VOV4.Bahnar - Hop akŏm bơ ngai tang măt ‘măng mă 8, jăl jang 2022-2027 kơ Jơ nŭm ‘long pơ glang ƀrê dêh char Dak Lak pơ gơ̆r lơ̆m 2 năr 20-21/6. Tơ drong jơ nei ‘lơ̆ng hlŏh đơ̆ng Jơ nŭm ‘long pơ glang ƀrê jăl jang âu ki ‘nŏh jĭ mong akŏm đei hlŏh 408 ti hlak jên ăn dôm tơ drong jang dŏng tơ gŭm tơ̆ tơ ring, tŏk vă jê̆ 2 ‘măng pơ têng hăm jăl jang adrol ki.

Trung ương Jơ nŭm ‘long pơ glang ƀrê Việt Nam hơ păh Mê đai “Yoa tơ drong jang tơ gŭm dŏng” ăn 5 ‘nu bơ ngai tơ̆ Dak Lak

Lơ̆m 5 sơ năm âu ki, Jơ nŭm ‘long pơ glang ƀrê dêh char Dak Lak tơ gŭm hrĕnh ăn hlŏh 868 rơ bâu ‘nu bơ ngai, hăm kơ sô̆ jên vă jê̆ 342 ti, kiơ̆ đơ̆ng dôm tơ drong jang nhen "Têt yoa bơ ngai tơ nuh păng bơ ngai răm đơ̆ng pơ gang dioxin", tơ drong jang "Tơ gŭm rơ mo", Tơ drong jang "Tưk tơ iung đon hơ pơi ‘mĕh".

Tơ̆ hơ năp kơnh, rim jơ nŭm ‘long pơ glang ƀrê tơ̆ Dak Lak vă hơ nơ̆ng tơ lĕch jang ‘lơ̆ng tơ drong Krao hơ vơn “Rim khul grŭp, rim bơ ngai tơ klep hăm 1 anih tơ gŭm”; vei lăng păng atŏk tơ iung tơ drong jang Tơ gŭm rơ mo, tơ gŭm ăn dôm unh hnam tơ nuh jang tŏk; dôm tơ drong jang “Têt yoa bơ ngai tơ nuh păng bơ ngai răm đơ̆ng pơ gang Dioxin”, “Khei jang tơ gŭm dŏng”, “Hnam gŏ ‘mêm mơ nat” “Por sŏng kơ pal tơ năr”, vei lăng jơ hngâm pran ăn kon pơ lei.

Dơ̆ng: Tơ blơ̆