VOV4.Bahnar - Tam truh 1 khei dơ̆ng, hŏk tro rim jăl hŏk tơ̆ Dak Lak vă mât lơ̆m sơ năm hŏk ‘nao 2022 - 2023. Vă pơm ‘lơ̆ng ăn tơ drong pơ tho păng hŏk, tơ drong hơ met tơ mam, lăm hŏk đei dôm tơ ring bơ̆ jang tôch ‘lơ̆ng, tơ lĕch hloi lơ trong jang kăl, vă pơm ‘lơ̆ng ăn tơ drong pơ tho hŏk pơ hrăm mă đei tơ drong kiơ.

Dôm năr blŭng khei 8 âu, tơ̆ Hnam trưng jăl 1 Cư Pui II, hnam hŏk Ea Rớt, xăh atăih yăh Cư Pui, apŭng Krông Bông hnam hŏk 2 tâng 6 lăm hŏk păng 1, 2 anih jang kơ pal, oei hăt man, pơm pơ kĕh bơ bŭng hnam. Dôm hnam hŏk so păng anih man pơ ‘nhŏ ăn thây kô, hŏk tro đei sơng hơ met; lơ̆m dôm lăm hŏk, kơ ƀang tang dŏ, kơ ƀang chih chư păng dôm tơ mam pơ yoa ăn pơ tho pơ hrăm kŭm đei hơ met pơ ‘lơ̆ng.

Ƀok thây Nguyễn Hồng Thuần – Hiê̆u trơng hnam trưng ăn tơ băt, sơ năm hŏk ‘nâu, 3 hnam hŏk găh Hnam trưng jăl 1 Cư Pui II vă sơng dang 1.400 ‘nu hŏk tro. Dang ei 2 hnam hŏk jê̆ Dơ nŏ anih vei lăng kon pơ lei xăh hlôi hơ met đang tôm tơ drong, oei pă hơ drô̆ Hnam trưng Ea Rớt đech oei hơ met ming, athei gô truh hơ tuch khei 12 ‘mơ̆i gơ̆h jang kĕh. Vă pơm ‘lơ̆ng ăn tơ drong hŏk pơ hrăm ƀât mă oei đei lăm hŏk man tam kĕh, hnam trưng hlôi hơ met hiă trong jang nai bơih:   

“Hrei ‘nâu man 6 tŏ lăm hŏk lơ tâng mă lei tam mă đang, athei gô truh ƀât blŭng hŏk ki 2 ‘mơ̆i gơ̆h man đang, păng vă pơ gơ̆r tŏk hŏk tơ̆ hnam hŏk âu. Kơ plăh dang ei, hnam trưng đei 1 anih yoa atŭm pơm hăm tơ̆r păng vă iŏk yoa anih âu pơm lăm hŏk pơ gia. Hnam trưng hlôi hơ met kơ ƀang, tơ dŏ ăn lăm hŏk pơ gia âu; ‘ngoăih kơ ‘nŏh oei pơm hloi hla ar apinh Dơ nŏ anih vei lăng kon pơ lei apŭng, tơ lĕch jên răt dơ̆ng 30 ƀô̆ kơ ƀang tang dŏ păng hlôi đei kĭ ăn păng mưh răt đei kơnh vă tơ mât đĭ tơ̆ lăm hŏk ‘nŏh.”

Ƀât blŭng khei 8/2022, lơ hŏk tro tơ̆ Hnam trưng jăl 1 Cư Pui II, hnam hŏk Ea Rớt, xăh Cư Pui, apŭng Krông Bông truh puih, choh ‘ngiĕt cham hnam trưng, hơ met ăn sơ năm hŏk ‘nao.

Sơ năm hŏk 2022- 2023 apŭng Krông Bông đei 51 hnam trưng đơ̆ng lăm mâm non truh jăl 2, hăm 21 rơ bâu hŏk tro. Ƀok Huỳnh Viết Trung – Kơ dră vei lăng pơ tho pơ hrăm kơ apŭng kơ plăh dang ei ăn tơ băt, vă hơ met ăn sơ năm hŏk ‘nao, Dơ nŏ anih vei lăng kon pơ lei apŭng Krông Bông tơ lĕch vă jê̆ 24,5 ti hlak jê man ‘nao 66 lăm hŏk; tơ lĕch lơ kơ sô̆ jên nai vă hơ met ming, pơm pơ ‘lơ̆ng kơ hrĕng tŏ lăm hŏk so; răt tơ mam, kơ ƀang tang dŏ, kơ măy kơ mŏk pơ yoa ăn tơ drong pơ tho, hŏk pơ hrăm. Truh dang ei, vă rim hnam trưng tơ tă bơ̆ jang trŏ trong tơ lĕch ngăl:

“Găh tơ drong hơ met tơ mam ăn sơ năm hŏk 2022 – 2023 ‘nŏh Anih vei lăng pơ tho pơ hrăm apŭng hlôi jang tơ drong hơ len, chih jô̆ đơ̆ng sơ năm adrol sơ̆ bơih, chih tơ lĕch trong jang đơ̆ng hơ tăih, đơ̆ng rŏng kơ ‘nŏh tơ roi ăn Dơ nŏ anih vei lăng kon pơ lei apŭng kĭ, mă loi jĭ dôm tơ ring atăih tăih. Hrei ‘nâu 1,2 hnam trưng hlôi man đang, oei 1,2 hnam trưng hăt man, jang pơ kĕh dôm tơ drong oei đei dơ̆ng vă pơm thoi yơ truh khei 9 sơ năm ‘nâu ‘nŏh jang đang đĭ, hơ met ‘lơ̆ng ăn tơ drong pơm lêh mât hŏk sơ năm hŏk ‘nao.”

Oei tơ̆ apŭng Lắk, sơ năm hŏk 2022 – 2023 âu, kŭm sơng vă jê̆ 13 rơ bâu ‘nu hŏk tro đơ̆ng lăm mâm non truh jăl 2. Ƀok Nguyễn Văn Ngọc – Kơ dră vei lăng pơ tho pơ hrăm apŭng tơ roi, tơ drong hơ met bơ̆n tơ mam pơ tho hŏk, lăm hŏk, hlôi đei anih tơ lĕch trong jang truh tơ̆ rim hnam trưng đơ̆ng blŭng sơ năm hŏk hloi. Mưh truh pơ yan he, Anih athei rim hnam trưng kơ chăng, kiơ̆ đơ̆ng kơ sô̆ jên đei ƀơk ăn vă bơ̆ jang hơ met ming; đei trong pơ lung adrin jang, dăr lăng dôm anih man ‘nao vă gơ̆h bơ̆ jang trŏ khei ‘năr; tơ lĕch trong jang hiă vă pơm ‘lơ̆ng tơ dăh man tam kĕh kŭm đei anih pơ gơ̆r pơ tho hŏk sơ đơ̆ng ‘lơ̆ng:  

“Anih vei lăng pơ tho pơ hrăm đei pơm tơ ‘ngla tơ mât jên jang, man hơ met 3 hnam trưng păng 1 lơ̆m kơ sô̆ ‘nŏh đĭ jang đang bơih, oei 2 hnam trưng dơ̆ng oei hăt man pơ kĕh păng truh ‘năr 15/8 âu jang đang tơ drong hơ met ming. Dang ei oei pă dôm tơ drong jang tih, đei lơ tơ drong jang đĕch jang tam kĕh, rŏ năng gô hiơ̆ ƀiơ̆ dang đơ̆ng rŏng kơ khei 9, păng tơ drong ‘nâu anih hlôi kơ chăng jang hơ doi hăm dôm hnam trưng tơ lĕch hiă trong jang kơ plăh dang ei ‘nŏh jĭ ăn hŏk tro hŏk dơ̆ng tơ̆ dôm lăm hŏk so, mă ưh ‘nŏh klăih song ka hŏk. Tơ drong kăl hlŏh jĭ vă pơm ‘lơ̆ng ăn tơ drong pơ tho păng hŏk.”

Kiơ̆ Anih vei lăng pơ tho pơ hrăm Dak Lak, sơ năm hŏk 2022-2023, lơ̆m dêh char đei 478.180 ‘nu hŏk tro kiơ̆ hŏk tơ̆ 1.017 hnam trưng, đơ̆ng lăm Mâm non truh lăm 12. Vă hơ met ‘lơ̆ng tơ mam ăn sơ năm hŏk ‘nao, Dơ nŏ anih vei lăng kon pơ lei dêh char tơ lĕch vă jê̆ 477 ti vă man păng răt hơ met tơ mam pơ yoa ăn tơ drong pơ tho păng hŏk. Lơ̆m nŏh, vă jê̆ 389 ti đei iŏk vă man ‘nao 350 lăm hŏk, hơ met ming 170 lăm hŏk so, man dur var, man cham, ‘măng jang ăn lơ hnam trưng; dang 88 ti hlak jên vă răt kơ ƀang tang dŏ, kơ ƀang chih păng lơ tơ mam pơ yoa ăn pơ tho, hŏk pơ hrăm nai. 

                Tuấn Long: Chih

Dơ̆ng: Tơ blơ̆