Kiơ̆ roi tơbăt, truh kơsơ̆ 12/11, lơ̆m dêh char đei hloh 10.000 tŏ hnam tơglơh pơbŭng, 9.200 tŏ hnam đei đak lơ̆p, 282 tŏ hnam trưng păng 13 anih jang pơgang hư răm; 269 km trong đei hơlih, 19 gơng rok đei đak jroh hoch. Hiong răm jô̆ pơhlom hloh 2.500 ti hlak jên, lơ̆m noh hơdrô̆ rong ka hơdang dang 1.300 ti hlak jên.

Lăp đơ̆ng rŏng kial hơbŭt, Đắk Lắk hlôi akŏm jơhngơ̆m tơ̆lĕch jang hơmet ‘lơ̆ng tơdrong truh, akŏm tơgŭm hơdrol chô̆ hơmet ŭnh điên, trong nơnăm tơm păng hơpuih hơmet hnam trưng hŏk, hnam oei ăn kon pơlei. Dêh char Đắk Lắk hlôi klăih song hloh 80 ti hlak jên tơgŭm hăt hot, tơgŭm kon pơlei hơmet ming hnam oei, tơiung ming jang sa păng sơđơ̆ng tơdrong hơrih sa đơ̆ng rŏng kial hơbŭt. Anih jang pơgang kŭm hăm rim tơring vei sơđơ̆ng vei lăng kơjăp ưh kơ lê̆ đei ƀôh pơrang jĭ.