VOV4.Bahnar - Ƀlep ƀơ̆t Têt Nguyên đán Nhâm Dần 2022, Anih vei lăng kon pơ lei dêh char Dak Lak hlôi tơ lĕch ‘măn hloh 49 ti 5 hrĕng triệu hlak jên năm ngôi, asong tơ mam ăn rim bơ ngai, grŭp tơ pôl, tŏk vă jê̆ 7 ti hlak jên pơ têng hăm sơ năm sơ̆. Kiơ̆ kơ ‘noh, kơ sô̆ jên asong ăn rim bơ ngai atŭm ‘noh  300.000 hlak jên 1 ‘nu; kơ sô̆ jên asong ăn bơ ngai teh đak tơ gŭm, bơ ngai đei kŏng ‘noh 400.000 hlak jên 1 ‘nu; kơ sô̆ jên asong ăn tang măt ŭnh hnam dom bơ ngai teh đak tơ gŭm đei kŏng hơ gei ‘noh 500.000 hlak jên 1 ‘nu; kơ sô̆ jên asong ăn dôm bơ ngai tŏk bŏk sa jên tơ gŭm rim khei ‘noh 1.300.000 hlak jên 1 ‘nu.

Kơ dră chĕp kơ̆l dêh char Dak lak pơ jao tơ mam ăn kon pơ lei xăh Bông Krang, apŭng Lắk

Kŭm hăm ‘noh, Anih vei lăng kon pơ lei dêh char asong tơ mam Têt kơ sô̆ jên đơ̆ng 2.500.000 hlak jên - 6.500.000 hlak jên ăn 407 anih jang ‘noh: Anih jang Khŭl linh, Kŏng an, ƀô̆ đô̆i vei lăng tơ ring sơ lam, rim anih jang kon pơ lei, anih jang hành chính lơ̆m dêh char păng 1,2 anih jang ‘ngoăih dêh char.

Thuem: Tơ blơ̆