Tơchơ̆t jang kơsô̆ 60 năr 18/9, Anih jang vei lăng kon pơlei dêh char Đăk Lăk pơgơ̆r rim tơring dah akŏm hơlen, pơkăp păng hơmet chih akŏm tôm yư lĭu groi teh, atŭm hăm noh, chih akŏm lơ̆m kơmăi kơsô̆ dôm hla bar kăl kơ kon pơlei nhen Hla bar Pơkăp yua teh, hnam oei, hla ar kăng kươk vă chih akŏm lơ̆m kơmăi gah groi teh. Đơ̆ng rŏng 1 khei tơlĕch jang, tơdrong hơmet kiơ̆ pơkăp um la kak groi teh hlôi keh đang tơ̆ tôm 102 xah; hloh 3,4 triu groi teh hlôi đei asong kơsô̆ pơkăp tơdrong kăl. Mă lei, jơ̆p dêh char adoi oei đei pơhlom 520.000 groi teh tam mă trŏ hăm tơdrong chih akŏm kơ tơ-'ngla.

Vă vei sơđơ̆ng tơdrong chih akŏm, Anih jang vei lăng kon pơlei dêh char Đăk Lăk pơgơ̆r rim tơring athei tenh kuăng keh đang asong khul jang kiơ̆ sơnong jang đei pơjao hơdah, hơtŏk jang hơdoi păng hơtŏk tơroi tơbăt truh rim thôn, pơlei, kueng kơphô̆ vă kon pơlei băt hơdah păng pơtruh tôm hla bar kăl. Tơdrong keh đang chih akŏm yư lĭu gah groi teh jĭ tơdrong jang kăp gĭt lơ̆m tơdrong pơjing jơnŭm pơgơ̆r kơmăi kơsô̆, tơpôl kơmăi kơsô̆, păng mŭk drăm kơmăi kơsô̆, hơtŏk pơ-'lơ̆ng tơdrong jang kŏng, tơjur ƀiơ̆ tơdrong vih vơ̆t rŏng 'ngir hăm kon pơlei păng anih jang mŭk drăm.