VOV4.Bahnar - Vă đe hơ ioh dơ nuh hin tơ ring sơ lam teh đak đei sơng trung thu hiôk chơt, ‘lơ̆ng, gơ măng hei, ‘năr (9/9), Anih vei lăng kon pơ lei dêh char Dak Lak pơ gơ̆r tơ drong jang Gơ măng rang khei pơ nil 2022 tơ̆ apŭng sơ lam Buôn Đôn.

Khŭl pơ gơ̆r jang pơ jao hŏk ƀŏng ăn kơ hŏk tro dơ nuh hin yak hloh mơ mat tat

Tơ̆ tơ drong jang, hloh 2.000 ‘nu hơ ioh lơ̆m tơ ring đei mơ̆ng kơ Thơ hmach tết Trung thu hơ ioh đơ̆ng Kơ dră teh đak, vang akŏm dôm tơ drong pơ chơt iŏk ŭnh kơ đeng, hơ soang yă grai, hơ ri hơ soang, pơm tơ ƀôh um rup ma Cuội - mŏ Hằng, sa bơ̆n ƀĕng, plei ‘long trung thu. ‘Măng âu, khŭl pơ gơ̆r hlôi pơ jao 64 kơ suơ̆t hŏk ƀŏng hơ ioh dơ nuh hin yak hloh mơ mat; 30 tong gre tang vang ‘măn ăn dôm hŏk tro mơ mat tat tam mă đei gre năm tơ̆ hnam trưng hŏk.

Hơ soang yă grai tơ̆ gơ măng rang khei pơ nil

Tơ drong jang âu vă pơm tơ drong hiôk ăn kơ đe hơ ioh tơ ring sơ lam Buôn Đôn đei sơng Tết Trung thu hiôk chơt, sơ đơ̆ng; pơ lung, pơ trŭt đe oh hơ drin hŏk pơ hrăm, iŏk đei jơ nei ‘lơ̆ng lơ̆m sơ năm hŏk ‘nao.

Thuem: Tơ blơ̆