Tơ̆ Anih jang pơjing Tơring jang kơmăy Hòa Tâm păng Tơnŏk Bãi Gốc, jơhngâm đon bơ̆ jang oei tôch pơneh. Dôm jĭt tŏ gre tih, gre kôch chưk teh kŭm hăm lơ kơmăy kơmŏk oei hăt chưk hơmet teh, pơih trong pơvih ăn tơdrong jang. Dôm tơdrong ‘nâu gơ̆h đei gơnơm đơ̆ng adrin chưk pơ ‘ngoăih teh. Kiơ̆ Anih vei lăng Tơring jang mŭk drăm Phú Yên, đơ̆ng rŏng kơ jơnăr bơ̆ jang tơm, tơdrong jang pơjing Tơring jang kơmăy Hòa Tâm hlôi jang đang tơdrong asong thuê hlŏh 215 ha teh. Kơsô̆ teh oei đei dơ̆ng, dôm jĭt ha teh rơgoh hơnơ̆ng đei pơjao ăn bơngai tơmât jên jang. Hơdrô̆ Tơnŏk Bãi Gốc, đĭ đăng 64,9 ha teh hlôi đei pơjao, pơjing tơdrong ‘lơ̆ng vă bơ̆ jang ming man dôm anih tơm lơ̆m khei 9 truh. 

Ƀok Đỗ Văn Khánh, Phŏ Kơdră chĕp kơ̆l Công ty tơmât jên jang hơdoi păng atŏk tơiung anih jang, trong nơnăm tơ̆ Tơring jang kơmăy Hòa Tâm pơma hơdăh: "Ƀok Kơdră chĕp kơ̆l kŭm nhen kơdră Anih vei lăng kon pơlei dêh char hlôi pơjing grŭp jang hrĕnh pơyoa ăn tơdrong chưk pơ ‘ngoăih teh nhen ‘nao âu bơ̆ jang tôch pran. Kơdră chĕp kơ̆l Hòa Phát kŭm pơkăp ƀât blŭng khei 9 vă tơlĕch jang, pơm ‘lơ̆ng găh luơ̆t păng anih đei bơngai tơmât jên jang vă jăh tơlĕch bơ̆ jang."

Ưh lăp hơdrô̆ tơ̆ Hòa Tâm đĕch, tơdrong chưk pơ ‘ngoăih teh kŭm oei bơ̆ jang pran ‘lơ̆ng tơ̆ lơ tơdrong jang tih nai. Tơ̆ anih jang man Dơnâu Buôn Biếp, găh Tơdrong jang man Dơbâu mong đak Yên Ngựa, xăh Liên Sơn Lắk, dôm grŭp jang bơ̆ jang kơtă tơ̆ tơring, vang jô̆ hơlen, pơm pơkĕh hla ar hrŭ ‘mong jên teh. Truh dang ei, hlŏh 8,34 ha kơ 31 unh hnam kon pơlei hlôi kĭ ăn trong hrŭ ‘mong jên hăm kơsô̆ jên hlŏh 10,6 ti; đơt 2 kŭm jô̆ hơlen đang bơih, adrin iŏk pơdreu teh lơ̆m khei 8 vă pơjao ăn tơdrong jang ming man.

Ƀok Nguyễn Anh Tú, Kơdră vei lăng kon pơlei xăh Liên Sơn Lắk tơroi: "Hrei ‘nâu hlôi pơjing dôm grŭp chă roi tơbăt, pơma nuh tơpăt hăm kon pơlei. Kăn ƀô̆ tơ̆ anih jang mŭk drăm jang hơdoi hăm Anih vei lăng teh găh Anih jang Ea Kar jô̆ hơlen păng iŏk bơ̆ jang hloi."

Mă đơ̆ng lơ tơdrong jang đei tơplih ‘lơ̆ng, tơdrong chưk pơ ‘ngoăih teh oei jing tơdrong tơhlăk tih găn trong tơmât jên jang đơ̆ng teh đak. Kiơ̆ Anih vei lăng tơdrong tơmât jên jang pơm trong păng choh jang xa, atŏk tơiung tơring tơrang dêh char Đắk Lắk, anih jang oei vei lăng 35 tơdrong jang, lơ̆m noh 17 tơdrong jang oei tơhlăk găh teh păng hơmet ming tơdrong jang. Hơdrô̆ tơdrong hrŭ ‘mong jên teh oei tơhlăk tơ̆ 19 xăh, ƀơm kơnê̆ truh tơdrong ming man păng tơlĕch jên jang.

Ƀok Trần Tiến Đông, Kơdră Anih vei lăng tơdrong tơmât jên jang pơm trong păng choh jang xa, atŏk tơiung tơring tơrang dêh char Đắk Lắk ăn tơbăt: "Dôm tơdrong jang oei tơhlăk tam mă tơlĕch jên jang mă lơ ‘nŏh ƀơm truh tơdrong chưk pơ ‘ngoăih teh. Oei dôm tơdrong jang đĭ đei teh bơih ‘nŏh Anih vei lăng pơtho ăn dôm anih iŏk jang jăh tơlĕch ming man, tơgĕch ƀât khei ‘năr tŏ ‘lơ̆ng vă ming man prăt măng, prăt năr, jăh jang đang mă hrôih."

Truh ‘năr 10/7/2026, dêh char Đắk Lắk hlôi tơlĕch đei 2.921 ti hlak jên, iŏk đei hlŏh 30% nơ̆r hơgăt đei pơjao. Vă jang đei đon pơhnŏng jhang tŏk truh 2 kơsô̆, Anih vei lăng kon pơlei dêh char athei dôm anih jang kơpal, tơring tơrang akŏm jơhngâm hơmet pơ ‘lơ̆ng dôm tơdrong tơhlăk găh trong tơproh jang, teh, hla ar tơmât jên jang, cham char păng tơmam vă ming man; hơlen năng, sek tơlang keh 396 tơdrong jang bơ̆ jang hiơ̆ hyĭn; hơnơ̆ng hơmet pơ ‘lơ̆ng trong jang, tơmât hơdai hơnăp tơlĕch jên jang hăm Tơdrong jang 45 măng năr chưk pơ ‘ngoăih teh păng hơtŏk hơnăp jang đơ̆ng 5 grŭp vang chă hơmet pơ ‘lơ̆ng tơdrongpơmat tat kiơ̆ rim tơdrong jang, rim tơring. Đon pơhnŏng đei tơlĕch ‘nŏh truh đĭ jăl khei mă III tơlĕch tŏ sĕt hlŏh ‘nŏh 67% jên jang, đĭ jăl khei mă IV đei 92% păng jang đang đĭ đăng adrol kơ ‘năr 31/1/2027.

Ƀok Đỗ Hữu Huy, Kơdră vei lăng kon pơlei dêh char Đắk Lắk pơma hơdăh: "Hơlen năng đĭ đăng trong vă jang lơ̆m 6 khei hơtuch sơnăm, chih hơdăh rim tơdrong jang tơm lơ̆m khei 7, khei 8 păng jăl khei mă III; akŏm jơhngâm sek tơlang keh rim tơdrong tơhlăk oei găn trong jang tŏk. Rim kơdră chĕp kơ̆l athei jur tơ̆ tơring, bơ̆ jang hơlen năng tơ̆ anih jang, bơ̆ jang tơpăt hăm anih tĕch mơdro, hăm bơngai tơmât jên jang, hăm kon pơlei vă hơmet pơ ‘lơ̆ng pơmat tat; kiơ̆ jơhngâm đon pơjao tơdrong jang bơih athei druh kiơ̆ truh tôch, pơma bơih athei bơ̆ jang, mưh jang ‘nŏh jang khŏm đei."

Đơ̆ng dôm tơdrong tơplih ‘lơ̆ng tơ̆ dôm anih ming man truh tơdrong chĕp kơ̆l pơgơ̆r tôch kơjăp, Đắk Lắk dar deh pơih pơjing đei tơdrong ‘lơ̆ng vă chưk pơ ‘ngoăih teh, hơtŏk hrĕnh tơdrong tơlĕch jên jang đơ̆ng teh đak. Mưh dôm tơdrong jang gĭt kăl đei bơ̆ jang hrĕnh păng jên jang truh hăm rim tơdrong jang mŭk drăm, ‘nâu gô jing jơhngâm pran gĭt kăl vă dêh char bơ̆ jang đei đon pơhnŏng jang tŏk truh 2 kơsô̆ lơ̆m sơnăm 2026.