă roi tơ băt tơ drong jang kơ dêh char Dak Lak, lơ̆m jăl khei mă IV/2022, Anih vă roi tơ ƀôh tơ drong jang ăn hlŏh 2.600 ‘nu bơ ngai; chă tơ drong jang ăn dang 1.200 ‘nu. Vă jang đei tơ drong ‘nâu, kŭm hăm hơ tŏk tơ drong roi tơ băt anih oei chă bơ ngai jang kiơ̆ đơ̆ng website păng mang tơ pôl, Anih chă tơ roi tơ drong jang oei vă hơ tŏk tơ drong pơ gơ̆r roi tơ băt tơ drong jang kơ tă tơ̆ tơ ring hai.

VOV Tây Nguyên - Dơ̆ng tơ blơ̆