VOV4.Bahnar – Pơm kiơ̆ Tơchơ̆t kơsô̆ 11/NQ-CP đơ̆ng Khul Kơpal teh đak găh tơdrong hơmet păng hơtŏk mŭk drăm – tơpôl, Anih mong jên tơgŭm tơpôl jang tơ̆ dêh char Đăk Lăk tŏk bŏk akŏm hơtŏk tenh tơdrong pơtruh jên axong tŏk iŏk ăn bơngai hin dơnuh păng dôm bơngai mă teh đak tơchơ̆t tơgŭm. Kiơ̆ đơ̆ng noh, tơgop tơgŭm kon pơlei găn hloh tơnap tap, tenh kuăng xơđơ̆ng tơdrong erih, tơgop vei xơđơ̆ng pơyua ăn tơpôl, hơmet hơtŏk mŭk drăm – tơpôl đơ̆ng rŏng khei năr ƀơm răn kơyuơ đơ̆ng pơrang jĭ COVID -19.

          Khei 3 xơnăm 2022, đei tŏk iŏk 10 trĭu hlj đơ̆ng tơdrong pơkăp tơgŭm ăn Hŏk tro, sinh viên tŏk iŏk răt kơmăi vi tĭnh kiơ̆ unh hnam, 'nhŏng Nguyễn Thuấn tơ̆ kueng kơphô̆ 2, thĭ trâ̆n Buôn trấp, apŭng  Krông Ana hlôi răt minh pôm laptop ăn kon drŏnglo hŏk lăm 7. 'Nhŏng Thuấn chơt hơ iă kơlih tơdrong noh hlôi pă đei ƀôh kon chă mơng điê̆n thoăi ƀă vă hŏk online.

          Dang ei pơrang jĭ da ƀiơ̆, mă lei laptop hlôi răt duh oei 'lơ̆ng kơlih mon hlôi băt yua lơ app hŏk trư̆k tuyê̆n nai. 'Nhŏng akhan, tơdrong tơgŭm ăn hŏk tro sinh viên tŏk iŏk răt kơmăi vi tĭnh, trŏ ƀlep hăm dôm unh hnam mă mŭk drăm oei tơjruh: “Dang ei nhôn tŏk iŏk 10 trĭu hlj noh minh khei nhôn kla 10 rơbâu hlj, khei năr tŏk iŏk đei Khul Kơpal teh đak pơkăp lơ̆m 36 khei, lơ̆m noh 6 khei kla minh 'măng. Inh kơchĕng lơ unh hnam tơnap tap noh tơrĕk hăm jên tơgŭm âu jing ƀônh hiôk hloh, pơyua ăn unh hnam”

        Adoi đei axong tŏk iŏk jên kiơ̆ Tơchơ̆t 11, 'nhŏng Nguyễn Nam Giang tơ̆ apŭng Krông Ana ăn tơbăt: Hăm tơdrong iŏk yua kơ bre klo hơkăn dang ei, vă mong đei jên man hnam oei duh hiong đunh khei năr.

          Kơyuơ noh ăh băt đei tơgŭm axong tŏk iŏk jên cheh tŏ xĕt kiơ̆ Tơchơ̆t 11 đơ̆ng Khul Kơpal teh đak, xư hlôi bơ̆ hla bar tŏk iŏk 450 trĭu hlj, hơtŏ hăm 50% kơjă pơkăp bơ̆ hnam, jên cheh adrô̆ 4,8% minh xơnăm. Gơnơm đei axong tŏk iŏk hăm jên cheh tŏ xĕt, unh hnam 'nhŏng man đei hnam 'nao, xơđơ̆ng tơdrong erih: “Gơnơm đei jên togŭm axong tŏk iŏk âu mă đei jên vă bơ̆ hnam, hăm jên cheh thoi noh adoi tŏ xĕt vă chă bơ̆ hnam oei”

        Lơ̆m 'măng âu, anih jang tơklăh kơ Anih mong jên tơgŭm tơpôl apŭng Krông Ana đei axong jên jê̆ 7 tih hlj vă pơkăp ăn tŏk iŏk kiơ̆ Tơchơ̆t kơsô̆ 11 đơ̆ng Khul Kơpal teh đak. Jô̆ truh dang ei, anih jang hlôi axong ăn tơdrong jang tơgŭm tơdrong jang păng pơih xă tơdrong jang ăn 53 'nu bơngai tŏk iŏk hăm kơsô̆ jên hloh 2,4 tih hlj; axong tơgŭm tŏk iŏk ăn hŏk tro sinh viên răt kơmăi vi tĭnh ăn 2 'nu, kơsô̆ jên 20 trĭu hlj; axong ăn tŏk iŏk tơgŭm man hnam oei tơpôl ăn 2 'nu hăm kơsô̆ jên 770  trĭu hlj. Ƀok Bùi Quang Tuyên, Kơdră Anih mong jên tơgŭm tơpôl pơm jang tơ̆ apŭng Krông Ana, dêh char Đăk Lăk tơroi: “Anih mong jên hlôi đei Anih jang tơm pơjao jên jê̆ 7 tih hlj, lơ̆m khei 5 axong tŏk iŏk jê̆ 100% kơsô̆ jên đei pơjao. Dôm kơsô̆ jên kiơ̆ Tơchơ̆t 11 âu noh mă tơm hlôi tơtom tơgŭm unh hnam kon pơlei ƀơm tơnap tap kơyuơ đơ̆ng pơrang jĭ pơm đei, axong măh tơdrong kăl tŏk iŏk jên vă pơtoi pơm jang vă hơmet hơtŏk mŭk drăm kơ unh hnam”

Kiơ̆ kơsô̆ chih hơlen đơ̆ng Anih mong jên tơgŭm tơpôl dêh char Đăk Lăk, dêh char hlôi đei Trung ương axong hloh 71 tih hlj vă tơlĕch axong tŏk iŏk kiơ̆ Tơchơ̆t 11 noh: ăn tŏk iŏk axong tơdrong jang, pơtoi pơih xă tơdrong jang; ăn tŏk iŏk bơ̆ hnam oei tơpôl păng ăn tŏk iŏk hăm đe hŏk tro, sinh viên đei tơdrong erih tơnap tap vă răt kơmăi vi tĭnh, kơmăi kơmŏk hŏk trư̆k tuyê̆n. Truh dang ei, jâ̆p dêh char hlôi axong tŏk iŏk hloh 52 tih hlj đơ̆ng jên mogn tơgŭm âu. ‘Nao âu, Đăk Lăk pơtoi đei Trung ương pơjao ăn jê̆ 260 tih hlj ăn tŏk iŏk hăm jên cheh tŏ xĕt kiơ̆ Tơchơ̆t âu vă axong tŏk iŏk kiơ̆ pơkăp jang kơ teh đak găh hơtŏk mŭk drăm – tơpôl tơring kon kông păng groi kông jăl xơnăm 2021 – 2030 păng ăn tŏk iŏk hăm dôm anih pơtho hŏk mâm non, jăl kơđeh ‘nguaih kơ teh đak vei lăng mă ƀơm răm đơ̆ng pơrang jĭ COVID-19. 

Ƀok Nguyễn Minh Hướng, Phŏ Kơdră Anih mong jên tơgŭm tơpôl dêh char Đăk Lăk ăn tơbăt, vă jên tơtom truh hăm dôm bơngai đei axong tŏk iŏk, đơ̆ng rŏng kơ Thủ tướng tơlĕch Tơchơ̆t kơsô̆ 11 găh tơdrong hơmet hơtŏk mŭk drăm đơ̆ng rŏng kơ pơrang jĭ Covid, Anih mong jên tơklăh hlôi tơgŭm ăn Anih vei lăng kon pơlei dêh char đei hla bar tơbang vă tơlĕch pơm kiơ̆ Tơchơ̆t âu.

Anih mong jên tơgŭm tơpôl dêh char duh jang atŭm hăm dôm anih jang tơpôl tơ̆ tơring vă chă hơlen băt rim bơngai, akŏm axong tŏk iŏk tenh kuăng, tơtom, vei xơđơ̆ng trŏ hơdăh. Atŭm hăm noh anih jang gô hơlen, păng tơgŭm tơroi pơtho vă rim bơngai tŏk iŏk yua jên trŏ tơdrong jang đei jơnei tơnăp: “Kơtă đơ̆ng rŏng đei tơroi găh jên mong axong tŏk iŏk noh Anih jang tơklăh hlôi tơgŭm ăn Anih vei lăng kon pơlei dêh char đei hla bar pơgơ̆r dôm anih jang tơpôl atŭm hăm Anih mong jên hơlen dôm bơngai kăl tŏk iŏk jên jang. Đơ̆ng rŏng đei hơnăn hơdăh Anih mong jên tơgŭm tơpôl pơgơ̆r dôm anih jang tơ̆ dôm apŭng jang atŭm hăm dôm anih jang tơpôl tơ̆ apŭng vă tơlĕch axong tŏk iŏk tenh kuăng hloh, trŏ bơngai kăl păng pơm jang trŏ tơdrong”

        Lơ̆m khei năr tơnap tap kơyuơ đơ̆ng pơrang jĭ COVID -19,  kơsô̆ jên mong tơgŭm tơpôl kiơ̆ Tơchơ̆t 11 noh jing  “tơkhuă” pơm trong hơtŏk tơ iung mŭk drăm, xek axong tơdrong jang păng dôm tơdrong đei ƀôh nai lơ̆m tơpôl, tơgop hơ ‘nhăk mŭk drăm – tơpôl Đăk Lăk hơmet hơtŏk xơđơ̆ng.

Lan chih păng pơre nơ̆r