VOV4.Bahnar - Kơ sơ̆ 29/7, Jơ nŭm pơ gơ̆r kon pơ lei dêh char Dak Lak pơ gơ̆r Hop akŏm ‘măng mă 4 vă set hơ len, drơ̆ng nơ̆r hơ met ming tơ drong Tơ chơ̆t găh trong tơ mât jên jang pơm hơ met pơ ‘lơ̆ng dôm dơ nâu mong đak. Tơ drong tơ chơ̆t 11/2022 đơ̆ng Jơ nŭm pơ gơ̆r kon pơ lei dêh char Dak Lak (đei drơ̆ng nơ̆r lơ̆m khei 6/2022), đei 8 tơ drong jang, hăm kơ sô̆ jên tơ mât jang truh 134 ti đơ̆ng jên trung ương.

Ƀât tŏk bŏk khei 7 âu ki, Anih tơm tơ lĕch nơ̆r sơ kơ̆t, tơ mât jên jang đei hla ar chih akhan, tơ drong kĭ ăn 8 tơ drong jang lơ̆m tơ drong Tơ chơ̆t 11 đơ̆ng dêh char Dak Lak ‘nŏh tam mă lăp hăm hơ năn tơ drong jang păng kơ sô̆ jên tơ mât ăn dôm tơ drong jang vă tơ iung ming dơ̆ng mŭk drăm, tơ pôl, athei hơ met ming mă lăp. Yoa thoi nŏh, tơ̆ hop akŏm âu, Jơ nŭm pơ gơ̆r kon pơ lei dêh char Dak Lak hlôi hơ met ming jên tơ mât jang ăn 8 tơ drong jang ‘nŏh 134 ti, lơ̆m nŏh 123 ti đơ̆ng jên trung ương păng hlŏh 11 ti đơ̆ng jên mong tơ̆ tơ ring.

Dơ̆ng: Tơ blơ̆