‘Nou jĭ tơdrong pơgơ̆r chinh trĭ-mŭk drăm gĭt kăl vă tơƀôh tơbăt dôm tơdrong đei, tơdrong rơvơn, tơdrong oei sa ‘lơ̆ng rŏ, chăl sơnăm păng rơvơn tơmơ̆t jên jang kơ dêh char. Tơdrong tơm kơ hop akom ‘noh tơroi tơbăt Tơdrong tơchơ̆t kĭ pơkăp hơmet ming trong Pơprŏ vă jang kơ dêh char Đắk Lắk jăl jang 2021-2030, lăng truh sơnăm 2050, pơih să cham char atŏk tơ iung ‘nao hăm rim tơring kăl, tơring jang mŭk drăm păng hơnih tơm tŏk muk drăm tơm. Jơ ‘năr ou, Hơnih vei lăng kon pơlei dêh char gô tơroi tơbăt hloh 250 tơdrong vă jang krao hơvơn tơmơ̆t jên jang hăm akop kon jên jang hloh 1 triu ti hlak jên, pơjao ăn tơngla tơmơ̆t jên jang ăn lơ tơdrong vă jang păng pơgơ̆r rim tơdrong jang pơtrŭt tơmơ̆t jên jang. Vă hơmet ăn tơdrong pơgơ̆r gĭt kăl ou, rim hơnih gru gra gĭt kăl dăr sơnăm, hơnih ‘lơng rŏ lơ̆m dêh char jei hlôi hơmet ‘lơ̆ng ăn pơvih pơvăn ăn rim khul dăr lăng hơlen, tơmang lăng.