Kiơ̆ tơchơ̆t, jên asong jang kŏng đơ̆ng jên mong kơ tơring tơjur đơ̆ng hloh 7.201 tih hlj oei pă hloh 6.686 tih hlj, dang tơjur hloh 515 tih hlj. Gah tơm tơjur hăm dôm tơdrong jang yua jên iŏk teh pơm jang, pơdơh asong jên jang ăn Jên mong hơtŏk gah teh lơ̆m sơnăm 2025 păng kăt tơjur dôm tơdrong jang ưh đei kăl asong jên pơm jang. Dêh char adoi pơkăp asong jang dơ̆ng hăm jên pơkăp hloh 167 tih hlj ăn dôm tơdrong jang vă jê̆ keh đang păng dôm tơdrong jang kĕ hơtŏk tơ-iung.

Yă Cao Thị Hòa An, Kơdră Hô̆i đŏng kon pơlei dêh char Đăk Lăk pơtruh nơ̆r hăm Anih jang vei lăng kon pơlei dêh char păng rim anih jang hơtŏk hơlen dôm pơkăp jang “6 hơdah”, vei sơđơ̆ng kih luơ̆t jên mong, asong jên jang đei yua tơnăp, vă pơjing tơdrong hơtŏk tơmam drăm lơ̆m sơnăm 2025 kiơ̆ tơchơ̆t Trung ương pơjao; atŭm hăm noh pơgơ̆r rim anih jang athei pơm kiơ̆ kih luơ̆t asong jang kŏng, tơguăt sơnong jang kơ bơngai chĕp kơ̆l hăm tơdrong tơnăp asong jên jang.