VOV4.Bahnar - ‘Năr 18-10, Anih vei lăng kon pơ lei dêh char Dak Lak jang hơ dai hăm Anih vei lăng găh Mơ dro sa păng Kơ măy kơ mŏk Việt Nam (VCCI) pơ gơ̆r Hop akŏm hơ met ming ‘lơ̆ng hơ nih tơ mơ̆t jên jang tĕch mơ dro - pơ trŭt anih jang mơ dro sa lơ̆m dêh char hơ tŏk tơ iung. Tơ̆ Hop akŏm, dôm bơ ngai tang măt hlôi chă hơ len lăng găh kơ sô̆ hơ len lăng vei lăng tơ̆ anih jang păng tơ ring. Hơ dai hăm pơ ma dơ nuh găh dôm tơ drong hiôk, long nol hăm dêh char Dak Lak lơ̆m tơ drong hơ met ming ‘lơ̆ng hơ nih tĕch mơ dro.

Jơ hop akŏm

Kiơ̆ kơ dôm bơ ngai tang măt, dôm sơ năm âu ki Dak Lak hlôi đei lơ tơ plih lơ̆m tơ drong pơm tơ drong hiôk ăn kơ dôm anih jang mơ dro sa gơh yua dôm trong jang tơ gŭm găh teh; Đei hơ yak năm rơ đăh rơ đong lơ̆m kăt tơ jur jên ưh kơ tơ pă; Pơm tơ drong hơ tŏ băl lơ̆m hơ nih tĕch mơ dro; Trong jang tơ gŭm anih jang mơ dro sa dai hiôk ‘lơ̆ng. Mă lei, dôm bơ ngai tang măt kŭm akhan, hơ drin hơ met ming tơ̆ 1,2 tơ ring tam mă rơ đăh ‘lơ̆ng, oei vă pơ trŏ đĕch, tam mă tơ pă jang kiơ̆ hăm yan âu đơ̆ng anih jang mơ dro sa; Lơ hla ar bơ̆ jang mơ mat tat, hơ drom băl.

VOV Tây Nguyên/Thuem tơ blơ̆