Năr tŏk bŏk giĕng khei 11, ƀok Tạ Hồng Triều, oei tơ̆ Kueng kơphô̆ 10, phường Buôn Ma Thuột, truh tơ̆ Anih Bơ̆jang kơ teh đak phường pơm hơmet ming hla ar găh hŏ păng hơnăn tŏk bŏk lơ̆m Hla ar roi tơbăt rơneh đei glăi ăn kon hơdruch hơmet ăn vă mơ̆t hŏk đăi hŏk. Ƀok Triều roi tơbăt, mă đơ̆ng blŭng a oei tam mă joăt, mă lei gơnang đơ̆ng kang ƀô̆ Grŭp 1 ‘măng pơtho tơnăp, rim tơdrong đei hơmet pơ ‘lơ̆ng lơ̆m tam mă truh 10 pơnĭt. “Dang ei ĭnh pơm ming dơ̆ng, đe duch tơ̆ grŭp 1 ‘măng pơtho pơm hla ar tôch kơ ƀônh, lăp yua 1 hla ar roi tơbăt rơneh hơmet ming bơngai đei glăi păng ĭnh tơroi dơ̆ng mă lăp kơtơ̆ng ang đang kơ ‘noh nôp ăn. Kŏng chư̆ng grŭp 1 ‘măng akhan đang bơih, brŏk tơ̆ hnam gô gơih hla ar pơm đang kiơ̆ trong bưu điện kơna ĭnh ƀôh hiôk dêh”.

Pơm hla ar iŏk ŭnh om tơ̆ Anih Bơ̆jang kơ teh đak phường Buôn Ma Thuột, ‘nhŏng Phan Thế Hưng păng mŏ Nguyễn Diễm Quỳnh  tơroi gơnang đơ̆ng pơm hla ar trực tuyến đơ̆ng hơdrol kơna tơdrong pơm hla ar tơ̆ grŭp 1 ‘măng đei ƀôh hrĕnh, hiôk hloh. Dôm tơdrong tơplih ming lơ̆m trong jang đơ̆ng pơtho online, sơng iŏk hla ar hô sơ truh pơm tơ̆ hơnih ăn ƀôh anih jang teh đak tŏk bŏk tơplih rơđăh đơ̆ng đon tơchĕng “vei lăng” jing jơhngơ̆m đon “pơvih pơvăn”. “Yak blŭng a ‘noh ĭnh ƀôh athei pơm pơđĭ hloi tơ̆ hla ar păng pơđĭ hloi hla ar online lơ̆m điên thoăi ‘noh kŭm pơvĭnh tŏ sĕt mơ̆n. Mă lei đei kang ƀô̆ pơtho tơnăp, ‘lơ̆ng kơna hla ar pơm hrĕnh. ‘Nâu jĭ tơdrong ‘nao, ăn ƀôh jơhngơ̆m đon pơvih ăn kon pơlei đei tơplih ‘lơ̆ng, pơm hla ar hrĕnh hloh.”       

 Phường Buôn Ma Thuột, dêh char Đắk Lắk đei tơmơ̆t hơdai đơ̆ng dôm phường Thành Công, Tân Tiến, Tân Thành, Tự An, Tân Lợi păng xăh Cư Êbur (găh pơlei tơm Buôn Ma Thuột so), hăm vă jê̆ 170.000 ‘nu kon pơlei. Yă Trần Thị Minh Thủy, bơngai joăt jang Grŭp 1 ‘măng kơ Anih bơ̆jang teh đak phường Buôn Ma Thuột, roi tơbăt mĭnh năr đei dang 130–160 ‘nu bơngai truh pơm hla ar. Vă hơmet ‘lơ̆ng tơdrong jang tih, anih jang klăih song jing 2 grŭp kŏng chư̆ng, bơ̆jang hloi lơ̆m lăm păng ‘ngoăih cham. Kon pơlei đei pơtho tơtom kơna ‘mơ ‘met đei jơnăr răp gô, pơm. “Ƀar grŭp, mĭnh grŭp đei 6 ‘nu jang tơgŭm kon pơlei. Grŭp tơ̆ ‘ngoăih cham ‘noh tơgŭm kon pơlei pơm hla ar hô sơ trực tuyến; grŭp tơ̆ lơ̆m lăm sơng iŏk păng hơmet pơ ‘lơ̆ng hla ar hô sơ. Găh lơ nhôn tơgŭm bơngai kră hăm bơngai jo jăn, oei kon pơlei mơlôh ‘noh gơh yua  kơmăy kơmŏk, đe sư gơh pơm kơdih păng nôp kơdih.”

Chih jô̆ đơ̆ng Anih vei lăng kon pơlei dêh char Đắk Lắk, đơ̆ng ‘năr 1/7 truh đĭ khei 10, lơ̆m dêh char sơng iŏk dang 481.000 hla ar hô sơ kiơ̆ Hơnih pơvih pơvăn kơ Teh đak, khŭl jang hơmet pơ ‘lơ̆ng hla ar bơ̆jang đơ̆ng dêh char păng đơ̆ng dôm anih jang kŭm hăm 102 xăh, phường. Lơ̆m kơsô̆ âu, hloh 437.000 hô sơ hlôi pơm đang, iŏk đei hloh 91%. Đơ̆ng rŏng tơmơ̆t hơdai, tơdrong jang khŭl kơdră chĕp kơ̆l 2 tăl bơ̆jang sơđơ̆ng, tơdrong hơmet ‘lơ̆ng hla ar hô sơ lăng atŭm hiôk. Kơsô̆ lăp đon đơ̆ng kon pơlei păng anih mơdro sa găh hơmet ‘lơ̆ng roi tơbăt, apĭnh iŏk jang đei 100%, oei găh sơng iŏk păng hơmet ‘lơ̆ng hla ar hô sơ jang đei vă jê̆ 91%, đei lăng tơ̆ kơsô̆ ‘lơ̆ng pơting hăm tơdrong atŭm lơ̆m teh đak. Ƀok Đỗ Đức Hà, Phŏ Kơdră vei lăng Anih jang Tư pháp dêh char Đắk Lắk, roi tơbăt, vă hơtŏk ‘lơ̆ng đei yua pơm hla ar bơ̆jang, hơdai hăm tơdrong hơtŏk ‘lơ̆ng jang hơgei ăn kang ƀô̆, bơngai jang kơ teh đak, dêh char kăl pơjing 1 hơnih mong răk hla ar điện tử đơ̆ng dêh char truh tơring. Ƀok Đỗ Đức Hà tơroi tơblang: “Dôm anih jang ƀơm truh athei đei mĭnh hơnih mong răk hla ar hơdai, păng đơ̆ng hơnih ‘măn răk hla ar hơdai âu athei pơjing đei phần mềm kơmăy kơmŏk roi tơbăt vă tơgoăt đĭ đăng dôm tơdrong kơtơ̆ng ang găh hla ar bơ̆jang. Đơ̆ng noh, kon pơlei păng anih mơdro sa gô đei tôm tơdrong kơtơ̆ng ang vă pơih lăng păng pơm dôm hla ar ƀơm truh kơdih bơ̆n. Hơdai hăm ‘noh, anih jang teh đak kŭm đei tơdrong roi tơbăt âu vă hơmet ‘lơ̆ng hla ar kiơ̆ ‘meh vă đơ̆ng kon pơlei păng anih mơdro sa”.

Đắk Lắk đơ̆ng rŏng tơmơ̆t hơdai đei kơsô̆ kon pơlei dang 3,46 triệu ‘nu păng 102 anih bơ̆jang tơ̆ xăh. Hăm teh să, bơngai hŭi, tơdrong pơm hla ar iŏk đei kơsô̆ lơ ăn ƀôh tơdrong hơdrin tih đơ̆ng khŭl kang ƀô̆, bơngai jang kơ teh đak păng bơngai jang. Iŏk yua âu kŭm roi tơbăt tơdrong tơplih bơ̆jang đơ̆ng đon tơchĕng “vei lăng” jing jơhngơ̆m đon “pơvih pơvăn” kiơ̆ trong jang đơ̆ng Khŭl kơdră teh đak, lơ̆m khei ‘năr đơ̆ng rŏng tơmơ̆t hơdai.