Phó Thủ tướng Phạm Thị Thanh Trà pơma hơdăh trong jang ưh đei tơplih đơ̆ng Đảng, Teh đak Việt Nam pơ ‘nhŏ hơdrol hlŏh ăn tơdrong atŏk tơiung tơdrong pơvei hăm Trung Quốc lơ̆m rim trong jang tơbôl păng pơma hơdăh, ƀât mă apŭng plenh teh, lơ̆m tơring oei đei lơ tơdrong tơplih hrĕnh, krê hơmơt, ưh kơ ê nhen hrei ‘nâu, 2 păh athei bơ̆ jang ‘lơ̆ng tơdrong tơchĕng atŭm gĭt kăl đơ̆ng kơdră chĕp kơ̆l 2 Đảng, 2 teh đak, hơnơ̆ng hơmet kơjăp, atŏk tơiung tơdrong pơvei 2 pang, mă loi jĭ dôm tơdrong jang hơdoi đei yoa tơ̆ yăn âu.

Bơngai tang măt Hà Vĩ pơma hơdăh, tơdrong pơvei đơ̆ng 2 Đảng, 2 teh đak oei mât lơ̆m khei ‘năr jang tŏk tôch ‘lơ̆ng, hăm lơ tơdrong tơƀâp tih đei pơgơ̆r tôch hơiă, jang hơdoi roi đei yoa lơ̆m lơ tơdrong, mă loi jĭ găh tĕch mơdro, tơmât jên jang, chă tơmang lăng tŏk tôch pran, tơdrong pơvei đơ̆ng kon pơlei kŭm tôch ‘lơ̆ng.