Iŏk đơ̆ng tŏk bŏk khei 11 sơnăm ‘nâu, Anih pơgơ̆r jang găh tơchă, iŏk akŏm păng băt hơdăh hơnăn kơ ting lĭnh lôch dŏng teh đak ( krao kơđeh ‘noh Anih pơgơ̆r jang 515) dêh char Dak Lak hlôi pơm lêh tơlĕch jang ăn khŭl K51 năm tơ̆ dêh char Mondulkiri (Campuchia) jang hơnăp jang tơchă, iŏk akŏm, chơ vih tơ̆ pơlei pơla kơting lĭnh iung jang tơgŭm păng bơngai joăt jang kơ Việt Nam sơ̆ lôch lơ̆m dôm khei ‘năr tơblăh vang tơ̆ Campuchia lơ̆m pơyan tŏ  2022-2023.

Tơ̆ Campuchia, Anih pơgơ̆r jang 515 dêh char Dak Lak hlôi tơlĕch dôm tơdrong jang tơƀơ̆p, tơroi tơbăt, krao hơvơn khŭl kơdră păng kon pơlei teh đak ‘nâu bơngơ̆t truh, pơm tơdrong hiôk tơgŭm kang ƀô̆, khŭl linh Khŭl K51 lơ̆m kơplăh bơ̆ jang hơnăp jang.

Hơdai hăm ‘noh, đei dôm tơdrong jang tơgŭm kon pơlei; tơroi tôm dôm tơdrong tơgŭm kiơ̆ tơdrong tơgŭm đơ̆ng teh đak Việt Nam hăm dôm bơngai tơroi ƀlep pơsat lĭnh lôch dŏng teh đak Việt Nam. Lơ̆m kơplăh bơ̆ jang, đe kang ƀô̆ khŭl linh Khŭl K51 kŭm pơm kiơ̆ tơpăt khôi luơ̆t teh đak Campuchia, pơ yom tơdrong joăt oei sa joăt joe kơ tơring.