Dêh char Đắk Lắk đei lơ tơdrong ‘lơ̆ng pha ra băl nhen anih dơ̆ng “tơring pơtăm cheh phe tơm” kơ Việt Nam, yak truh hơnih kơdrơ̆m cheh phe kơ apŭng plĕnh teh. Đắk Lắk jĭ hơnih tơƀưh đơ̆ng dôm tơring jang mŭk drăm Păh Tu - Pơbăh păng Hơlĕch - Pơmơ̆t; đei tơmam hơtŏk tơiung logistics, mŭk drăm đak dơsĭ, kơmăy kơmŏk pơm tơlĕch jrŭ, ŭnh hơyuh rơgoh păng mŭk drăm choh jang sa bri ‘long. ‘Nâu kŭm jing tơdrong vă dêh char pơjing tơdrong hơgăt jang tŏk GRDP jô̆ păh lăp hloh 11% lơ̆m 1 sơnăm lơ̆m jăl jang 2026-2030.

Tơproh jang hơmet ming ‘măng âu băt hơdăh tơdrong jang hơtŏk tơiung “3 tơring - 3 trong jang - 2 anih tơm - 3 jang tŏk pran”, yak truh pơgơ̆r dơ̆ng hơnih mŭk drăm kiơ̆ trong jang hơdai kơjăp, iŏk jang tôch ai tơdrong đei yua đơ̆ng rim tơring. Hơdai hăm ‘noh, dêh char akŏm lơ̆m 3 trong jang tŏk gĭt kăl ‘noh khoa hŏk kơmăy kơmŏk păng tơplih kơsô̆; bơngai jang păng trong tơlĕch jang; anih jang kăl ‘nao.

Pơma dơnuh tơ̆ ‘măng hop akŏm, yă Đào Bảo Minh, Bí thư Đảng ủy, Kơdră Anih pơgơ̆r kon pơlei phường Tuy Hòa tơbăt, kơplăh pơjing tơproh jang đei rim tơring jang hơdai dăr lăng tôch kơ hơlen vă vei sơđơ̆ng pơm đei “mĭnh hơnih tơproh jang hơdai ‘lơ̆ng’, hơtŏk tôch ai tơmam drăm kơ rim tơring.

“Rim tơring mơ̆ng kiơ̆ tơdrong đei tơ̆ yăn âu ƀơ̆t mă tơproh jang nhôn hlôi tơchĕng hơlen păng ‘meh vă, tơchĕng hơdrol tơdrong hơtŏk tơiung tơ̆ hơnăp kơnh păng nhôn hlôi tơmơ̆t dôm đon tơchĕng âu lơ̆m tơproh jang. Mưh tơproh jang đei kĭ ăn ‘noh pơm tơdrong ‘lơ̆ng vă nhôn lăng kiơ̆ lơ̆m tơproh jang ‘noh, nhôn đei tơdrong tơmơ̆t jên jang păng tơdrong hơtŏk tơiung. Tơmơ̆t jên jang đơ̆ng păih  Trung ương, đơ̆ng păih dêh char păng jô̆ hloi tơdrong hơdrin đơ̆ng tơring”.

Lơ̆m tơproh jang hlôi băt hơdăh tơdrong tơm hơtŏk tơiung chă tơmang lăng jing 1 lơ̆m dôm tơdrong jang mŭk drăm tơm kơ dêh char Đắk Lắk. Kơlih thoi noh, lơ̆m kơplăh pơjing tơproh jang, Anih vei lăng găh Joh ayŏ, Tơplŏng kơdâu păng Chă tơmang lăng hlôi jang hơdai tôch kơjăp hăm dôm anih roi tơƀôh, lơ̆m noh mă kăl ‘noh lăng truh trong vă jang chĕng hơmet rim tơring chă tơmang lăng kơ dêh char. Ƀok Trần Hồng Tiến, Kơdră vei lăng găh Joh ayŏ, Tơplŏng kơdâu păng Chă tơmang lăng dêh char Đắk Lắk tơbăt, lơ hơnih chă tơmang lăng tơm đei tơƀôh ăn rơđăh ‘lơ̆ng, đơ̆ng hơnih chă tơmang lăng kơ teh đak ving Xuân Đài, groi kông  Xuân Hoà truh pơgar bri ‘long kơ teh đak Yok Đôn, dơnâu đak Lắk, dôm tơring chă tơmang lăng bri brăh, chă tơmang lăng tơpôl, chă tơmang lăng choh pơtăm păng pơlei tơdrong jang.

“Lăp đơ̆ng rŏng kơ đei Thủ tướng kĭ ăn tơproh jang kơ dêh char, nhôn gô hơnơ̆ng jang tơgŭm tơmơ̆t lơ̆m dôm tơdrong jang hơtŏk tơiung chă tơmang lăng păng tơlĕch jang dôm trong vă jang kiơ̆ tơproh jang ƀlep trong vă jang”.

Kiơ̆ kơ ƀok Đỗ Thái Phong, Phŏ Kơdră Jơnŭm pơgơ̆r kon pơlei dêh char Đắk Lắk, tơdrong hơiă đơ̆ng ‘măng hơmet ming tơproh jang âu ‘noh jĭ pơm đei 1 hơnih hơtŏk tơiung tih hloh hăm tơdrong tơgoăt hơdai tơring rơđăh ‘lơ̆ng đơ̆ng păih Hơlĕch păng păih Pơmơ̆t. Lơ̆m noh, păih Hơlĕch gô tơgŭm hơdrol hơtŏk tơiung kơmăy kơmŏk ‘nao, pơm tơlĕch jrŭ, ŭnh hơyuh rơgoh. ‘nâu gô jing 2 tơdrong ‘lơ̆ng tơgŭm băl vă jing kơjă mŭk drăm ‘nao kơ  Đắk Lắk.

“Hơmet ming tơproh jang ‘măng âu ‘noh jĭ tơdrong jang ‘lơ̆ng păng kăl hloh. Rim trong vă jang hơtŏk tơiung mŭk drăm - tơpôl, khŭl lĭnh păng - sơđơ̆ng kơ dêh char tơ̆ hơnăp kơnh tă kơ athei jang kiơ̆ lơ̆m tơproh jang kơ dêh char”.

Kiơ̆ jô̆ hơlen lơ̆m tơproh jang, đơ̆ng dang ei truh sơnăm 2030, Đắk Lắk kăl hơvơn dang 676.000 ti hlak jên tơmơ̆t jang lơ̆m tơpôl vă tơlĕch jang dôm tơdrong jang ‘lơ̆ng găh trong nơnăm, anih jang logistics, tơnŏk đak dơsĭ, cham gre păr, hơnih jang kơmăy kơmŏk, hơnih jang mŭk drăm păng dôm hơnih pơvih pơvăn tơdrong jang tih. ‘Nâu kŭm jing jăl jang dêh char Đắk Lắk akŏm hơmet pơ ‘lơ̆ng dôm tơdrong tơhlăk găh anih jang kăl, jang hơdai tơring păng hơnih hơtŏk tơiung vă pơm đei tơdrong ‘lơ̆ng ăn jang tŏk đunh đai.

Tơdrong tơproh jang hơmet ming dêh char Đắk Lắk ưh khan lăp pơih ăn hơnih hơtŏk tơiung ‘nao, mă oei tơƀôh hơpơi ‘meh yak tŏk pran kơtang đơ̆ng tơring lơ̆m jăl jang hơtŏk tơiung ‘nao. Hăm trĕng lăng đunh đai, đon tơchĕng tơplih ‘nao păng khŏm bơ̆jang, Đắk Lắk tŏk bŏk pơm đei tơdrong kơjăp vă lơ̆m teh đak yak mơ̆t lơ̆m chăl jang tŏk đơ̆ng hơdrĕch hơdrŭng.