VOV4.Bahnar - Kơ sơ̆ 6/10, Dơ nŏ anih vei lăng kon pơ lei dêh char Dak Lak pơ gơ̆r hôp hăm dôm anih jang kơ pal, khul grŭp, tơ ring tơ rang đei ƀơm truh vă hơ tŏk hrĕnh tơ drong tơ lĕch tơ drong jang pơm trong gre kơ dâu hrĕnh Buôn Ma Thuột- Khánh Hòa. Tơ drong jang âu pơm trong kơ jung 117,5 km, akŏm đĭ đăng jên jang vă jê̆ 22.000 ti. Lơ̆m noh, jăl trong kơ dâu klĕch Dak Lak kơ jung dang 85 km, athei chă tĕh pơ jing ming tơ ring oei xa ‘nao ăn hlŏh 300 unh hnam.

Dak Lak hôp hơ tŏk hrĕnh tơ drong jang pơm trong gre kơ dâu hrĕnh Buôn Ma Thuột-Khánh Hòa.

Tơ̆ hop akŏm, kơ dră chĕp kơ̆l Dơ nŏ anih vei lăng kon pơ lei dêh char Dak Lak hlôi pơ jao tôch hơ dăh tơ drong jang ăn dôm anih jang kơ pal, anih jang đei ƀơm truh păng 3 apŭng đei trong gre kơ dâu hrĕnh pơm klĕch, bơ̆ jang tơ drong jang kiơ̆ hơ năp jang đei pơ jao găh tơ drong chưk pơ ‘ngoăih tĕh, pơ jing plei oei xa ‘nao, vei lăng tơ mam drăm cham char, chă rơih anih iŏk jang, tơ plih tĕh bri, pôk rĭ jrăng unh điên. Tơ drong tơm kơ plăh dang ei ‘nŏh chih pơ kĕh hla ar tơ roi đei ƀơm truh cham char adrol kơ ‘năr 12/11 truh âu kơnh, đang kơ ‘nŏh pơm ‘lơ̆ng khei ‘năr tơ lĕch jang adrol kơ ‘năr 30/6/2023, pơm đang trong lơ̆m sơ năm 2026 păng tơ mât yoa lơ̆m sơ năm 2027.

VOV Tây Nguyên/Dơ̆ng tơ blơ̆