VOV4.Bahnar – Vă hơ met ăn sơ năm hŏk ‘nao 2022 -2023, lơ mĕ ƀă hŏk tro păng đe ŏh hŏk tro tơ̆ Dak Lak oei tơ chă răt hla ar hŏk, mă loi jĭ hla ar hŏk lăm 3, 7, 10. Lơ mĕ ƀă hŏk tro pơ ngơ̆t hơ mơt ưh kơ măh hla ar hŏk, ‘nâu jĭ sơ năm mă blŭng tơ lĕch Trong pơ tho hŏk pơ hrăm phổ thông ‘nao.

Sơ năm ‘nâu, ƀok Đỗ Hùng Thuần, Phường Tân An, plt Buôn Ma Thuột ưh đei năm răt hla ar hŏk ăn kon mă athei gơ nơm bơ ngai nai. Ƀok Thuần ăn tơ băt: sơ năm ‘nâu jang kiơ̆ trong hơ met ming plơ̆ng, kơ sơ̆p hla ar hŏk hrei ‘nâu đei 3 ƀô̆ hla ar đei dôm anih tĕch hla ar hơ nhăk tĕch ‘nŏh đei Cánh diều, Chân trời sáng tạo păng Kết nối tri thức, păng hnam trưng mă kon kơ dih kâu kiơ̆ hŏk ‘nŏh athei răt iŏk hla ar đơ̆ng lơ anih tơm pha ra băl. Tơ drong ‘nâu pơm mơ mat tat ăn ƀok mưh chă răt hla ar hŏk: “Kiơ̆ đơ̆ng rim Hnam trưng pha ra băl mă đei lơ kơ sơ̆p hla ar pha ra băl, athei gơ nơm đe bơ ngai jang chă rơih, oei mĕ ƀă 'nŏh ưh kơ pă ‘lơ ‘lŏ, ưh băt vă rơih thoi yơ, răt thoi yơ vă gơ̆h tôm hla ar ăn kon hŏk”.

        Oei hăm đe hŏk tro nhen ŏh Phan Ngọc Hân, hŏk tro lăm 7A4, Hnam trưng THCS Nguyễn Tất Thành, apŭng Cư M’gar mă đơ̆ng hlôi đei Hnam trưng roi tơ băt hơ năn dôm kơ sơ̆p hla ar athei răt mă lei vă răt đei tôm hla ar, ŏh gơ nơm mĕ ƀă chơ năm tơ̆ Anih tĕch mơ dro hla ar tơ̆ plt Buôn Ma Thuột 'mơ̆i: “Ŏh truh đơ̆ng apŭng Cư M’gar, mưh năm tơ̆ âu, ưh kơ băt vă rơih răt hla ar kiơ, yoa athei răt kiơ̆ lơ kơ sơ̆p hla ar nhen Cánh diều, Chân trời sáng tạo păng Kết nối tri thức. Mă lei gơ nơm đei tơ drong tơ gŭm đơ̆ng hnam trưng ŏh hlôi rơih răt đei hla ar hŏk lăp ‘lơ̆ng”

Mĕ ƀă hŏk tro chă rơih hla ar hŏk ăn kon

Kiơ̆ tơ drong hơ găt 1360, ‘năr 16/6/2022 đơ̆ng Dơ nŏ anih vei lăng kon pơ lei dêh char Dak Lak găh tơ drong kĭ ăn hơ năn Hla ar hŏk lăm 3, lăm 7 păng lăm 10 vă iŏk yoa tơ̆ dôm anih hŏk pơ hrăm phổ thông đơ̆ng sơ năm hŏk 2022 – 2023 lơ̆m dêh char, hăm lăm 3 đei 21 kơ sơ̆p hla ar hŏk; lăm 7 đei 26 kơ sơ̆p; hơ drô̆ lăm 10 đei 44 kơ sơ̆ hla ar hŏk găh 3 grŭp hla ar hŏk đei Cánh diều, Chân trời sáng tạo păng Kết nối tri thức akŏm đĭ đăng đei 138 blăh hla ar hŏk, jô̆ hloi hla ar hŏk môn rơih kơ dih păng pơ gŏ athei hŏk.

Ƀok Trương Văn Băng, Kơ dră chĕp kơ̆l Công ty tĕch hla ar hŏk păng tơ mam pơ yoa ăn hŏk pơ hrăm Dak Lak ăn tơ băt: Vă pơm ‘lơ̆ng ăn tơ drong pơ truh hla ar ăn sơ năm hŏk 'nao, mă loi hăm dôm lăm hŏk đei iŏk yoa tơ drong pơ tho hŏk phổ thông 2018, Công ty tĕch hla ar – Tơ mam pơ yoa ăn hŏk pơ hrăm Dak Lak akŏm đĭ bơ ngai jang; răt dơ̆ng kơ ƀang ming hla ar; pơ gơ̆r pơ tâp ăn bơ ngai jang vă roi tơ ƀôh ăn đe mĕ ƀă hŏk tro, hŏk tro păng dôm anih tĕch hla ar chă rơih, răt iŏk păng tĕch hla ar hŏk mă lăp: “Rim hnam trưng, tơ̆ dôm apŭng, plt, thĭ xăh, dôm hnam trưng chă rơih hla ar hŏk ‘nŏh pha ra băl, ưh đei lei lăi, kơ na công ty kŭm tơ ƀâp lơ tơ drong mơ mat tat, mă lei công ty pơ kăp hăm Hnam kơ măy in kơ sơ̆p hla ar hŏk pơ hrăm Việt Nam ‘nŏh công ty vă pơ truh tôm hla ar hŏk, hla ar ƀai tâp ăn đe ŏh hŏk tro lơ̆m dêh char Dak Lak, ưh ăn đei tơ drong ưh măh hla ar hŏk tơ̆ rim tơ ring yơ lơ̆m sơ năm hŏk 2022-2023”.

Tơ drong hơ met hla ar hŏk ăn sơ năm hŏk ‘nao hơ nơ̆ng jing tơ drong đei mĕ ƀă hŏk tro păng đe hŏk tro tôch tơ tăm. Yoa thoi nŏh, vă tơ gŭm ăn tơ drong răt hla ar hŏk đơ̆ng đe ŏh gơ̆h răt trŏ kjơ sơ̆p hla ar đei hơ găt, Anih vei lăng pơ tho pơ hrăm Dak Lak đei hla ar chih athei dôm hnam trưng roi tơ băt tơ tom hơ năn hla ar hŏk vă hŏk lơ̆m sơ năm hŏk ‘nao. Atŭm hăm ‘nŏh tơ tă ăn mĕ ƀă hŏk tro, hŏk tro găh tơ drong đei “lơ bơ ngai” chă răt hla ar hŏk ƀât blŭng păng tŏk bŏk 8, vă huei gan pơ ngơ̆t, tơ tăm năm chă răt hla ar hŏk kơ plăh khei 'năr âu. Kŭm hăm 'nŏh, athei năm răt hla ar tơ̆ rim anih tĕch hla ar đei ư hơ nhang, vă huei răt ƀơm hla ar ya, ưh kơ 'lơ̆ng păng răt ưh trŏ hla ar kăl răt.

Anih vei lăng pơ tho pơ hrăm Dak Lak oei tơ lĕch hla ar pơ tho trong chă rơih răt hla ar hŏk ăn dôm lăm hŏk đei lăm 3, 7 păng 10 ăn sơ năm hŏk 2022-2023 kiơ̆ trong tơ plih ming hla ar hŏk phổ thông đơ̆ng Anih tơm vei lăng pơ tho pơ hrăm tơ lĕch. Kiơ̆ kơ ‘nŏh, Anih vei lăng pơ tho pơ hrăm Dak Lak athei rim anih, hnam trưng lơ̆m dêh char chih tơ lĕch trong răt hla ar hŏk kiơ̆ nơ̆r pơ tho đơ̆ng anih tơm vei lăng pơ tho pơ hrăm păng Dơ nŏ anih vei lăng kon pơ lei dêh char; Anih vei lăng kŭm tơ lĕch tôm hla ar pơ tho, tơ ƀôh găh tơ plih ‘nao tơ drong pơ tho hŏk phổ thông păng chă rơih Hla ar hŏk ăn rim kăn ƀô̆, thây kô, bơ ngai jang, hŏk tro păng mĕ ƀă hŏk tro. 

Adrol kơ ‘nŏh, vă pơ jing tơ drong ‘lơ̆ng ăn khul kăn ƀô̆ vei lăng, thây kô păng mĕ ƀă hŏk tro đei jơ năr chă hơ len năng, băt hơ dăh dôm kơ loăi hla ar hŏk yoa dôm Hnam kơ măy in kơ sơ̆p hla ar hŏk pơ truh, Anih vei lăng pơ tho pơ hrăm Dak Lak hlôi jang hơ doi pơ gơ̆r 2 ‘măng roi tơ băt Hla ar hŏk dôm lăm 3, 7 păng 10 kiơ̆ trong pơ gơ̆r trư̆k tuyê̆n đơ̆ng Anih vei lăng pơ tho pơ hrăm dêh char, dôm Hnam kơ măy in hla ar păng dôm hnam trưng tơ̆ dêh char.

Hương Lý: Chih

Dơ̆ng: Tơ blơ̆