Jơnŭm pơgơ̆r kon pơlei dêh char Đắk Lắk hlôi set hơlen, pơdrơ̆ng kiơ̆ 11 tơdrong tơchơ̆t hơgăt khôi luơ̆t, 19 tơdrong tơchơ̆t pha păng tơmơ̆t lơ tơdrong gĭt kăl nai. ‘Nâu jĭ tơdrong jang, trong jang tơgŭm, trong jang pơtrŭt hơtŏk tơiung mŭk drăm tơpôl, vei sơđơ̆ng tơdrong hơrih sa tơpôl. Sơnăm 2025, Đắk Lắk tơlĕch tơdrong hơgăt mŭk drăm tŏk đei 7%, iŏk yua jô̆ păh lăp kơ̆l bơngai iŏk đei 81 triệu hlak jên, thu mong jên jang teh đak hơdrin iŏk đei 9.000 ti hlak jên, kơsô̆ ŭnh hnam dơnuh hin jur đơ̆ng 3% tơ̆ kơpal.

Pơma pơtôch ‘măng hop akŏm, yă Huỳnh Thị Chiến Hoà, Kơdră Jơnŭm pơgơ̆r kon pơlei dêh char Đắk Lắk, athei rim kơdră rim anih jang kơ dêh char akŏm jang kiơ̆ tơplih ‘nao, proh hơmet khŭl jang kơ anih jang chĭnh trĭ; jang tŏk, ‘lơ̆ng vă jang kiơ̆ jơnei dôm tơdrong hơgăt, hơnăp jang hlôi tơlĕch ăn.