Khul dăr lăng bơ̆ jang tơ̆ plei Kli A (phường Buôn Hồ), plei Tuôr (xăh Hòa Phú), plei Tơng Jú (xăh Ea Kao) păng plei Akŏ Dhông (phường Buôn Ma Thuột). Kiơ̆ đơ̆ng dăr lăng ăn ƀôh, đơ̆ng rŏng đei teh đak tơgŭm, lơ unh hnam kon pơlei kơchăng tŏk iŏk jên jang hơdrol, pơih xă trong jang xa, pơjing lơ tơmam pơyoa ăn đe truh lăng tơklep hăm tơdrong jŏh ayŏ kơ dŏ xoang, tanh sĭt păng choh jang xa, dar deh pơjing tơdrong jang xa ăn kon pơlei tơ̆ tơring.

Dôm tơring kŭm athei hơnơ̆ng hơmet pơ ‘lơ̆ng tơdrong tơgŭm kiơ̆ trong hơtŏk tơdrong pơtâp pơhrăm, tơgŭm roi tơbăt, pơjing tơmam ‘lơ̆ng, pơm hơtŏk đon rơgei mưh bơ̆ jang chă tơmang lăng, gơ̆h pơma nơ̆r teh đak đe păng hơtŏk tơdrong jang hơdoi đơ̆ng rim unh hnam jang găh chă tơmang lăng lơ̆m tơpôl.

Ƀok Y Kle Knul, phŏ Kơdră Anih vei lăng jŏh ayŏ kơ dŏ xoang xăh Hòa Phú đei nơ̆r pơma: “Athei hơnơ̆ng tơgŭm jên, tơmam vă chĕp vei hnam kơjung, tơdrong tanh brai vai khăn, tơdrong tôn chĭng chêng, dôm tơdrong et soi so păng pơm tơmam chă tĕch ăn đe răt hăm dôm tơmam đei kơtă tơ̆ tơring. Hơtŏk tơdrong tơlĕch trong jang, roi tơbăt, pơjing tour tơƀưh plei Tuôr hăm dôm anih chă tơmang lăng lơ̆m dêh char vă pơih xă anih sơng tơmoi păng pơm hơtŏk tơdrong đei yoa đơ̆ng dôm trong chă tơmang lăng lơ̆m tơpôl”.

Kiơ̆ yă Đỗ Thị Như Tình, Kơdră Anih vei lăng hơdrĕch kon kông kơ Jơnŭm pơgơ̆r kon pơlei dêh char Đắk Lắk, chă tơmang lăng lơ̆m tơpôl lăp jang tŏk pran kơjăp mưh kon pơlei tơpă jĭ tơ ‘ngla bơ̆ jang, đei xa yoa đơ̆ng tơdrong chă tơmang lăng hai. Tơdrong bơ̆ jang trŏ trong, iŏk yoa ‘lơ̆ng dôm kơjă kăp gĭt đơ̆ng joh ayŏ kơ dŏ xoang ưh lăp tơgop vei kơjăp tơmam jŏh ayŏ đơ̆ng sơ̆ đĕch mă oei pơjing tơdrong ‘lơ̆ng hơiă, pơm hơtŏk kơjă dôm anih truh tơ̆ Đắk Lắk. Tơdrong dăr hơlen gô jing tơmam gĭt kăl vă anih jang kơpal hơlen năng tơdrong đei yoa đơ̆ng dôm tơdrong tơgŭm hrei 'nâu păng tơlĕch dơ̆ng trong jang mă lăp lơ̆m chăl 'nao:

“Khul dăr lăng kŭm chih iŏk rim nơ̆r pơma tơ̆ yăn âu lơ̆m khei ‘năr tơlĕch jang kiơ̆ Tơdrong tơchơ̆t păng dôm tơdrong tơgŭm tơ̆ dêh char. Kiơ̆ đơ̆ng noh vă tơchĕng hơlen, athei tơlĕch jang kiơ̆ mĭnh tơdrong tơchơ̆t 'nao găh atŏk tơiung chă tơmang lăng lơ̆m tơpôl tơklep hăm chĕp vei păng tưk tơiung tơdrong juăt, jŏh ayŏ kơ dŏ xoang lơ̆m chăl 'nao 'nŏh sư gơ̆h hơnhăk ba tơdrong đei yoa 'lơ̆ng ƀiơ̆”./.