VOV4.Bahnar – Dak Lak đei hlŏh 1.000 hnam trưng păng lơ hnam trưng lơ̆m kơ sô̆ âu hơ nơ̆ng đei ƀĕnh bơ ngai, chil hrăt trong yak ƀât ‘măng jang hnam trưng kơ plăh ƀât jơ đe ŏh năm hŏk păng brŏk đơ̆ng hŏk, pơm tơ lĕch lơ tơ drong krê. Sơ năm hŏk 2022-2023, gơ nơm găn đei tơ drong tĕch mơ dro tơ mam ƀât hơ năp ‘măng jang hnam trưng, roi tơ ƀôh, pơm hơ tŏk đon ăn đe mĕ ƀă păng hŏk tro, hơ met pơ ‘lơ̆ng ming lơ tơ drong kơ na tơ drong chil hrăt ƀât ‘măng jang hnam trưng hlôi đei sek tơ lang, lơ hnam trưng ưh pă ƀôh hrăt hrot bơ ngai, gre vih vât ƀât ‘măng jang hnam trưng bơih.

Hnam trưng jăl kơ đeh Nguyễn Bỉnh Khiêm tơ̆ tŏk bŏk pơ lei tơm (plt) Buôn Ma Thuột, ƀât anih tơ ƀưh 4 tŏ trong Nguyễn Đình Chiểu – Lê Thánh Tông. Ƀât dâu adrol ki đei lơ anih tĕch tơ mam xa pơ gê, anih huch cheh phe dăh mă lơ gre chơ tơ mam tŭn tĕch rok trong kơ na hơ nơ̆ng pơm ăn trong chil hrăt. Mă lei tơ drong ‘nâu sơ năm ‘nâu ưh pă đei bơih.

Yă Nguyễn Thị Phương, hnam tơ klă hnam trưng tơ roi: “Dôm sơ năm adrol ki đe mĕ ƀă hao gre hon đa, gre ô tô chơ kon năm hŏk dăh mă chơ kon brŏk đơ̆ng hŏk, ƀât yơ rơ hơi dơ̆ng ƀât dŏh vă tơ jur dăh mă sơng iŏk kon; đang kơ ‘nŏh đe sŏng xa, huch chĕh phe kŭm tơ gĕch dơ̆ng gre tơ̆ trong hai, ƀât lăp tŏk dơ̆ng gre tơ̆ jơ nglăng hloi, dơ̆ng tơ klă anih đe sơng ăn bơ ngai năm jâng hŏh yak; bơ ngai tĕch tơ mam hăm gre tŭn kŭm dơ̆ng rok trong. Jơ năm hŏk dăh mă lĕch đơ̆ng hŏk ưh đei sơ đơ̆ng kiơ, hrăt hrot tơ̆ trong mă loi ‘nŏh ƀât  6 – 7h pơ gê dăh mă 4h30 – 5h kơ sơ̆, rim năr lơ̆m giĕng. Mă lei sơ năm ‘nâu inh ƀôh tơ drong ‘nâu ưh pă đei bơih”.

Ƀât ‘măng jang Hnam trưng jăl kơ đeh Nguyễn Bỉnh Khiêm, plt Buôn Ma Thuột hrei ‘nâu păng đei ƀôh tơ drong hrăt hrot, ưh sơ đơ̆ng tơ̆ trong yak vih vât bơih

Kiơ̆ ƀok thây Lê Mai Thanh – tơ̆ Hnam trưng jăl kơ đeh Nguyễn Bỉnh Khiêm, adrol kơ mât hŏk sơ năm hŏk ‘nao 2022-2023, hnam trưng pơ gơ̆r hôp đĭ đăng thây kô, kăn ƀô̆, bơ ngai jang vă tơ lĕch dôm tơ drong jang lơ̆m sơ năm hŏk, lơ̆m noh đei hơ met pơ ‘lơ̆ng tơ drong sơ đơ̆ng ƀât ‘măng jang hnam trưng. Khul thây kô vei lăng hnam trưng pơ jing grŭp jang vang jang hơ doi hăm khul jang kơ pal vang tơ ƀôh trong ăn gre kơ dâu, pơ tho ăn mĕ ƀă chơ kon dơ̆ng gre trŏ anih:            

“Hnam trưng pơ jing 3 khul, 1 khul đơ̆ng 2 – 4 ‘nu bơ ngai bơ̆ jang tơ ƀôh trong yak, pơ tho ăn mĕ ƀă hŏk tro dơ̆ng gre mưh chơ ba dăh mă sơng kon mă trŏ anih, vă huei hrăt hrot ƀât ‘măng jang hnam trưng. Hăm gre ô tô ‘nŏh lăp dơ̆ng 2,3 yâi đĕch ưh gơ̆h dơ̆ng đunh, tơ dăh mĕ ƀă hŏk tro ưh đei anih dơ̆ng gre ‘nŏh athei tơ ƀôh trong ăn đe sư năm dơ̆ng ƀât anih mă lăp; hăm gre hon đa kŭm pơ tho tơ ƀôh ăn đe dơ̆ng mă trŏ anih ‘năi. Hnam trưng oei pơ gơ̆r klăih song jơ lĕch brŏk, pơ tih gia lăm 1 lĕch dôm jơ, đơ̆ng rŏng kơ ‘nŏh lăm 2,3,4… hơ nơ̆ng thoi noh. Mưh hŏk đang ‘nŏh pơih đĭ đăng ‘măng jang hnam trưng, đơ̆ng ‘măng jang tơm truh 2 tŏ ‘măng jang iĕ...”

Tơ̆ plt Buôn Ma Thuột, tơ drong ưh sơ đơ̆ng tơ̆ trong ƀât ‘măng jang hnam trưng nhen hnam trưng Mâm non Hoạ Mi, Hnam trưng jăl kơ đeh Nguyễn Đức Cảnh trong Phan Chu Trinh, Hnam trưng jăl 2 Tân Lợi trong Ngô Quyền, Hnam trưng jăl kơ đeh Võ Thị Sáu trong Bà Triệu, Hnam trưng jăl kơ đeh Lê Hồng Gấm trong Lý Thường Kiệt, dăh mă hnam trưng jăl kơ đeh Nguyễn Bỉnh Khiêm trong Nguyễn Đình Chiểu… đei hơ nơ̆ng lơ̆m dôm sơ năm âu ki.

Trung tá Thái Văn Thìn – Phŏ Công an plt Buôn Ma Thuột tơ roi, đơ̆ng rŏng chă hơ len năng tơ̆ dôm hnam trưng đa đei tơ drong chil hrăt ƀât trong tơ klă ‘măng jang hnam trưng, nhôn ƀôh tơ drong tơ ƀôh trong yak tam mă lăp, pơm ăn tơ drong hrăt hrot gre, bơ ngai vih vât ƀât ‘măng jang hnam trưng roi dêh hlŏh dơ̆ng. Nhôn roi tơ ƀôh ăn Dơ nŏ anih vei lăng kon pơ lei plt Buôn Ma Thuột yuih pơ đĭ dur chĕng găn trong, ƀât trong tơ ƀưh jê̆ hnam trưng tơ plih kơ ‘nŏh lăp sơng hăm đak sơng đĕch, pơm ăn trong rơ hơi hiôk ƀiơ̆, gre gơ̆h kuĕch, yak vih vât ƀônh. Hơ dai hăm ‘nŏh, pơ gơ̆r ƀơk hla ar chih tơ roi ăn mĕ ƀă hŏk tro hơ tŏk đon hlôh vao mưh yak vih vât tơ̆ trong gre; athei dôm unh hnam tĕch mơ dro iĕ tơ jê̆ ‘nŏh pơm kiơ̆ mă ‘lơ̆ng tơ drong hơ găt vei lăng sơ đơ̆ng tơ̆ trong nơ năm; mă loi ăn khul jang vang tơ ƀôh trong ăn gre kơ dâu tơ̆ trong jê̆ hnam trưng, sek tơ lang tơ păt dôm bơ ngai pơm glăi…

Ƀât jơ năm hŏk, brŏk đơ̆ng hŏk, Công an plt Buôn Ma Thuột hơ nơ̆ng ăn khul linh truh tơ ƀôh trong yak, găn ƀiơ̆ tơ drong hrăt hrot tơ̆ trong ƀât ‘măng jang hnam trưng

Trung tá Thái Văn Thìn pơ ma: “Công an plt Buôn Ma Thuột chă ƀơk 3.400 hlak hla ar tơ roi, roi tơ ƀôh ăn 9.020 ‘nu hŏk tro păng thây kô găh Luơ̆t vei sơ đơ̆ng tơ̆ trong nơ năm. Klăih song hlŏh 400 ‘nu kăn ƀô̆, linh đei: Kanh sat vei lăng tơ̆ trong gre, Kanh sat vei sơ đơ̆ng păng kanh sat tơ ring vang roi tơ băt ăn đe mĕ ƀă hŏk tro mưh năm ba dăh mă sơng iŏk kon đơ̆ng hnam trưng athei dơ̆ng gre trŏ anih vă huei chil hrăt trong păng tơ ƀôh trong ăn gre kơ dâu vih vât sơ đơ̆ng ‘lơ̆ng ƀât jê̆ ‘măng jang hnam trưng.”  

Lơ̆m dêh char Dak Lak dang ei đei vă jê̆ 500.000 ‘nu hŏk tro oei hŏk tơ̆ 1.071 hnam trưng. Kiơ̆ ƀok Đỗ Tường Hiệp – Phŏ Kơ dră Anih vei lăng pơ tho pơ hrăm dêh char Dak Lak, tơ drong ưh sơ đơ̆ng tơ̆ trong ƀât jê̆ ‘măng jang hnam trưng ưh lăp đei hơ drô̆ tơ̆ plt Buôn Ma Thuột đĕch mă đei hloi tơ̆ rim tơ ring lơ̆m dêh char dôm sơ năm âu ki. Mă đơ̆ng tam mă đei tơ drong tâm preh băl dêh ră mă lei tơ drong chĭl hrăt tơ̆ trong ƀât jơ năm ba kon dăh mă jơ lĕch đơ̆ng hŏk pơm ưh kơ ‘lơ̆ng truh um ai tơ ring kơ drâm, pơm tơ tŏ đon kon pơ lei. Tơ̆ hơ năp tơ drong ‘nâu, mât lơ̆m sơ năm hŏk ‘nao sơ năm ‘nâu, Anih vei lăng pơ tho pơ hrăm dêh char jang hơ doi hăm anih jang kơ pal tơ lĕch lơ trong hơ met ming, blŭng a hlôi iŏk đei lơ tơ drong ‘lơ̆ng:  

“Lơ̆m khei ‘năr âu ki, anih pơ tho pơ hrăm Dak Lak đei lơ hla ar chih gơih ăn dôm hnam trưng vă hơ tŏk đon hlôh vao ăn hŏk tro, athei đe ŏh băt hơ dăh mưh truh ƀât ‘măng jang hnam trưng ‘nŏh athei yak vih vât mă ‘lơ̆ng. Tơ roi ăn đe mĕ ƀă hŏk tro băt păng pơm kiơ̆ mă ‘lơ̆ng hai. Mă loi, dôm hnam trưng jang hơ doi hăm Khul kơ dră tơ ring, khul linh công an, dăh mă khul druh dăm năm jang tơ gŭm tơ̆ tơ ring vang bơ̆ jang vei sơ đơ̆ng tơ̆ trong yak vih vât ƀât ‘măng jang hnam trưng.”.  

                Tuấn Long/VOV Tây Nguyên – Dơ̆ng tơ blơ̆