VOV4.Bahnar - Khei ‘năr tơ jê̆ âu, tơ̆ lơ tơ ring lơ̆m tĕh đak đei lơ tơ drong unh xa pơm hiong răm lơ găh bơ ngai păng tơ mam. Lơ̆m nŏh lơ unh xa yoa đơ̆ng cham điên. Vă tang găn dôm tơ drong ‘nâu, dôm anih jang unh điên Dak Lak oei hơ tŏk tơ drong roi tơ băt, pơ tho tơ ƀôh ăn kon pơ lei trong iŏk yoa unh điên sơ đơ̆ng ‘lơ̆ng, ‘mơ ‘met păng tang găn dôm tơ drong sar bar yoa bơ̆ jang jê̆ tơ lei unh điên cao áp.

Công nhân jang điên chă ƀơk hla ar roi tơ băt vei sơ đơ̆ng unh điên ăn kon pơ lei

Mă hơ dăh nhen tơ̆ Cư Kuin, kŭm hăm roi tơ băt kiơ̆ a loa tơ̆ dôm xăh 2 vât 1 khei, anih jang unh điên chă ƀơk hla ar chih tơ roi găh trong iŏk yoa unh điên sơ đơ̆ng, hơ dai hăm roi tơ băt kơ tă tơ̆ dôm anih thu jên điên, tơ̆ hnam kon pơ lei ‘nao chô̆ kŏng jơ unh điên; jang hơ doi hăm Dôm anih jŏh ayŏ kơ dŏ xoang tơ̆ xăh chă ƀơk hla ar tơ roi ƀât năr kla jên hưu rim khei...

 Hơ nơ̆ng chă dăr lăng dôm kơ măy điên vă kơ chăng tang găn sar bar, unh xa đôh

Kiơ̆ kơ ‘nŏh, kon pơ lei đei pơ tho tơ ƀôh, hlôh vao dôm tơ drong krê găh unh điên lơ̆m tơ drong arih xa rim năr păng dôm trong tang găn sar bar nhen: hơ nơ̆ng dăr lăng tơ lei unh điên, kơ măy yoa unh điên, phích tôt điên lơ̆m hnam; kŭp unh điên mưh ưh đei iŏk yoa; ti hơ ‘yuih ưh gơ̆h pel tơ̆ tơ mam điên oei yoa; ưh gơ̆h chô̆ tơ lei điên vă tang găn đe tơ tông, đăk kơ ne, hyup ka; ưh gơ̆h sơ̆k hơ băn ao, hơ tol tơ mam tơ̆ tơ lei unh điên…

Kon pơ lei oei iŏk đei nơ̆r roi tơ băt vei sơ đơ̆ng tơ̆ tơ lei unh điên hai, nhen: ưh gơ̆h tŏk hao tơ̆ jrăng điên dăh mă mât tơ̆ anih vei vei lăng kơ măy unh điên; ưh gơ̆h tơ păr klang jê̆ tơ lei unh điên; ưh gơ̆h chô̆ tơ mam dăh mă pơ tăm ‘long jê̆ tơ lei unh điên…

Dơ̆ng: Tơ blơ̆