VOV4.Bahnar - Drâm kơ sơ̆ 7/9, jing vă akhan ‘năr 12/8 âm, lơ anih tơ gŭm jang hơ doi pơ gơ̆r “Gơ măng khei pơ nil”, hơ păh tơ mam trung thu ăn đe hơ iŏh, hơ dai hăm khăm, ƀơk pơ gang hơ met jĭ ăn kon pơ lei tơ nuh tơ̆ plei Ea Na, xăh Ea Na, apŭng Krông Ana, dêh char Dak Lak.

Vă jê̆ 750 ‘nu hơ iŏh tơ̆ plei Ea Na, xăh Ea Na, apŭng Krông Ana đei iŏk tơ mam trung thu

Kiơ̆ kơ ‘nŏh, oei đei lăng ngôi lơ tơ drong hơ ri hơ xoang, ngôi pơ chơt “Gơ măng khei pơ nil” nhen: hơ xoang prao, hơ ri, lơ tơ drong ngôi pơ chơt, xa ƀĕng, tơ mam trung thu, 750 ‘nu hơ iŏh tơ̆ plei Ea Na oei iŏk đei lơ tơ mam trung thu dơ̆ng. Dôm anih tơ gŭm oei hơ păh 57 kơ suât jên hŏk ƀŏng ăn đe ŏh pơ nam hŏk. Akŏm đĭ đăng kơ jă tơ mam păng jên hŏk ƀŏng đei 80.000.000, yoa Công ty jang hơ doi pơm Phŏng Bình Điền păng Hnam pơ gang Đa khoa Thiện Hạnh tơ gŭm.

Atŭm hăm ‘nŏh, đe y ƀak si đơ̆ng Hnam pơ gang Đa khoa Thiện Hạnh oei pơ gơ̆r khăm, ƀơk pơ gang hơ met jĭ ăn 500 ‘nu kon pơ lei tơ̆ plei Ea Na, hăm kơ sô̆ jên dang 50.000.000 hlak.

Dơ̆ng: Tơ blơ̆