VOV4.Bahnar - Lăp pă dang 1 puăt khei dơ̆ng ‘nŏh truh Tết Nguyên đán Nhâm Dần 2022, ‘nâu jĭ khei ‘năr kon pơ lei Dak Lak đa chă răt tơ mam tôch lơ vă hơ met ăn Tết. Tơ drong akŏm lơ bơ ngai kơ plăh khei ‘năr oei đei jĭ Covid -19 tơ̆ tơ ring oei jing tơ drong tôch hơ mơt ƀât mă rim năr dêh char đei dang 200 ‘nu bơ ngai jĭ păng jing tơ drong tôch krê pơm ăn jĭ tơ pŏh. Vă găn ƀiơ̆ tơ drong krê ‘nâu, Khul kơ dră tơ ring păng dôm anih jang kơ chăng hơ tŏk lơ trong jang tang găn jĭ  Covid-19.

Tơ̆ 1,2 kơ chơ lơ̆m plt Buôn Ma Thuột, tơ drong jang tang găn jĭ oei đei vei kơ jăp. Nhen thoi tơ̆ Công ty jang hơ doi tĕch mơ dro kơ chơ Buôn Ma Thuột, kơ sô̆ bơ ngai mât lĕch lơ̆m kơ chơ lơ ƀiơ̆ kơ năr hmă kơ na tơ drong jang tang găn jĭ oei đei vei lăng kơ jăp ‘lơ̆ng. Dang ei tơ̆ kơ chơ Buôn Ma Thuột đei dang 8.000 ‘nu bơ ngai pơ dro. Đĭ đăng bơ ngai pơ dro lơ̆m kơ chơ đei ƀet 2 jrŭm vắc xin tang găn jĭ Covid-19 ngăl. Tơ̆ dôm ‘măng mât lĕch lơ̆m kơ chơ, Anih vei lăng kơ chơ adoi hơ met anih vă pruih pơ gang pơ lôch pơ rang jĭ păng ming kơ ƀang chih tơ roi găh jơ hngâm jăn kiơ̆ đơ̆ng hơ len mã QR hăm dôm bơ ngai đei điên thoăi rơ gei păng chih tơ roi hăm hla ar hăm dôm bơ ngai ưh đei điên thoăi. Găh tơ drong tơ roi tơ băt, kơ chơ Buôn Ma Thuột pơ klĕm, chô̆ pa no, áp phích găh tơ drong tang găn jĭ tơ̆ dôm anih kơ drâm bơ ngai vih vât; hơ nơ̆ng pơih tơ roi dôm hla ar chih hơ găt ‘nao, dôm tơ drong tơ plih lơ̆m tơ drong tang găn jĭ.…

Bơ ngai jang tơ̆ siêu thĭ pơ tŏ hơ yuh hơ kâu mưh kon pơ lei truh răt tơ mam

Ƀok Nguyễn Duy Quảng, Kơ dră Anih vei lăng kơ chơ Buôn Ma Thuột ăn tơ băt: “Hơ met ăn Tết truh âu kơnh, kơ sô̆ bơ ngai truh lơ, hlŏh kơ ‘nŏh dơ̆ng tơ mam đơ̆ng bơ ngai pơ dro kŭm lơ ‘năi. Ƀlep ƀât têt âu nhôn hơ nơ̆ng pơih lơ̆m aloa roi tơ băt ăn tơ moi kŭm nhen bơ ngai pơ dro mât lơ̆m kơ chơ ‘nŏh athei gom muh măt, dơ̆ng hơ tăih băl pơm ‘lơ̆ng ăn tơ drong tang găn jĭ.”

Oei tơ̆ dôm siêu thĭ, anih tĕch tơ mam tơ̆ plt, kơ tă ƀât ‘măng mât lĕch, bơ ngai jang, siêu thĭ oei hơ nơ̆ng athei tơ moi ôp ti hăm đak pơ gang, chih tơ roi jơ hngâm jăn păng tơ tă ăn kon pơ lei athei dơ̆ng hơ tăih băl mưh mât răt tơ mam. Atŭm hăm ‘nŏh, dôm siêu thĭ oei athei đĭ đăng kon pơ lei, bơ ngai jang gom muh măt păng ôp ti hăm đak pơ gang mưh chă tơ ƀâp, pơ ma nuh, tĕch tơ mam.

Lơ pano, nơ̆r chih tơ băt đei ming ƀât dôm ‘măng mât lĕch lơ̆m kơ chơ Buôn Ma Thuột

Kiơ̆ ƀok Bùi Văn Quân – Kơ dră chĕp kơ̆l Siêu Thĭ Go Buôn Ma Thuột ‘ngoăih kơ tơ drong hơ met tôm kơ măy pơ tŏ hơ kâu, đak pơ gang păng anih chih tơ roi găh jơ hngâm jăn ăn tơ moi rim năr, kơ tă ƀât ‘măng siêu thĭ, siêu thĭ hơ nơ̆ng chă test hrĕnh jĭ Covid-19 rim giĕng ăn đĭ đăng bơ ngai jang. Kŭm hăm ‘nŏh, rim năr đơ̆ng rŏng kơ tang ‘măng, siêu thĭ pơ gơ̆r pruih pơ gang pơ lôch pơ rang jĭ jơ̆p hơ nă hnam hăm pơ gang Cloramin B vă tang găn jĭ Covid-19…

“Đĭ đăng bơ ngai jang mưh mât athei gom muh măt, dôm anih tơ ƀâp hăm tơ moi athei đŏh kơ mĭl klơ̆p muh măt vă đak hai huei tơ prăh ƀơm. Hơ drô̆ hăm bơ ngai thu jên ‘nŏh siêu thĭ athei sư ƀot ƀao tay vă da ƀiơ̆ pel ƀơm jên pơm tơ pŏh pơ rang jĭ. Hăm bơ ngai truh răt tơ mam đĭ đăng mưh mât lơ̆m siêu thĭ athei chih tơ roi găh jơ hngâm jăn. ‘Ngoăih kơ ‘nŏh nhôn oei hơ met kơ măy pơ tŏ hơ yuh hơ kâu păng đei hloi kơ măy pruih pơ rang jĭ ăn tơ moi.”

Kon pơ lei oei hơ len mã QR tơ roi găh jơ hngâm jăn adrol kơ mât lơ̆m siêu thĭ

Pơ ma găh tơ drong rim kơ chơ, siêu thĭ bơ̆ jang lơ trong tang găn jĭ Covid -19, yă Phạm Thị Tuyết Nhung, Vei lăng jang pơ gang, Anih vei lăng tơ drong jang pơ gang dêh char Dak Lak, bơ ngai vang jang lơ̆m Khul dăr hơ len đơ̆ng dôm anih jang kơ pal akhan: “Năng atŭm rim anih vang tơ lĕch jang ‘nŏh đei 1,2 anih jang tam mă roi tơ tom dôm hla ar chih kăl, 1,2 anih jang oei bơ̆ jang tam ‘lơ ‘lŏ, lơ kơ chơ mong tơ mam đei kơ drâm bơ ngai mât lĕch păng đe sư kŭm tam mă pơm kiơ̆ đĭ dôm tơ drong hơ găt 5k păng đei anih jang mưh bơ̆ jang kiơ̆ nhen vă pơ trŏ, vă ôn kơ anih jang kơ pal đĕch tam mă bơ̆ jang tơ năp ‘lơ̆ng. Kiơ̆ đơ̆ng hơ len năng âu, nhôn roi tơ ƀôh tôch hơ dăh păng hơ len năng rim anih jang tam mă ‘lơ̆ng vă hơ met ming hloi, đơ̆ng rŏng kơ 10 năr khul năm hơ len năng dơ̆ng păng chih hơ len dơ̆ng ‘moi kiơ̆ dôm tơ drong mă khul hlôi lăng ƀôh.”

Ƀât mă jĭ Covid-19 oei tôch hơ mơt, dôm anih tĕch, pơ truh tơ mam nhen kơ chơ, siêu thĭ jĭ 1 lơ̆m dôm anih ƀônh tơ pŏh jĭ hlŏh. Yoa thoi nŏh, ‘ngoăih kơ tơ drong dôm anih athei kơ chăng bơ̆ jang ‘lơ̆ng dôm tơ drong hơ găt tang găn jĭ, ‘nŏh athei đei tơ drong jang hơ doi đơ̆ng bơ ngai răt tơ mam hai vă găn ƀiơ̆ tơ drong tơ pŏh đơ̆ng jĭ, mă loi ƀât Tết Nguyên Đán oei vă truh âu.

            Nam Trang: Chih

Dơ̆ng: Tơ blơ̆