Kiơ̆ nơ̆r tơroi, tơdrong jang tŏk mŭk drăm lơ̆m 6 khei blŭng sơnăm kơ dêh char Đắk Lắk pơhlom đei 7,8%, tŏ sĕt ƀiơ̆ kơsô̆ tơlĕch kơpal kơ 9%. Lơ̆m 12 tơdrong hơgăt tơm, đei 5 tơdrong hơgăt jang đei păng lơ hlŏh kơsô̆ pơjao, 1 tơdrong hơgăt ‘nao vă jang đei, 6 tơdrong hơgăt tam mă jang đei. Tơdrong akŏm jên, tơmam, adrin tơlĕch jên jang đơ̆ng teh đak, chưk pơ ‘ngoăih teh păng tơlĕch trong jang xa, tĕch mơdro đơ̆ng anih tĕch mơdro tơ̆ Đắk Lắk oei tơƀâp lơ pơmat tat.

Tơ̆ hop akŏm, Jơnŭm pơgơ̆r kon pơlei dêh char Đắk Lắk vă hơlen năng 30 blăh hla ar chih tơroi, 20 hla ar chih tơdrong tơchơ̆t đei ƀơm truh tơ̆ jên hu, jên jang đơ̆ng teh đak, tơplih hăm kơmăy sô̆, pơtho pơhrăm, jang pơgang, vei sơđơ̆ng teh đak, tang găn sar bar păng tơdrong bơ̆ jang đơ̆ng Khul kơdră pơgơ̆r tơring 2 tăl. Tơdrong apinh jet păng tơl nơ̆r apinh jet akŏm găh dôm tơdrong vă jang, tơdrong tơlĕch jên jang đơ̆ng teh đak, sek tơlang nơ̆r athei đơ̆ng kon pơlei păng hơmet pơ ‘lơ̆ng dôm tơdrong tơhlăk găn trong lơ̆m tơdrong vei lăng păng pơgơ̆r bơ̆ jang.