VOV4.Bahnar - Pơgê năr 28/9, tơ̆ pơlei tơm Buôn Ma Thuột, Dơnŏ anĭh vei lăng kon pơlei dêh char Dak Lăk pơgơ̆r hop akŏm tơƀơ̆p muh măt rim bơngai tĕh đak đe tơgum djru tơgŭm djru tơ̆ Dak Lăk sơnăm 2022. Hop akŏm au đei 8 khŭl jang tơ̆ Dak Lăk vang năm păng pơdăh trư̆k tuyên hăm 16 khŭl jang, rim hơnĭh tang măt tĕh đak đe tơ̆ Việt Nam.

Kiơ̆ đơ̆ng Dơnŏ anĭh bơ̆ jang hơpĕh hơpong hăm tĕh đak đe dêh char Dak Lăk, lơ̆m 2 sơnăm au ki, dêh char hlôi chă hơvơn đei 6 trĭu 500.000 dolar kiơ̆ tơdrong jang atŏk kơtang jang hơdoi păng pơtrŭt hơvơn rim hơnĭh jang tĕh đak đe vang tơgŭm djru. Lơ̆m au, jô̆ trŭh khei 8 sơnăm au, Dơnŏ anĭh vei lăng kon pơlei dêh char hlôi kĭ pơkăp sơng iŏk 51 tơnô̆ tơgŭm djru hăm akop kon jên krao hơvơn đei vă jê̆ 3 trĭu 700.000 dolar. Hơnĭh tơgŭm ăn găh lơ ‘nŏh tơdrong jang pơgang, pơtho pơhrăm, mŭk drăm bri brăh cham char, atŏk tơ iung mŭk drăm-tơpôl păng xek tơlang rim tơdrong tơpôl. Păh tơring, ƀok Võ Văn Cảnh, Kơ iĕng Kơdră chĕp pơgơ̆r Dơnŏ anĭh vei lăng kon pơlei dêh char Dak Lăk sơkơ̆t hơdăh, Dak Lăk ling lang pơjing rơvơn ‘lơ̆ng hơ iă hlŏh vă rim khŭl, rim bơngai tĕh đak đe tơgŭm djru jang hơdoi, tơgŭm ăn dêh char lơ̆m khei năr kơnh.

VOV Tây Nguyên/Amazưt tơblơ̆ nơ̆r