Hăm hơnăn “Đắk Lắk – Tơdrong pran ‘lơ̆ng, hơpơi ‘mĕh jang tŏk”, Hop akŏm roi tơbăt tơdrong Tơproh trong jang păng tơlĕch trong tơmât jên jang sơnăm 2026 sơng đei dang 1.000 ‘nu bơngai tang măt ‘nŏh jĭ kơdră chĕp kơ̆l dôm anih tơm, anih jang kơpal kơ Trung ương, anih jang đơ̆ng apŭng plenh teh, Khul tĕch mơdro, Grŭp jang mŭk drăm păng bơngai tơmât jên jang lơ̆m păng ‘ngoăih kơ teh đak.

Tơdrong hơiă, gĭt kăl hlŏh đơ̆ng Hop akŏm ‘nŏh jĭ roi tơbăt Tơdrong tơchơ̆t kiơ̆ Tơdrong hơmet ming Trong tơproh jang đơ̆ng dêh char Đắk Lắk đơ̆ng 2021-2030, trong vă jang truh sơnăm 2050. Hla ar chih tơdrong Tơproh trong jang ‘nao đei hơmĕng pơih đei anih jang tŏk roi xă ƀiơ̆, tơlĕch trong pơjing dôm tơring jang tŏk tơm, pơjing trong jang mŭk drăm păng dôm anih jang tŏk ‘nao, pơih trong vă tơring sơng đei lơ jên tơmât jang lơ̆m jăl jang truh.

Hơdai hăm tơdrong tơm, Hop akŏm oei đei lơ tơdrong nai nhen: Tơlĕch jang, et hơtŏk 1,2 anih jang, tơdrong jang ‘lơ̆ng; Hop akŏm pơma nuh hăm anih tĕch mơdro, HTX păng unh hnam tĕch mơdro; Hop akŏm Anih jang mŭk drăm kơdih Việt Nam – ‘Măng pơma nuh kơ tơring tơ̆ Đắk Lắk; Hop akŏm găh atŏk tơiung kơmăy kơmŏk pơm hơmet pơ ‘lơ̆ng tơmam păng logistics jơ̆p tơring; Hop akŏm pơma nuh găh “Atŏk tơiung choh jang xa hăm kơmăy kơmŏk ‘nao: Tơdrong ‘lơ̆ng păng trong jang đunh đai ăn anih tĕch mơdro”; Hop akŏm găh “Tơplih hăm kơmăy sô̆ păng atŏk tơiung anih jang xa, tĕch mơdro kơjăp ‘lơ̆ng”; Jơnŭm kơchơ tơmam kơmăy kơmŏk tơring tơrang ‘lơ̆ng, tơmam OCOP kơ dêh char păng dôm dêh char jŭm dăr…

Tơ̆ âu, dêh char Đắk Lắk pơjao hla ar asong tơmât jên jang, hla ar chih tơbăt jên vă tơmât jang păng kĭ pơkăp lơ hla ar chih tơƀlŏk jang hơdoi ăn dôm jĭt tơdrong jang găh lơ tơdrong. Ƀok Trần Công Sơn, Phŏ Kơdră Anih vei lăng jên hu dêh char Đắk Lắk ăn tơbăt, kŭm hăm sơng iŏk jên tơmât jang đei yoa ‘lơ̆ng, dêh char oei tơlĕch trong jang "hiôk ‘lơ̆ng" vă tơjur tôch ai jơnăr pơm hla ar ăn anih tĕch mơdro: “Anih vei lăng jên hu roi tơƀôh ăn Anih vei lăng kon pơlei dêh char pơjing trong jang hiôk ‘lơ̆ng kiơ̆ trong kăt tơjur truh 50% hla ar vei lăng, hăm anih tơchơ̆t trong tơmât jên jang, adrol ki ‘nŏh 17 năr dang ei pă dang 8,5 năr. Hrei ‘nâu trong jang "hiôk ‘lơ̆ng" hlôi đei dêh char roi tơbăt, truh âu kơnh kiơ̆ đơ̆ng chih akŏm đơ̆ng dôm anih jang đei ƀơm truh vă tơroi ăn Anih vei lăng kon pơlei dêh char tơlĕch trong pơm hla ar roi tŏ sĕt năr hăm dôm hla ar ƀơm truh tơdrong tơmât jên jang vă pơm ‘lơ̆ng ăn dôm tơdrong jang jăh đei tơlĕch jang păng hơtŏk tơdrong đei yoa đơ̆ng tơmât jên jang.”

Ưh lăp akŏm jơhngâm hơmet pơ 'lơ̆ng dôm tơdrong oei tơhlăk găh pơm hla ar, dêh char Đắk Lắk kŭm oei hơmet hrơ̆ch 'lơ̆ng dôm tơdrong hơgăt găh anih jang, trong nơnăm, khul bơngai jang păng kơmăy sô̆ vă sơng dôm tơdrong jang 'nao. Kiơ̆ anih pơgơ̆r, hăm dôm jĭt tơdrong jang đei pơjao hla ar tơmât jên jang păng kĭ pơkăp jang hơdoi, 'nâu đei năng jĭ 1 lơ̆m dôm tơdrong tơlĕch trong tơmât jên jang tih hlŏh đơ̆ng sơ̆ truh dang ei tơ̆ tơring.

Ƀât mă anih jang tŏk ‘nao đei pơih xă oei pơih đei lơ tơdrong ‘lơ̆ng vă jang hơdoi đơ̆ng tơring Tây Nguyên păng tơring tơter đak dơsĭ Nam Trung Bộ, hop akŏm ‘măng mă âu đei hơmĕng ưh lăp sơng iŏk dơ̆ng jên jang vă atŏk tơiung mŭk drăm, tơpôl đĕch mă oei pơjing hơyak tŏk pran ‘lơ̆ng găh đon tơchĕng sơng iŏk jên jang, đơ̆ng druh kiơ̆ lơ tơdrong jang jing chă rơih dôm tơdrong jang ‘lơ̆ng, đei yoa vă gơ̆h pơjing đei jơhngâm pran jang tŏk đunh đai ăn tơring.

Ƀok Trương Công Thái, Phŏ Kơdră vei lăng kon pơlei dêh char Đắk Lắk, pơma hơdăh:  “Hop akŏm roi tơbăt trong Tơproh jang đơ̆ng dêh char păng tơlĕch trong tơmât jên jang sơnăm 2026 kơ dêh char Đắk Lắk, hăm dôm hơnăn tơdrong jang păng kơsô̆ jên tơmât jang mă dôm anih tĕch mơdro hlôi kĭ ‘nŏh gơ̆h pơma, ‘nâu jĭ 1 lơ̆m dôm ‘măng pơgơ̆r sơng iŏk jên jang tih hlŏh đơ̆ng sơ̆ truh dang ei đơ̆ng rŏng kơ tơmât hơdai 2 dêh char Đắk Lắk păng Phú Yên. Hăm jên tơmât jang lơ thoi noh găh dêh char vă akŏm jơhngâm hơmet ming trong pơm hla ar, tơplih hăm kơmăy sô̆; mă 2 dơ̆ng 'nŏh pơtho khul bơngai jang rơgei, jang gơ̆h vă pơvih ăn tơdrong jang tơ̆ hơnăp kơnh; mă 3 'nŏh hăm tơdrong pơm hơmet hla ar đơ̆ng blŭng mưh dôm bơngai tơmât jên jang truh 'noh nhôn gô tơlĕch trong jang hloi vă sek tơlang 'lơ̆ng rim tơdrong pơmat tat”./.