Năr 12/10/2007, kâu lak ƀô̆ đe Drăkăn jang Mŭk drăm dêh char Đăk Lăk đei tơ iung pơjing. Rim xơnăm, đe pơmai oh vang jang hlôi tơgop kơ hrĕng rơtuh hlj ăn dôm tơdrong jang nhen: Bơbŭng hnam 'mêm kơ eng, Mĕ chĕp kơ̆l vei rong đe hơ-ioh pơti, tơgŭm đe drăkăn hin dơnuh, unh hnam tơnap tap hơtŏk mŭk drăm, tang găn jĭ Covid. 

Đơ̆ng rŏng hloh 15 xơnăm pơm jang, Anih vei lăng kon pơlei dêh char Đăk Lăk hlôi kĭ pơkăp axong pơjing Jơnŭm đe Drăkăn jang Mŭk drăm dêh char Đăk Lăk. Tơchơ̆t đơ̆ng Jơnŭm noh vă akŏm đe drăkăn jang mŭk drăm pơm jang lơ̆m lơ tơdrong jang, rim tơdrong jang mŭk drăm lơ̆m tơpôl; tơgŭm hơtŏk anih jang mŭk drăm, tơroh bơngai jang mŭk drăm lơ̆m tơring kơ dêh char Đăk Lăk păng hơtŏk jang hadoi, tơroi găh tơdrong hlôh vao lơ̆m vei lăng, tơgŭm dih băl kơyuơ tơdrong hơtŏk tơ iung jơnap, hơtŏ hơnơ̆ng păng gơh rơgei.