VOV4.Bahnar - Bơ̆ jang kiơ̆ trong tơ plih iŏk yoa kơ măy sô̆ lơ̆m tơ drong tĕch mơ dro, hơ tŏk tơ drong pơ vih ăn tơ moi, đơ̆ng khei 7/2022, Công ty jang unh điên Dak Lak oei tơ plih trong pơm hla ar tĕch răt unh điên (đơ̆ng pơm hăm hla ar) jing pơm hăm kơ măy điên tư. Kiơ̆ kơ ‘nŏh, tơ moi ưh đeu hŭt năr gô kĭ hla ar, mă lăp chih tơ mât kơ sô̆ OTP mưh iŏk đei tin nhắn đơ̆ng anih jang unh điên kiơ̆ kơ sô̆ điên thoăi hlôi chih. Mưh pơm hla ar, kơ sô̆ tơ moi đei vei kơ jăp kơ na ưh đei ƀơm truh tơ drong kla jên điên.

Hăm hla ar pơ kăp điên tư, mă oei tơ̆ năm yơ, lăp kăl đei internet ‘nŏh tơ moi gơ̆h mât lăng lơ̆m dôm phần mềm vei lăng tơ moi, lăng hla ar pơ kăp, athei tơ plih ming nơ̆r chih tơ dăh kăl, pơm kiơ̆ dôm tơ drong pơ vih đơ̆ng anih jang unh điên. Dang ei Công ty jang unh điên Dak Lak đei hlŏh 506.000 ‘nu tơ moi iŏk yoa unh điên pơ ‘nhŏ ăn tơ drong arih xa. Tơ chĕng adrol truh đĭ khei 6 sơ năm đơ̆ng rŏng, công ty vă jang kĕh tơ drong pơm hla ar pơ kăp ăn tơ moi hăm kơ măy điên tư.

Dơ̆ng: Tơ blơ̆