VOV4.Bahnar - Athei jăh hơ met ming tơ drong hiơ̆ hyĭn lơ̆m tơ drong Tơ proh trong jang, trong iŏk yoa tĕh, ‘nâu jĭ nơ̆r athei đơ̆ng Khul dăr lăng kơ Jơ nŭm pơ gơ̆r Kon pơ lei dêh char Dak Lak tơ̆ jơ bơ̆ jang hăm Dơ nŏ anih vei lăng kon pơ lei dêh char găh tơ drong bơ̆ jang kiơ̆ trong jang, khôi luơ̆t tĕh đơ̆ng 2016 – 2021 pơ gơ̆r ‘năr 4/10.

Dôm apŭng roi tơ băt tơ drong chih pơ jing Trong tơ proh jang hăm Khul dăr lăng

Kiơ̆ nơ̆r tơ roi lơ̆m jơ bơ̆ jang, đơ̆ng 2016 - 2021, Dơ nŏ anih vei lăng kon pơ lei dêh char Dak Lak hlôi kĭ ăn tơ drong tơ prŏh trong iŏk yoa tĕh đơ̆ng 2021 - 2030 đơ̆ng 13/15 apŭng. Dang ei oei đei 2 apŭng tam mă kĭ ăn trong tơ proh jang, đei plt Buôn Ma Thuột păng apŭng Ea Súp. Găh trong vă iŏk yoa tĕh rim sơ năm đơ̆ng dôm apŭng, thĭ xăh, plt, truh dang ei Dơ nŏ anih vei lăng kon pơ lei dêh char ‘nao kĭ ăn trong iŏk yoa tĕh sơ năm 2022 đơ̆ng 6/15 apŭng, oei 9 apŭng tam mă đei dêh char kĭ ăn. 

Pơ ma lơ̆m jơ dăr lăng, ƀok Trần Phú Hùng, Phŏ Kơ dră Jơ nŭm pơ gơ̆r kon pơ lei dêh char Dak Lak, athei Dơ nŏ anih vei lăng kon pơ lei dêh char pơ tho ăn dôm anih jang đei ƀơm truh hơ tŏk tơ drong roi tơ băt găh trong jang, khôi luơ̆t tơ proh trong jang, iŏk yoa tĕh; jăh hơ met ming tơ drong hiơ̆ hyĭn păng hơ tŏk tơ drong ‘lơ̆ng mưh chih pơ jing Trong tơ prŏh jang; tơ tom kĭ ăn trong iŏk yoa tĕh tơ̆ apŭng... Lơ̆m nŏh athei tơ rĕk hlŏh dơ̆ng truh tơ drong chih pơ jing, hơ met pơ ‘lơ̆ng tơ drong Tơ proh trong jang, iŏk yoa tĕh đơ̆ng plt Buôn Ma Thuột.

VOV Tây Nguyên/Dơ̆ng tơ blơ̆