Sơnăm hŏk 2024 - 2025, ‘măng mă blŭng hŏk tro lăm 12 hŏk đang Tơdrong hŏk pơhrăm phô thŏng 2018, hăm dôm tơdrong tơplih đei tơdrong ‘lơ̆ng, đơ̆ng tơdrong tơƀôh tơdrong tơm jing tơdrong hơtŏk tơiung jơhngơ̆m đon păng hŏk gơh đơ̆ng bơngai hŏk. Kŭm lơ̆m sơnăm ‘nâu, ‘măng pơlong tốt nghiệp jăl 3 đei tơdrong tơplih hăm đê pơlong păng trong pơlong, mă loi ‘noh dôm môn pơlong gơvar đei tơmơ̆t dơ̆ng 1,2 nơ̆r apĭnh ‘nao, vă hơtŏk tơdrong hŏk gơh păng hơlen lăng ƀlep gơh pơm ƀai đơ̆ng hŏk tro. Oh Lê Minh Hưng, hŏk tro lăm 12, Hnam trưng hŏk jăl 3 Buôn Ma Thuột, dêh char Đắk Lắk tơroi:

“Đê pơlong sơnăm ‘nâu tơplih lơ, mă loi ‘noh ji môn akŏm. Oh ƀôh kơdih athei hŏk păng ôn ƀai lơ kơ loăi nơ̆r apĭnh, vei sơđơ̆ng tơdrong hlôh vao hai, athei đei đon tơchĕng, chă pơvao hai. Mă đơ̆ng thây kô tơgŭm tôch kơ lơ mă lei oh oei ƀôh kơhret yua kơ ‘nâu jĭ ‘măng pơlong gĭt kăl tơchơ̆t tơ̆ hơnăp kơnh”.

Hrei ‘nâu, rim hnam trưng hŏk lơ̆m dêh char Đắk Lắk tŏk bŏk yak mơ̆t lơ̆m khei ‘năr ôn ƀai ăn hŏk tro lăm 12. Thây kô pơtho akŏm pơtho dơ̆ng tơdrong hlôh vao, pơhrăm tơdrong gơh pơm ƀai hrĕnh păng trŏ kiơ̆ ‘meh vă ‘nao đơ̆ng đê pơlong, tơgŭm hŏk tro hơmet tôm yak mơ̆t lơ̆m ‘măng pơlong.

Yă Nguyễn Thị Xuân Hương, Kơdră vei lăng Hnam trưng hŏk jăl 3 Lê Quý Đôn, pơlei tơm Buôn Ma Thuột roi tơbăt: Hnam trưng hlôi pơgơ̆r lơ ‘măng pơlong hơlen lăng, klăih song hŏk tro vă pơgơ̆r ôn ƀai kiơ̆ grŭp, tơgop pơm tơ jur tơdrong kơhret păng hơtŏk đei yua ôn ƀai. ‘Nao âu, hŏk tro hlôi vang pơlong pơlong lăng tôt ngiêp jăl 3 sơnăm 2025 yua đơ̆ng Anih vei lăng găh Pơtho pơhrăm pơgơ̆r. ‘Nâu jĭ tơdrong hiôk vă đe oh pơm joăt hăm đê pơlong păng tơdrong lăm pơlong kiơ̆ tơdrong pơtho ‘nao.

“‘Măng pơlong sơnăm ‘nâu vă hơlen lăng dơ̆ng điêm hŏk pơhrăm kŭm nhen điêm hŏk pơhrăm tơ̆ hnam trưng vă hnam trưng đei  dôm tơdrong tơblang hơdăh hơmet ming athei găh pơtho pơhrăm lơ̆m hnam trưng vă trŏ lăp truh iŏk đei tơdrong hơgăt hloi đơ̆ng blŭng sơnăm hŏk ‘noh jĭ 1 sơnăm hŏk yak truh hŏk tro đŏu tôt ngiêp 100%, đơ̆ng noh đe oh đei tơdrong hiôk yak mơ̆t lơ̆m hnam trưng hŏk mă đe oh hơ pơi ‘meh”.

Tơ̆ dôm hnam trưng găh tơring hơtăih hơtŏ, tơring sơlam - hơnih găh lơ ‘noh jĭ hŏk tro bơngai kon kông, tơdrong ôn ƀai đei pơm kiơ̆ hrĕnh vă trŏ lăp hăm tơdrong yan âu. Ƀok Nguyễn Phan Anh, Phŏ Kơdră vei lăng Hnam trưng hŏk jăl 3 Lắk, apŭng Lắk, dêh char Đắk Lắk roi tơbăt, tơ̆ khei năr pă đei lơ, ‘ngoăih kơ tơdrong hơmet ming tơdrong hlôh vao, đe thây kô lăng kăl pơm tơdrong ‘lơ̆ng jơhngơ̆m đon ăn đe oh. Kiơ̆ kơ ‘noh, hnam trưng hlôi dăr hơlen, klăih song hŏk tro vă pơjing trong tơlĕch jang ôn ƀai, tơgŭm đe oh lui ngeh yak mơ̆t lơ̆m ‘măng pơlong.

“Đơ̆ng rŏng kơ pơlong pơlong lăng đang hnam trưng ôn ƀai ăn kơ đe oh thim dang 4 giĕng. Đơ̆ng ‘năr 20/5 truh ‘năr 20/6 akŏm đĭ đăng đe oh đei hŏk tam mă tơpă pơm ƀai gơh hăm lăm 12 ‘noh hơmet ăn đe oh thim 4 giĕng tơ̆ hnam trưng.”

‘Măng pơlong tôt ngiêp jăl 3 sơnăm 2025, dêh char Đắk Lắk đei vă jê̆ 22.000 ‘nu hŏk tro chih măt vang pơlong. Ƀok Đỗ Tường Hiệp, Phŏ Kơdră Anih vei lăng găh Pơtho pơhrăm dêh char Đắk Lắk roi tơbăt, Anih jang hlôi athei dôm anih pơtho pơhrăm hơlen lăng ‘lơ̆ng ‘măng pơlong sơnăm hơdrol, pơjing trong pơtho, hla ar hŏk păng tơlĕch ăn ôn ƀai mă lăp hăm yan âu đơ̆ng rim tơring. Mă ‘noh jĭ ƀơ̆t Hla ar tơchơ̆t 29 đơ̆ng Anih tơm vei lăng găh pơtho pơhrăm đei tơmơ̆t yua, dôm hnam trưng hlôi đei tơplih trong ôn ƀai kiơ̆ trong tơ jur pơm ƀai lơ, hơtŏk đei yua. Ƀok Đỗ Tường Hiệp pơma hơdăh, anih vei lăng pơtho pơhrăm hlôi athei rim hnam trưng chih hơnăn dôm hŏk tro đei tơdrong hơrih sa pơmat tat vă tơgŭm tơtom, ưh kơ lê̆ hŏk tro hơyơ athei hŭt pơlong.

“Athei rim hnam trưng pơjing tơmơ̆t dơ̆ng trong tơlĕch jang pơtho hŏk lơ̆m hnam trưng mă lăp hăm tơdrong yan âu kơ hnam trưng păng hŏk tro. Ƀơ̆t Hla ar tơchơ̆t 29 pơjing, athei đei trong tơlĕch jang vă hơvơn 1 khŭl thây kô pơtho ăn kơ hŏk tro mă ưh kơ sĭ pơgơ̆r pơtho thim hŏk thim. Mă kăl ‘noh hăm đe oh tơ̆ tơring hơtăih hơtŏ, tơring kon pơlei kon kông ‘noh đei tơgŭm ưh khan lăp găh jơhngơ̆m đon, găh hŏk pơhrăm mă oei pơđĭ hloi găh tơmam drăm vă kơ đe oh đei tơdrong hiôk hŏk pơhrăm păng pơlong đei ‘lơ̆ng hloh”.

Hơmet ăn mă hơlen, lăng ƀlep tơdrong hŏk gơh đơ̆ng hŏk tro păng pơjing trong tơlĕch jang ôn ƀai mă trŏ lăp, anih jang vei lăng găh Pơtho pơhrăm dêh char Đắk Lắk tŏk bŏk hơdrin vei sơđơ̆ng ‘măng pơlong tôt ngiêp jăl 3 sơnăm 025 ưh khan lăp đei iŏk yua găh joăt jang, mă oei tưk tơiung dơ̆ng đon lui ngeh ăn đe oh yak mơ̆t lơ̆m ‘măng pơlong lơ long nol mă lei kŭm ƀĕnh tơdrong hiôk tơ̆ găh hơnăp.