Dôm năr 'nâu, dôm 'măng 'mi hơnơ̆ng đei tơ̆ dôm anih ming man Hnam trưng teh đak rong jăl mônh păng jăl ƀar tơring sơlam dêh char Gia Lai. Tơ̆ xăh Ia Chia, tơdrong jang tơ̆ 'ngoăih lơ 'măng athei pơdơh. Ƀât rim 'măng 'mi prăng, kơhrĕng 'nu công nhân tơgĕch iung jang dơ̆ng vă jang klăm ăn dôm jơ đei ‘mi. Ƀok Vũ Phúc Tuân - Kơdră chĕp kơ̆l tơdrong jang tơ̆ xăh Ia Chiă, dêh char Gia Lai tơroi: "Hăm tơdrong jang oei đei tôch lơ, Công ti tơm nhôn oei krao akŏm khŭl jang đơ̆ng găh Tu mơ̆t. Vă truh hrĕnh, nhôn răt vĕ gre păr vă chơ bơngai jang mơ̆t tơ̆ anih jang. Dang ei, tơdrong jang hơmet pơ 'lơ̆ng, nhôn krao đơ̆ng 40 - 50 'nu bơngai jang đơ̆ng tơring găh Tu mơ̆t. 'Ngoăih kơ 'noh, nhôn iŏk yua kơmăi pruih vă tô hnam, hơdai hăm bơngai jang vă hơtŏk hrĕnh tơdrong ming man, bơ̆ jang tăng ka ‘ngoăih kơ jơ jăng, đei tơdrong tơgŭm ăn bơngai jang hai".

Hnam trưng teh đak rong hŏk tro kon kông xăh sơlam Ia O kŭm ƀôh tơdrong jang oei hiơ̆ hyĭn ‘năi. Ƀok Nguyễn Dũng Anh, Phŏ Kơdră vei lăng tơdrong jang ăn tơbăt, dôm anih jang ming man tam mă đang athei đei bơngai jang rơgei ngăl, tôch kơ mơmat vă chă đei bơngai jang tơgĕch kiơ̆ năr. Anih iŏk jang lăp gơh hơmet kiơ̆ đơ̆ng hơtŏk thim ka bơ̆ jang tơ̆ kơmăng đĕch: "Dang ei, dôm tơdrong jang oei đei dơ̆ng kăl bơngai jang gơ̆h hơgei ‘mơ̆i, nhen pơm bơbŭng, hơmet pơ 'lơ̆ng. Nhôn oei adrin păng krao akŏm dơ̆ng bơngai jang vă bơ̆ jang tơ̆ kơmăng, jang thim jơ vă tom. Dang ei, đĭ đăng kăn ƀô̆, ki sư kŭm nhen bơngai jang đei đon adrin jang mă đang, pơjao hnam trưng adrol kơ năr mât hŏk sơnăm hŏk 'nao".

Truh tŏk bŏk khei 8, tơdrong ming man đĭ đăng 7 tŏ hnam trưng teh đak rong jăl mônh păng Jăl ƀar tơ̆ dôm xah sơlam kơ dêh char Gia Lai jang đei dang 85%. Dôm lăm hŏk, hnam oei păng hnam pơtâp pơhrăm vă đang ngăl bơih, mă lei minh ƀar anih nhen hnam sŏng xa, hnam thây kô vei lăng, hnam ăn bơngai pơtho oei ‘nŏh jang hiơ̆ ƀiơ̆ đơ̆ng 5 năr truh 1 puăt khei. Vă tơgŭm ăn dôm anih iŏk jang bơ̆ jang hrĕnh ƀiơ̆, vă jê̆ 780 'nu kăn ƀô̆, khul linh hơnơ̆ng đei măt tơ̆ anih ming man mă đơ̆ng hlôi jang đang tơdrong jang đei pơjao.

Đại tá Nguyễn Công Ngân - Phŏ Chính ủy Sư đoàn 320, Quân đoàn 34, yŏng chĕp kơ̆l khul jang tơgŭm tơ̆ anih ming man xăh Ia O ăn tơbăt: "Hơdrô̆ Quân đoàn 34, nhôn năm tơgŭm tơ̆ xăh Ia O, hlôi jang đang tơdrong tơgŭm man đĭ đăng hlŏh 3000m2 dur var tăp dăr hnam trưng. Hrĕnh hlŏh năr hơgăt đơ̆ng ‘năr 18/7. Dang ei, khul nhôn oei hơnơ̆ng tơgŭm anih iŏk jang, man dôm anih lơ̆m hnam hŏk dơ̆ng".

Lơ giĕng au ki, kơdră chĕp kơ̆l Anĭh vei lăng kon pơlei dêh char Gia Lai hơnơ̆ng jur dăr lăng tơ̆ dôm hơnĭh oei man hnam trưng, bơ̆ jang hăm tơ 'ngla tơmơ̆t jên jang păng bơngai iŏk jang vă hơmet pơ 'lơ̆ng dôm tơdrong tơhlăk tăk mưh đei. Ƀok Lâm Hải Giang, Phŏ Kơdră Anĭh vei lăng kon pơlei dêh char Gia Lai pơma hơdăh, dêh char ư̆h đei pơdui ming khei 'năr athei man đang hnam trưng; mă athei dôm anĭh jang akŏm tôch ai khul bơngai jang, kơmăi kơmŏk, pơgơ̆r bơ̆ jang mă 'lơ̆ng păng pơ 'nhŏ jang đang adrol dôm anih kăl vă pơyoa ăn sơnăm hŏk 'nao:

"Dôm khul jang, Anih iŏk jang athei jang mă hrĕnh vă tom tơmât yoa ƀât blŭng sơnăm hŏk 'nao tơ̆ 7 hnam trưng teh đak rong 'nŏh jĭ nơ̆r athei đơ̆ng khul linh, jĭ nơ̆r pơkăp đơ̆ng plei nuih. Kiơ̆ rim tơdrong, bơ̆n athei yak hlŏh pơmat tat, adrin păng khŏm bơ̆ jang mă 'lơ̆ng dôm anih kăl vă pơyoa ăn tơdrong hŏk pơhrăm đơ̆ng đe kon mon, vă mât lơ̆m sơnăm hŏk 'nao, đe kon mon đei hnam trưng 'nao".

Oei pă hloh mĭnh giĕng dơ̆ng truh năr pơm lêh mât hŏk sơnăm hŏk ‘nao, tơ̆ dôm anih ming man Hnam trưng teh đak rong jăl mônh păng jăl ƀar găh dôm xah sơlam kơ dêh char Gia Lai, rim anih jang oei kơrŭn jơhngâm pơjei băl bơ̆ jang vă jăh man đang trŏ ƀât năr sơng rơbâu 'nu hŏk tro mơ̆t hŏk sơnăm hŏk 'nao tơ̆ dôm hnam trưng kơjăp 'lơ̆ng.