VOV4.Bahnar - Lơ̆m 2 năr ‘năr 14-15/4, Jơ nŭm pơ gơ̆r kon pơ lei dêh char Dak Lak hlôi bơ̆ jang kiơ̆ dăr hơ len tơ drong jang hăm 1,2 tơ ring păng Anih vei lăng kon pơ lei dêh char găh hơ met pơ ‘lơ̆ng hla ar kơ thơ, tơ kêng đơ̆ng kon pơ lei jăl jang 2016-2021. Kiơ̆ tơ roi tơ băt đơ̆ng Anih vei lăng kon pơ lei dêh char Dak Lak, đơ̆ng sơ năm 2016-2021, lơ̆m dêh char Dak lak hlôi sơng iŏk 9.100 hla ar tơ kêng, tơ hlâu păng hloh 33.800 hla ar apĭnh, tơ roi. Vă đĭ đăng dôm tơ drong tơ kêng hlôi đei anih jang gơh jang set hơ len, hơ met pơ ‘lơ̆ng tơ păt, rơ đăh, ƀlep khôi luơ̆t.

Khŭl dăr hơ len kơ Jơ nŭm pơ gơ̆r kon pơ lei dêh char Dak lak bơ̆ jang hăm Anih vei lăng kon pơ lei dêh char Dak Lak

Tơ̆ hơ năp kơnh, Anih vei lăng kon pơ lei dêh char Dak Lak kăl kơ hơ nơ̆ng athei rim tơ ring, rim anih jang tơ lĕch jang tơ păt, đei yua dôm tơ drong hơ găt găh sơng kon pơ lei păng hơ met pơ ‘lơ̆ng tơ drong tơ kêng; hơ tŏk loi dơ̆ng tơ drong jang vei lăng tơ drong pơ jing chĕng hơ met teh, trong vă jang iŏk yua teh, vei sơ đơ̆ng tơ păt, rơ đăh. Mă kăl ‘noh kăl bơ ngơ̆t hloh dơ̆ng truh tơ drong pơ tho pơ hrăm bơ gai jang pơm lăp hăm ‘meh vă tơ drong jang hơ met pơ ‘lơ̆ng hla ar tơ kêng tơ hlâu.

Thuem: Tơ blơ̆